Thãgba fʋɔr cɔ phaa na ɓʋɔn na jɔ cacadaa
2
1 Darɩyusɩɩkɛ dɔnɩ Pɛrsɩ jamana ɔɔ balaɲɔ yɩɛrɩ ɲɛ̃be makoɲɔ sɩporɩ wire kpelẽ bɩɛla, gɛr Thãgba Kɔ̃tɩn thɔna ɔɔ mɩmɩɩ Aje ɔɔ thɩmɩɩ ayɩ:2 «Sɔ Seasɩɛlɩ bikuun Jorobabɛlla, kɛ dɔnɩ gobanɛr Judaa məlsɔɔra, na Yosadakɩɩ bikuun Jojuera, kɛ dɔnɩ gbõdaar, na wɩrɛraakɛ sɛnɩ ayɛ:
3 "Nɛrkɛ sɛnɩ na yire,
amɛ hãale anɩ thɩ̃thɩɩn,
kɛ jɛnanɩ mɔ̃ Thãgbaa caca cɔ kɔɔ ɓɔnɩ?
Sɩ mɔ̃ nɩ yɩɩ nɛnɛ̃ dɩ ha nar?
Na n gbaa nɛnɛ̃ dɩ ho nar mɔlɔ thɩ̃ɛa?"
4 Gɛr gɩ mɛr Thãgba Kɔ̃tɩn mɩ sor :
'Hanana 'lar Jorobabɛl,
Hanana 'lar Jojue, Yehosadakɩɩ bikuun, kɛ dɔnɩ gbõdaar,
Nɛr dɩdara fɛw nɩ hanana 'lar,
Nɩ pɩɛr ɲɛ̃ɛ thɔmana,
Gɩdonɩ mɩ har kha na nɛrɛ,
Mɛr Thãgba Kɔ̃tɩ̃, kokenaa kɔ̃tɩ̃, mɛr sɔ.
5 Mɔna mɩ kɔɔ ʋlfɛna nɩnɩ,
ɔbɔɔkɛ nɩ kɔɔ thenɩ Ejipiti dɩɩra,
Ɩ̃ Thu hale anɩ thɩ̃thɩɩn,
na n do maar n fʋ na'.
6 Gɩdonɩ mɛr Thãgba Kɔ̃tɩn, kokenaa kɔ̃tɩ̃ sɔ:
Kɩɛr na bɔɔ gbe fɩɩʋ wo, ga pʋɔra',
Ma bire na cʋʋ thãgbara ƴũu na thɩɩ dɩ ga jẽ,
na laɲʋɔn na thɩ khɩɩ.
7 Ma tutuore ca kpɩɩsɔ fɛw,
Dɩ awɩ thɩ̃ ɓɔ̃sɔ fɛw na ɩnɛ kɩɛr,
Dɩ ma cʋʋrɛ ɩ̃ cɔɔkɛ a ɓɔ̃ na sobɔr.
Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃ sɔ.
8 Gɩdonɩ mɛr hɩna dɛ bulo,
Mɛrra hɩna dɛ dakha,
Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃, mɛr sɔ.
9 Ɩ̃ cɔ phaakɛ na ɓʋɔn a na jɔ cacadaa fĩi,
Mɛr Thãgba Kɔ̃tɩn, kokenaa kɔ̃tɩ̃, mɛr sɔ.
Dɩ ma cʋʋrɛ paarɩkɛ n do ha ie 'lɛ paar,
Mɛr Thãgba Kɔ̃tɩn, kokenaa kɔ̃tɩ̃, mɛr sɔ.»
Nũ nɩɩr n 'laanɛ bɔnanɛ
10 Ɔbɔɔkɛ Darɩyusɩ donɩ jamana ɔɔ balaɲɔ yɩɛrɩ ɲɛ̃be yʋɔr phe bire sɩporɩ wire kpelẽ yenana, gɛr Thãgba Kɔ̃tɩn mɩɩna ɔɔ mɩmɩɩ Aje ayɩ:
11 «Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃ sor ayɩ: Mɩ n bɩɛl fɛr, bulene bonɩ jidara wɔɔ: 12 «Ado tibil puro nʋ̃ sãasɩna ɔɔ kẽkẽ nɔra, sɩ dɩ ɔɔ kẽkena tha thɩɛna, a burura gɩ ya, a diko bɩnanɛ gɩ ya, a dɩvɛna gɩ ya, a niinə gɩ ya, agɩborakɛ dikor wo dikora, dikorɩle na sãasɩrɛ dakha ya?» Dɩ bonɩ jidara birse : «Ooho ga sãasa' !»
13 Dɩ Aje bir bule : «Sɩ ado tibilikɛ thaanɩ khirera a lɩ thar thɩ̃ɛsɔraalera, ga kʋɛrɛ ya, ga kʋɛa'?» Dɩ bonɩ jidara sʋʋraa aa: «Ga kʋɛrɛ ! »
14 Dɩ Aje bir so aa:
«Mɛna gɩ ha na tɩbɩlaakɛ,
Mɛna gɩ ha na ca kpɩɩsɔɔkɛ hanɩ dɩɩraakɛ.
Mɛr Thãgba Kɔ̃tɩn, mɛr sɔ.
Dɩ mɛna gɩ ha dakha na awɩ thɩ̃sɔ fɛʋkɛ wɩ n cʋʋnɩ.
Gɩrɛ fɛʋʋkɛ wɩ n jinə marnɩ bonɩɛ, thɩ̃ kʋɛ gɩ.
15 Nɛnɛ̃ɛkɛ, mɔ̃ mɛr Thãgba Kɔ̃tɩnɩ fʋɔr cɔ mɩ thɔma na fʋnɩ pɩ,
dɩ wɩ gba ʋ̃ʋ boka a dɛ̃ ʋ̃ʋ bokara pa', mɔ̃ thɩ̃ɛ kɔɔ ha?
Nɩ kpɩɛrɛ bɔɔbɔɔ a hɩnɛ mɔ̃ thɩ̃ɛ na hanɩ
a fʋna nĩikɛ na bɔɔsɔɔkɛ na kpaanɛnɩ.
16 Cacara, a tibil gbũ thʋʋnɔ ɩnɩ n thɩ̃ɛ thɩ̃ nʋɔ kpelẽ,
dɩɩ do thɩ̃ nʋɔ yʋɔr dɩbara hãale.
A tibil jal dɩvɛ̃ ti paar ɩnɩ n ti thɩ̃ nʋɔ kpalaɲɔ yʋɔr (50),
dɩɩ do thɩ̃ nʋɔ kpelẽ (20) dɩbara hãale bɩlãkpʋʋna.
17 Mɩ kʋɛrɛ anɩ ɲɛ̃ thɩ̃sɔ fɛw,
mɩ kɔɔ pɛrɛ jʋ khi khoo na thɩ̃ phɩ̃ jɛ khoo anɩ kokol thɩ̃sɔɔra fɛw,
mɩ cʋʋrɛ thãgba bara dɩɩ jɛ anɩ lɛ thɩ̃sɔɔra.
Sɩrakɛ na kɛr ɩ̃ mɛrɛra ga,
Mɛr Thãgba Kɔ̃tɩn, mɛr sɔ.
18 Nɩ kpɩɛrɛ a hɩnɛ mɔ̃ thɩ̃ɛ na hanɩ
a fʋna nĩikɛ na bɔɔsɔɔkɛ na kpaanɛnɩ.
A fʋna nĩikɛ yɩɛrɩ ɲɛ̃be yʋɔr phe bire sɩporɩ wire kpelẽ yenana,
kɛ dɔnɩ wireekɛ mɛr Thãgba Kɔ̃tɩnɩ fʋɔr cɔ go ko kpɛɛnɩ,
Na n kpɩɛrna gɩ bɔɔbɔɔ dɛ!
19 Thɩ̃ be na pɩ thʋʋnɔsɔ fɛw gaa?
Dɩvɛ̃ thɩrarakɛ na fɩgɩ thɩra na girenaadɩ thɩra
na olɩvɩ thɩra bʋʋrɛ sɩɩr fɛw.
Sɩ a fʋna nĩikɛ, ma ha nɛr bɔnanɛ.»
Thãgba ʋlfɛnanɛ Jorobabɛlɩkɛ a phiirni
20 Dɩ sɩporɩ wire kpelẽ yenana,
Thãgba Kɔ̃tɩn bire mɩɩna Aje thaa wo balaɲɔdaa, a sʋʋraa aa:
21 Sɔ Jorobabɛllaakɛ dɔnɩ gobanɛr Judaa məlsɔɔra
ayɛ wɔɔ: «Ma cʋʋrɛ thãgbara ƴũu na thɩɩ dɩ ga jẽ.
22 Ma tʋɔrɛ jamanasɔ awɩ jamana too parara na sumo,
Ma bũburone fãgaakɛra ca kpɩɩsɔɔ jamana dɩsɔ hananɩ.
Ma tɔr koke hotoro na sumo na wɩrɛ fɛʋʋkɛ lonaanɩ.
Ma tʋɔrɛ gãgona na kpɛɛlɛ thɩɩra,
dɩ wɩrