MALASƖƖ SƐBƐ
Gɩrɛ n nɛnanɩ Thãgbaa naʋ Ɩjɩrayɛl bɩsanana
1
1 Yɛkɛ thɩmɩɩr khɩɩkɛ Thãgba Kɔ̃tɩn thɔnanɩMalasɩ dɩ mɩɩ Ɩjɩrayɛl bɩsana.
2 Mɛr Thãgba Kɔ̃tɩn sor : «Mɩ na nɛr».
Sɩ nɛrɛ, dɩ nɩ bir na bule aa aɲee n nɛna mɩ na nɛr ya?
Mɛr Thãgba Kɔ̃tɩn, mɩ sor: «Ejayu na do Jakɔbɩɩ õkuunaa?»
Sɩ mɩ nar Jakɔbɩ,
3 Sɩ ma na Ejayuə'.
Mɩ cʋʋrɛ ɔɔ gɔ̃gɔ̃ bə̃sɔ dɩɩ do bə̃ kpara,
A gba ɔɔ dɩ a ha gbagbaasɔ le bə̃ kparara.
4 Adorakɛ Ejayuu too Edɔ̃dara bo sa yɩ,
Wɩ kʋɛ nɛr dɩɩ wer,
Sɩ ɩna bire na mɩ dɩ kpoloola.
Mɛr Thãgba Kɔ̃tɩn, kokenaa kɔ̃tɩ̃ na so warɛ wɔɔ,
Wɩ mɛ, sɩ mɛrɛ, ma wɩɛl gɛr wo.
Dɩ tɩbɩla na n wer awɩ dɩra:
'Puu cʋʋ dɩɩ', wa n wena wɩ:
'Tɩbɩlaakɛ Thãgba Kɔ̃tɩn gbananɩ nĩkhii khorr vʋ̃ʋ'.
5 Dɩ na yɩɛrɛ na anɩ thɛthɛɛ yi, na n so aa:
"Thãgba Kɔ̃tɩn wabɩrɛ waa vʋ̃ʋ.
Dɩ ɔɔ wabɩra ba jallakɛ a kpãasɛ Ɩjɩrayɛl dɩɩra ɓoɓo"».
Thãgba phaanɛ bonɩ jidara
6 Mɛr Thãgba Kɔ̃tɩn, kokenaa kɔ̃tɩ̃, mɩ sor nɛr bonɩ jidarara:
«Bikuun n dʋbɩrɛ ɔɔ thɩ, dɩ thɔ̃daar n dʋbɩrɛ ɔɔ kɔ̃tɩ̃.
Dɩ ado mɩ do narɛ thɩrɛ, mɔ̃ dɔ nɔɔ na n dʋbɩ ma'?
Dɩ ado kɔ̃tɩn mɩ do nar, mɔ̃ dɔ nɔɔ dɩ na n cʋ ma'?
Nɛr bonɩ jidara, nɩ n beesi mer,
sɩ nɛrɛ, dɩ nɩ bir bule aa,
Aɲera nɩ n beesi mɩ?
7 Gɛr dʋɔn mɔ̃ nɩ n ji marnɩ bonɩɛ
na kpɔ̃kpɔrɔ̃ thɩ̃ɛ bonɩ ji paara;
Sɩ nɛrɛ, dɩ nɩ bir bule aa,
Aɲera nɩ n kpɔ̃kpɔrɔ̃ mɩ?
Gɛr dʋɔn mɔ̃ nɩ n sonɩ aa,
mɛr Thãgba Kɔ̃tɩnɩ bonɩ ji pa na do thɩ̃ɛa'.
8 Dɩ ɔbɔɔkɛ nɩ n gbanɩ nʋ̃ yaarʋ,
a pɔna jinə bonɩɛ,
gele na do puurəə?
Na ɔbɔɔkɛ nɩ n gbanɩ nɔ kʋɛdaar,
agɩbo khodaar a jinə bonɩɛ,
gele na do puurəə?
Mɛr Thãgba Kɔ̃tɩn, kokenaa kɔ̃tɩn sɔ.
Nɩ jalana wɩ a hana anɩ gobanɛr
a hɩnɛ ado ga daaraarɛ,
Dɩ ado a na tee ner bɔɔbɔɔ nɩ jɩ.
9 Nɛnɛ̃ nɩ cʋʋnɩ thalela pɩ,
a nɩ ɩ̃ nɩ ƴɛɛ mɛr Thãgba ɩ̃ jɛ nɩ bʋɔra,
gɩ do mɩ tee ner dakha bɔɔbɔɔ bɛɛ?
Mɛr Thãgba Kɔ̃tɩn, kokenaa kɔ̃tɩ̃, mɛr sɔ.
10 Mɛr Thãgba Kɔ̃tɩn sor ayɩ:
Gɩ baar tibil bɩɛl nɛrɛɛra n khaan lõo,
gɩ do nɔɔ na n too na gbɔɔ dɔɔ
ɩ̃ bonɩ ji para ƴũu mɔlɔa'.
Anɩda na n da mara'.
Ma n ƴaal anɩ bonɩsɔa'.
11 Gɩdonɩ a fʋ wi phã paar a jalna dana wi lõ paar,
ɩ̃ i ther na sobɔr ca kpɩɩsɔɔ thɩ̃thɩɩn.
Dɩ paar fɛw, wɩ n thiire latɩkolo ɩ̃ i dʋbɩra,
Dɩ wa n jinə mar bonɩɛɛkɛ phonɩ,
Gɩdonɩ ɩ̃ i ther na sobɔr ca kpɩɩsɔɔ thɩ̃thɩɩn.
Mɛr Thãgba Kɔ̃tɩn, kokenaa kɔ̃tɩ̃, mɛr sɔ.
12 Sɩ nɛrɛ, nɛr n kpɔ̃kpɔrɔnɛ ɩ̃ i,
Mɔ̃ nɩ n sonɩ aa: "Bɔ kʋ thɩ̃ haar n haan
mɛr Kɔ̃tɩnɩ bonɩ ji pa !
Ga hana bɔ taa dikora'!"
13 Nɩ n sor aa: «Aɩ! Vɔɔrɛ gɩ pɔy!»
Gɛr gɩ dɩ na n beesi gɩ,
Mɛr Thãgba Kɔ̃tɩn, kokenaa kɔ̃tɩ̃, mɛr sɔ.
Sɩ nɛrra n jenə mar bonɩɛ nʋ̃ yunənesɔ
na nʋ̃ nɛ kʋɛdara na nʋ̃ khodara,
Gele dɔ anɩ bonɩɩkɛ nɩ n ji marnɩ.
Nɩ n kpɩɛrɛ ma teere bonɩ ca gele bɛɛ?
Mɛr Thãgba Kɔ̃tɩn, mɩ n bule ner.
14 Sʋɔn n 'le fɩ̃fɩlɩkɛ hananɩ nʋ̃ kʋʋr bɔɔbɔɔ ɔɔ nʋ̃sɔɔra,
Sɩ aa so nʋɔ mɛr Kɔ̃tɩnna, dɩ gba tãdaar dɩ hɛlna nʋɔ!
Mɛr Thãgba Kɔ̃tɩn, kokenaa kɔ̃tɩ̃ sɔ,
Mɛr dʋɔn jamana kpɩɛ.
Mɩ n kʋrɛ maar ca kpɩɩsɔɔ thɩ̃thɩɩn».