Thãgba Kɔ̃tɩn na dor thɩɩ fɛw jamana
14
1 Thãgba Kɔ̃tɩnɩ wi n wɔrɔnɛ,Dɩ ga wiile, nɛr Jerujalɛmɩdara
Ca kpɩɩsɔ na tɩnɛnɛ anɩ lẽle thɩ̃sɔ
anɩ yiro.
2 Mɛr Thãgba Kɔ̃tɩn na kpar ca kpɩɩsɔ a na der
wɩ kena Jerujalɛmdara;
wa teere dɩɩ, wɩ khɩɩ thɩ̃ɛ cacaca cɔnasɔra;
wa fʋrɛ khɛra na fãga bɩɩ na phɩɩna.
Tɩbɩlaakɛ hanɩ dɩɩra, wa fʋlɛlɛ awɩ dakur na jalna dɩ kpɩɩra;
Sɩ wɩrɛ na sɛnɩ, na toore le dɩɩra.
3 Dɩ Thãgba Kɔ̃tɩn na ther
a na kena ca kpɩɩsɔɔle;
Dɩ a na kena wɛr mɔna
A n kɔɔ kenɩ kʋʋr koke bɔɔ.
4 Ga wirəəle, Thãgba Kɔ̃tɩn na jɩɩlɛ
Olɩvie gɔ̃gɔ̃ yʋɔ, kɛ hanɩ Jerujalɛmɩ ƴɛbʋrɔ
Wi phã paar,
Dɩ Olɩvie gɔ̃gʋɔn na phaan thɩ̃thɩɩn
a na tɩnɛ yeɲɔ.
Dɩ kõkor kɔ̃tɩ̃ɩ na hale wi phã paar gɩ jal gɩ thʋ wi lõ paar
Dɩ gɔ̃gɔ̃ ɓɛl bɩɛl na tɔ na bir ka wire na n jalnɩ
dɩ pɛ ɲɔ̃bɔɔ
ɓɛl bɩɛl n tɔ gɩ bir ka wire na n jalnɩ dɩ pɛ ɲɔ̃bɩlã.
5 Dɩ kõkor kɔ̃tɩ̃ paarɩlera na cana
gɩdonɩ ga jal na thʋ Asal.
Na car mɔ̃ thɩ jɩɩn kɔɔ donɩ nɔɔ
dɩ anɩ thɩ kɔ̃tɩ̃sɔ kɔɔ caalɛ
Juda jamana Ojɩasɩɩ bɔɔ
dɩ Thãgba Kɔ̃tɩn ɩ̃ Thãgba na ɩnɛ
na ɔɔ thɔ̃thɔ̃ thusɔ fɛʋʋkɛ n dʋɔnɛɛnɩ thɔma.
6 Ga wirəəle dahɩrɛ na hala'.
Ɩɩr na hale; ɲʋɔn na khʋrɛ na do gɩlasɩ.
7 Wireele na dor wireekɛ teroni a ha kpɩɩ
kɛ Thãgba Kɔ̃tɩn dɩbara jɩnɩ.
Dɩtɩnɛ na hale dɩ dɩwɩllʋʋ ga.
Dʋɔr birərərakɛ sɩ ga hɩrɛrɛ.
Dahɩrɛ haa ga do.
8 Dɩ ga wirəəle,
Ɲɔ bʋ kaar na hale a na khɛr Jerujalɛm dɩɩra.
Dɩ ga tɩnɛnɛ : ɲɔ ɩkha na cele ga n jal laɲɔ̃ khirera
ɩkha n cel ga n jal Mediterane laɲʋɔnna;
ga n cel bɔɔ fɛw obulolo na yuuro.
9 Ga wirəəle
Thãgba Kɔ̃tɩn na dʋɔn thɩɩ fɛw jamana
Ɔr dɩbara na dʋɔn Thãgbaakɛ wa n fʋɔrnɩ.
Dɩ ɔɔ I dɩbara tɩbɩla fɛw thɩɩra na n we.
