Mɔ̃ bonɩ jidaraa cʋʋ pa teenanɩ gɩ hana.
2
1 Nɛr bonɩ jidara thɩmɩɩrɩkɛ kpãkpaanɔ.2 Mɛr Thãgba Kɔ̃tɩn, kokenaa kɔ̃tɩ̃ sor ayɩ:
Ado na n pɛ mɩ nũə',
dɩ na n ƴaal na n dʋba mɩ na haara',
Ma tore sʋɔn anɩ thɩ̃thɩɩn,
Ma debire anɩ bɔna gɩ do sʋɔn.
Sobɔr mɩ so nar, ma debi ger,
gɩdonɩ tibil bɩɛllakɛ na ha anɩ thɩ̃thɩɩn dɩ kpɩɛrna ga.
3 Mɩ mar gɩrɛ dɩ ma n bũburõ anɩ məlsɔ.
Ma gbaar anɩ fɛtɩ bonɩ nʋmaa pɩbɩsɔɔra na cal nɩ ƴɩɛra,
Dɩ wa khɩɩ nɛr na pɩbara fɛw na jalna na faa.
4 Dɩ na jɩrɛ dɩ mɛr hana nɩ thɩmɩɩr kpãkpaanɛɛkɛra,
gɩ do nɔɔ ɩ̃ nɔ bɩɛl ʋlfɛra n hale 'lo na Levɩɩ məlsɔ.
Mɛr Thãgba Kɔ̃tɩn, kokenaa kɔ̃tɩ̃ sɔ.
5 Ɩ̃ nɔ bɩɛl ʋlfɛrɛlera na Levɩɩ məlsɔ,
dɔ nɔɔ dɩ wɩ hana yiri na ha ɩɩ.
Mɩ cʋʋrɛ mɛ̃, gɩ do nɔɔ wɩ hana mar cʋʋr.
Dɩ wɩ n kɔɔ cʋ mɛr,
Dɩ ma n kɔɔ kʋ wɩ maar.
6 Wɩ n kɔɔ dɩɩrɛ tɩbɩla jɔfʋʋkɛ telenenɩ,
Fɩɩlɛ na n the awɩ nɔra yuurəka'.
Sɩ kɔɔ hananɛ kha ha ɩɩ na cʋʋ pa telẽe.
Wɩ n kɔɔ bulle tɩɩ jɔjʋɔ,
dɩ wɩ kɛr sɩ na faa puure.
7 Gɩdonɩ bonɩ jidaar teenanɛ a na n 'laanɛ dɩɩrɛɛkɛ n 'laanɛnɩ Thãgba jɩɩr.
Ɔɔ pa tɩbɩla teena wa n 'lɛ jɔfʋ.
Gɩdonɩ thɔ̃thɔn a do mɛr Thãgba Kɔ̃tɩnnaakɛ dɔnɩ kokenaa kɔ̃tɩ̃.
8 Sɩ mɛr Thãgba Kɔ̃tɩn, kokenaa kɔ̃tɩ̃ sor ayɩ:
«Nɛrɛ, nɩ lɩɛn fĩi sa faa hʋɛ.
Nɩ cʋʋrɛ tɩbɩla jɔɔ dɩ wɩ buur hʋɛra dɩɩ do anɩ dɩɩr dɔ nɔɔ.
Nɩ kʋɛrɛ nɔ bɩɛl ʋlfɛrɛɛkɛ hanɩle na Levɩɩ məlsɔ.
9 Mɛrɛ dakha, ma cʋʋrɛ tɩbɩla fɛw na n beesi nɩ.
Wa n pɛ narɛ yicuru,
gɩdonɩ na n hɩɩn ɩ̃ hʋsɔa',
Nɩ n hɩɩnɛ tɩbɩla dɩɩdɩɩ jɔfʋ hɩ̃ɩdaa billo».
Ɩjɩrayɛl bɩsana n faarɛ Juifi khɛra sɩ wa n he ca kpɩɩsɔ
10 Ga do thɩ bɩɛllala sɛrɛ fɛw thaa'?
Ga do Thãgba bɩɛlla te saa'?
Sɩ mɔ̃ dɔ nɔɔ dɩ sa n fɩɩl khasɔ?
Dɩ sa n kpɔ̃kpɔrɔ̃ nɔ bɩɛl ʋlfɛrɛɛkɛ Thãgba ʋlfɛnanɩ asɩ thɩ kɔ̃tɩ̃sɔ?
11 Judaa məlsɔ na kpa awɩ nɔ thɩmɩɩra ga,
Wɩ cʋʋrɛ ƴɔ̃ƴɔɔnɛ thɩ̃ɛ Ɩjɩrayɛldaraa thɩ̃thɩɩn na Jerujalɛm dɩɩra.
Gɩdonɩ wɩ kpɔ̃kpɔrɔnɛ Thãgba Kɔ̃tɩnɩ thɩ̃ɩkɛ phonɩ,
kɛ dɔnɩ gɩrɛ a nanɩ na sobɔr.
Wɩ her khɛraakɛ n fʋɔrɛnɩ thãgba kpɩɩsɔ.
12 Tibilikɛ n cʋɛnɩ gele,
Thãgba Kɔ̃tɩn n hɛlaa ɔr na ɔɔ məlsɔ fɛw.
A hɛla wɩ Ɩjɩrayɛlɩ toora.
A hɛla dakha tibil wo tibilikɛ na jenɩ bonɩɛ
Thãgba Kɔ̃tɩnaakɛ dɔnɩ kokenaa kɔ̃tɩ̃ a na pɩɛraa.
13 Dɩ balaɲɔ thɩ̃ɛɛkɛ nɩ n cʋʋnɩ wo dʋɔn,
Nɩ n bɩrɛ yilẽbe dɩ na n pɛ Thãgba Kɔ̃tɩnɩ bonɩ ji para.
Nɩ n bɩrɛ dɩ na n waalna,
Gɩdonɩ a n tee anɩ bonɩsɔa',
A n tee nar dɩkharakɛ bã.
14 Nɩ n bulele aa: «Aɲe dɔ kɩrʋ ya fɛ?»
Gɩdonɩ Thãgba Kɔ̃tɩn kɔɔ dor yi tordaar nɛrɛ fɛw bɩɛlbɩɛla,
ntɛ na ɔɔ daɓolbir khɛraakɛ a fɩɩlnɩ,
Sɩrakɛ ɔr kɔɔ dʋɔn ɔɔ khukhu,
a dona ɔɔ nɔ bɩɛl ʋlfɛ khɛr.
15 Tɩɩ bɩɛllakɛ na cʋʋ thɩ̃ caale na kpɩɛra'.
Bɩɛl cʋɛ, sɩ mɔ̃ dɔ kɩrʋ ?
Gɩdonɩ məleekɛ Thãgba yɩnɩ a na haarɛ
a n yaal.a
Na n jɩɛ dʋ bʋrɛ anɩbarara,
Tibil na n fɩɩl ɔɔ daɓolbir khɛrra'.
16 Gɩdonɩ mɛr Thãgba Kɔ̃tɩn, kɛ dɔnɩ Ɩjɩrayɛlɩ Thãgba mɩ sor ayɩ :
Mɩ n laarɛ khɛr faarɛ
gɩdonɩ mɛr Thãgba Kɔ̃tɩn, kokenaa kɔ̃tɩn,
mɩ laarɛ tibilikɛ n bɩkhɩnɛnɩ,
Na n jɩɛ dʋ bʋrɛ anɩbarara,
Na n do tɩɩ fɩɩldara ga».
Thãgba na thɔnanɛ ɔɔ thɔ̃thɔn
17 Nɩ n vɔɔrɛ Thãgba Kɔ̃tɩn na anɩ thɩmɩɩsɔ,
sɩ nɛrɛ dɩ nɩ bir bule aa:
«Aɲera sɩ n vɔgʋʋ ya fɛ?»
Gɛr dʋɔn mɔ̃ nɩ n sonɩ aa:
«Tibilikɛ n cʋɛnɩ puure, ɔr n da Thãgba Kɔ̃tɩn haara !
Wa tibil casɔɔle, wɛr n daaraa!»
Agɩbo wo dɩ na n bule aa :
«Kana Thãgbaakɛra n kɩlɛnɩ kɩɩl telẽe ha?»