MALASƖƖ SƐBƐ
THƖMƖƖR TƆ̃TƲ̃Ɔ PAAR
Yɛna taamɔɩsɔɔra (550), ɔbɔɔle Jeju Kirisiti na kɔɔ ɩnɩ pa', ɔbɔɔle wɩ khere Malasɩɩ sɛbɛɛkɛra. Juifisɔ kɔɔ ther Babɩlɔn dɩɩra, kãakɛ wɩ kɔɔ fʋlɛ wɩnɩ jalna, a kɛr bir dɩɩ cʋʋ yɛna tamaasɔ. Gɩdonɩ yɛna 600 yɩɛrɩ fʋ para wɩ kɔɔ fʋlɛ wɛr a jalna Babɩlɔn bəənə. Dɩ wɩ kɔɔ toore le a dana yɛna 538 yɩɛra. Ga bɔɔle Jeju Kirisiti na kɔɔ ɩ̃ pa'. Sɩ mɔ̃ wɩ thenɩ le a kɛr bir pɩ, wɩ mar gbe gbe gbe dɩ wa n do bɩɛl na wɩrɛ kɔɔ hanɩle dɩɩra, kpɩɩ leere na hale bã, ɲɛɛ̃ khiir wer dakha. Yɛna 30, agɩbo kpalaɲɔ yʋɔr yɩɛraakɛ kɔɔ kanɩ khiro, ɔbɔɔle Jeju Kirisiti na kɔɔ ɩnɩ pa', dɩ Malasɩ na kɔɔ mɩɩ ɔɔ Thãgba thɩmɩɩkɛ pa', dabɔɔle, Ɩjɩrayɛl bɩsana kɔɔ pɛr nũu Aje na Jakarɩ Thãgbaa thɩmɩɩraakɛ wɩ kɔɔ mɩɩ wɩnɩ. Dɩ wɩ bire fʋ Jerujalɛm Thãgba fʋɔr cɔ mɩr (yɛna 520 yɩɛra, a jalna pɩɩr yɛna 515 yɩɛra, ɔbɔɔle Jeju Kirisiti na kɔɔ ɩ̃ pa'). Dɩ a dananakɛ dabɔɔle sɩ wa n yɩ thɩ̃ debi phaakɛ wɩ n kɔɔ pɩɛrnɩ le dɩɩra bɔɔraalera Jorobabɛl donɩ gobanɛra'. Dɩ Ɛsɩdɩrasɩ dakha na kɔɔ cʋʋ ɔɔ bir naar thɔ̃ pa'. (Agakpaan, yɛna 440 yɩɛra a cʋʋ gɩ, bɔɔlera J K. na kɔɔ ɩnɩ pa'). Thɩ̃ɛ na kɔɔ bɔr Thãgba fʋɔr hʋɛra ga, dɩ tɩbɩlaa fɩl dakha na kɔɔ bɔra': Wɩ n mə̃mələne Thãgba fʋɔrɛ: 1. 6, 14. Khaarda ti paarsɔ, tɩbɩla n yure Thãgba: 1. 14; 3. 8,9. Bonɩ jidara na n puno awɩ thɔ̃ dɩ wɩ do bɔɔbɔɔ 'lo bã: 2. 1, 2, 3. Jɔfʋʋkɛ Thãgba kɔɔ hanɩ ɔɔ too, wa n cʋ gɩ 'lo bã: 2. 14, 16. Dɩ Malasɩ yɩrɛ mɔ̃ thɩ̃ɛ hanɩ thale, dɩɩ do fʋ paar gɩ, a puno a dɩɩr bonɩ jidara na tɩbɩla fɩlɛ. A jaa warɛ kpɩɛrɛ Thãgbaa naʋra, gɩ cʋʋ wɩ wɩ hana debire biləni awɩ fɩlla. 1. 2, 5, wɩ jɩnana dɩ ɔɔ kɩɩl na ɔɔ bir ɩ̃ bɔ wɔrɔnɛ dɔdɔdɔ. Mal; 2. 17b; 3. 1, 5, 24. A kɔɔ maanɛ a so war aa, Thãgba na thʋɔn ɔɔ thɔ̃thɔn bɩɛl. 3. 1, bobon bɩɛl gɩ, kɛ na hɔnɩ Elɩ. 3. 23. Dɩ Matie na Jãa thɩmɩɩ pha bʋɔɔ sɛbɛsɔ nɔrɔrɛ aa, ʋlfɛrɛɛlera hanɩ Malasɩɩ sɛbɛra, Jã Batɩsɩ gr so, kɛ wɩ pɛrnɩ dɩ a na gbɛbɩ Jejuu bir ɩ̃. Mat: 17 11-13; Lu. 1. 17. Mɔ̃ Malasɩ ɩɩrnɩ na fãga thale da n kɛ̃kɛrɛna mɔ̃ wɩ n kʋɛnɩ Thãgba fʋɔrɛ, na fɩl bʋɔ ɔɔ bɔraale, ɔɔ sɛbɛɛkɛ n gbɛbɩrɛ tɩbɩlaakɛ dɔnɩ ha pɛdara wɩ puno wɩ caan Thãgba. Dɩ ga caannaalera a n we sɩ dakha nĩikɛ 'lo.