3
1 Nɩ hɩnɛ, mɛr Thãgba Kɔ̃tɩn, kokenaa kɔ̃tɩn sor ayɩ:Ma thʋɔn ɩ̃ thɔ̃thɔn a kɔɔ gbɛbɩ mɩ hʋɛ.
Liir dapaara,
Kɔ̃tɩnɩkɛra nɩ n pɩɛrnɩ na dã a na lõ ɔɔ fʋɔr cɔra.
Ɔr dʋɔn nɔ bɩɛl ʋlfɛ thɔ̃thɔnɩkɛra nɩ n ƴaalnɩ ka.
Nɩ yɩɛ a n ɩnɛ.
2 Sɩ amɛ hãale a na pɩɛr ɔɔ ɩ̃ wiilera?
Dɩ amɛ na punone na jɩɩl ɔbɔɔkɛ a na ɩnɩ ?
Gɩdonɩ a na hor phu dɔɔkɛ wɩ n hɩlnanɩ thɛ,
Na kẽkẽ cɔɔdaraa dakhɔ-sãfã.
3 A na toore kɩbɩ a hɩl dɛ bulo, a ti dɛ bulo pɩɩn a faa.
Thale a na phʋɔl Levɩɩ məlsɔ,
a na pɩɩn wɩ cacaca,
mɔ̃ wɩ n hɩlnɩ dɛ na dɛ bulo a ti pɩɩn a faa.
Dɩ mɛ̃ wa puno wa n ji mɛr Thãgba Kɔ̃tɩnna bonɩɛɛkɛ saranɩ.
4 Liir dɩphã Judaa məlsɔ na Jerujalɛmdaraa bonɩ na da
mɛr Thãgba Kɔ̃tɩnna mɔ̃kɛra gɩ n kɔɔ hanɩ mamara,
yɛnasɔraakɛ kɔɔ kanɩ.
5 Ma pɔr anɩ thɩ̃thɩɩn a na kɩɩlna nɩ,
Dɩ sidumodara ma kɔɔ yɩrna khə̃khə̃ a na pɛ war sor,
na bɔdɛl cʋʋdara,
Na wɩrɛ n ʋlfɛnɛnɩ sõso ʋlfɛrɛ,
Na wɩrɛ n hʋɔlɛnɩ thɔ̃darara awɩ lɩmɩna,
Na khikhɛrara, na khilə̃biirə,
Na wɩrɛ n cʋɛnɩ kpakpala puure,
Sɩ wa n ma ma'.
Mɛr Thãgba Kɔ̃tɩn, kokenaa kɔ̃tɩ̃, mɛr sɔ.
Bɩɛl yʋɔr ti thɩmɩɩr
6 Mɛr dʋɔn Thãgba Kɔ̃tɩn, ma n deba',
Nɛrɛ dakha do Jakɔbɩɩ məlsɔɔra waa sobɔra.
7 Nɩ lɩɛn sa faa ɩ̃ dɩɩrsɔ, anɩ thɩ kɔ̃tɩ̃sɔɔ kha,
Na kpaanɔa'. Nɩ kɛra ɩna mar, dɩ ma tee ner.
Mɛr Thãgba Kɔ̃tɩn, kokenaa kɔ̃tɩ̃, mɛr sɔ.
Sɩ nɛrɛ, nɩ bir na bule aa: «Sɩ kɛra a ɩna mɔ̃?»
8 Tibil na punone na yu mɛr Thãgba ya?
Sɩ nɩ n yu mer, sɩ nɛrɛ dɩ nɩ bir na bule aa:
«Aɲera sɩ yu fɩ wɔ?»
Sɩ nɩ n yu mer bɩɛl yʋɔrra na khaarda ti paar!
9 Nɩ 'lɛr sʋɔn,
gɩdonɩ nɛr caara biləni, nɩ n yu mer.
10 Nɩ gba bɩɛl yʋɔr fɛw a ɛna ɩ̃ thɩ̃ thɩɩn cɔra,
Gɩ do nɔɔ dɩkɔ na n hale ɩ̃ cɔ bɔɔ fɛw.
Nɩ jʋrɛ mɩ thale a hɩnɛ,
Mɛr Thãgba Kɔ̃tɩn, kokenaa kɔ̃tɩ̃ sɔ.
Ado ma khɛr ƴũu a ha nɩ bɔnana',
Ado ma bɔna nɩ dakha dɩɩ və̃vĩə ga, nɩ jɩ.
11 Ma pɩɛrɛ thɩ̃ɛsɔɔkɛ n khɔnɩ anɩ thɩ̃sɔ,
Gɩ do nɔɔ, wa n kʋɛ anɩ kokol thɩ̃sɔ bã.
Dɩ dɩvɛ̃ thɩrʋ na hale anɩ lɔɔ a na bo sɩɩra'.
Mɛr Thãgba Kɔ̃tɩn, kokenaa kɔ̃tɩ̃ sɔ.
12 Dɩ ca kpɩɩsɔ fɛw na n sor :
Nɩ dor tɩbɩlaakɛ hananɩ daw,
gɩdonɩ anɩ dɩ na dor dɩɩkɛ daanɛnɩ toorera.
Mɛr Thãgba Kɔ̃tɩn, kokenaa kɔ̃tɩ̃ sɔ.
Thãgba na nɩrɔrɛ ɔɔ fɩl sar dɩkhõo
13 Nɩ n mɩɩ marɛ thɩmɩɩ khena ka,
Mɛr Thãgba Kɔ̃tɩn sɔ,
Sɩ nɛrɛ dɩ nɩ bir bule aa:
«Aɲee thɩmɩɩ khe ca sɩ mɩɩ far ?»
14 Gɛr dʋɔn mɔ̃ nɩ n sonɩ aa: «Pɔy sɩ n do Thãgbaa thɔ̃.
Sɩ n cʋʋrɛ ɔɔ jɔfʋsɔ,
dɩ sɩ jal Thãgba Kɔ̃tɩn, kokenaa kɔ̃tɩ̃ɩ ƴɛbʋrɔ
a bɩɛl a khɩɩna, sɩ sa n 'lɛrɔ khora'.
15 Nɛnɛ̃ dɩphã sɩ yɩɛrɛ dɩɩ do wɩrɛ dɔnɩ i ƴaaldara,
wɛr n 'lɛ daw,
Dɩrakɛ wɩrɛ n cʋɛnɩ puure, wɛr n 'le fãga.
Wɩ n kpɛr Thãgba, sɩ thɩ̃ɛ na n cʋʋ wa'.»
16 Sɩ wɩrɛɛkɛ n maanɩ Thãgba Kɔ̃tɩn n mɩɩrɛ kha awɩha,
Dɩ Thãgba Kɔ̃tɩn pɛr nũu a nɩɛ.
Dɩ wɩ kherere sɛbɛ ɔɔ ƴɛbʋrɔ
a na n jɩna wɩrɛra n maanɩ
ɔr Thãgba Kɔ̃tɩn, dɩ wa n cʋnaa.
17 Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃, mɩ sor ayɩ:
«Ɔbɔɔkɛ ɩ̃ wi na phanɩ,
mɛr na hɩna wɩ, wɩ do ɩ̃da kpefɩ.
Dɩ ma bo na pɛ war,
Mɔ̃kɛ thɩrɛ n bonɩ a pɛ ɔɔ bikuunaakɛ n dʋɔnɛɛnɩ thɔma.
18 Dɩ na bire na yɩ lee paarɩkɛ hanɩle tɩɩ sarʋ na tɩɩ puu thɩ̃thɩɩn,
Na ʋrɛ n dʋɔnɩ thɔma Thãgbara,
Na ʋrɛ na n dʋɔraanɩ thɔma ga.
19 Hɩnɛ mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃ sor ayɩ:
«Wire hale n ɩnanɩ,
Wirera kpore a ho camã dɔɔ.
Dɩ i ƴaaldara fɛw,
Na wɩrɛ fɛʋʋkɛ n cʋɛnɩ puure na debire na ho kpɛɛrɛ.
Dɩ wireele na hɩ̃ wɛr cacaca,
Awɩ kpũkpũ na sɩrakɛ dɩ jɔ̃ kuru ga.
20 Sɩ nɛrkɛ wer n cɔ mɩnɩ,
Anɩ fɩl sar wi hale na phananɩ.
Dɩ ɔɔ caranakɛ na n kpɛɛrɛ khoo.
Dɩ na ther na n ubiri na daw,
Mɔ̃kɛ na bi khɔna n ubini.
21 A wireele phã,
Na saarɛ tɩɩ puunə,
Wɩ ho thookɛ hanɩ anɩ nɛ balɔ.
Mɛr Thãgba Kɔ̃tɩn, kokenaa kɔ̃tɩ̃ sɔ.
22 Na n jɛna jɔfʋ na dɩɩrɛ na fɩlɛɛkɛ
mɩ kɔɔ hanɩ ɩ̃ thɔ̃daar Mʋɩjɩ Orɛbɩ gɔ̃gʋɔna
dɩɩ do Ɩjɩrayɛl bɩsana fɛʋʋda.
23 Hɩnɛ, ma thɔ̃ narɛ ɩ̃ mɩmɩɩ Eli ɓo,
Agɩpɩ mɛr Thãgba Kɔ̃tɩnɩ wiilera n dã,
kɛ dɔnɩ wi kɔ̃tɩ̃ɩ ka, da n kʋ maar.
24 Dɩ a na cʋʋrɛ thɛ wa n 'likha na awɩ bɩsãsɔ,
A cʋʋ bɩsana wa n 'likha na awɩ thɩsɔ.
Dɩ mɛ̃ ma sɔ̃ dɩɩ a kʋɛa'.