10 Dɩ bənə fɛʋkɛ diəni Jerujalɛmna
na fire na do bə̃ fãasɔ,
gɩ fʋ Gebaakɛ hanɩ ka wire na n jalnɩ
dɩ pɛ ɲɔ̃bɔɔ gɩ dana Rimɔ̃ɔkɛ hanɩ
ka wire na n jalnɩ dɩ pɛ ɲɔ̃bɩlã,
sɩ Jerujalɛm dɩɩ n ha ƴũu,
Dɩ dɩɩra na fʋrɛ Bɛ̃jamɛ̃ɛ lõfonɔra
gɩ jal gɩ thʋ ka lõfonɔ tɩ̃ɩ kɔɔ hanɩ, go kɛr paar,
gɩ bir gɩ fʋ Hananeɛlɩ cɔ cocolnana gɩ jal
gɩ dã jamanaa dɩvɛ̃ be nã pa.
11 Dɩ tɩbɩla na toore Jerujalɛm dɩɩra.
Jerujalɛm dɩɩ na wɩɛl bã.
Tɩbɩla na toore na ha ɩɩ.
12 Sɩ wɩrɛ kɛnanɩ Jerujalɛmdara,
nɩ yɛ khookɛ Thãgba Kɔ̃tɩn na pɛ warnɩ:
Awɩ tomɩ na n hɩrɛ sɩ wa khi pa'
Awɩ yisɔ na hɩrɛ le yi bɩnɔ̃
Awɩ delɛ̃bi n hɩ le nʋɔra.
13 Ga wirəəle
Thãgba Kɔ̃tɩn na pɛ warɛ ma kɔ̃tɩ̃ɩ
Dɩ wa fire wa n ke kha awɩha
Ʋ na ɔɔ alãakha tibil.
14 Juda kona na ke kʋʋr a na pɛr Jerujalɛmɩna
Wa taarɛ dɩ khudaraa lẽlẽ thɩ̃sɔ fɛw
Dɩ wa khɩɩrɛ dɛ, na dɛ bulo, na kẽkena tə̃tə̃tə̃
15 Dɩ kho gɩrɛra fɔnɩ tɩbɩla
na fʋrɛ sodara nʋ̃sɔ fɛw:
gãgona na kũkə̃-gãgona, ɲɔɔmɛ̃sɔ na kũkənə,
nʋma fɛʋkɛ hanɩ le awɩ jɛw,
kho ca bɩɛlla na fɔ wɩ.
16 Dɩ ca kpɩɩ wɩrɛ kɔɔ kɛnanɩ Jerujalɛmdara
kɛ sɛnɩ na yire, wa n jal yɛna fɛw Jerujalɛm
wa n fʋɔr jamana, Thãgbaakɛ dɔnɩ kokenaa kɔ̃tɩ̃.
wa n cʋʋna wa too fɛtɩ
17 Dɩ ado ca ɩkha hale
wa jal Jerujalɛm a fʋɔr jamanaakɛ dɔnɩ
Thãgbaakɛ dɔnɩ kokenaa kɔ̃ta',
thãgba ɲʋɔn na dã awɩ dʋɔa'.
18 Ado Ejipitidara bo, wa jal
Jerujalɛm wɩ cʋʋ wa too fɛta'
gɩrɛ na dananɩ ca wɩrɛɛkɛ na jalana',
gɛrra na dana wɩ,
thãgba ɲʋɔn na dã awɩ dʋɔa'.
19 Gɛr na dʋɔn gɩrɛ na dananɩ
Ejipitidara na ca wɩrɛ na jalanɩ Jerujalɛm
wa too fɛtɩrala'.
20 Dɩ ga wirəəle
dẽgelẽbeekɛ hanɩ gãgʋʋsɔɔra
na hananɛ khereneekɛ n sɔnɩ :
"Thãgba Kɔ̃tɩn hɩna"
Dɩ bʋlaasɔɔkɛ hanɩ Thãgba Kɔ̃tɩnɩ fʋɔr cɔra
na n sãasɩrɛ gɩ ho gborminəəkɛ wɩ n jɛbɩnanɩ tɔmɩn
kɛ hanɩ bonɩ ji pa ƴɛbʋrɔ.
21 Bʋlaasɔɔ fɛw Jerujalɛm na Juda dɩɩra na dor
Thãgba Kɔ̃tɩn kokenaa kɔ̃tɩ̃ɩda.
Dɩ wɩrɛ fɛʋʋkɛ na n jeni bonɩɛsɔ
na n gbaar wa n thɩɩna nʋ̃ʋ.
Ga wirəəle,
ƴaƴaba na hale Thãgba Kɔ̃tɩn
kokenaa kɔ̃tɩ̃ɩ cɔa'.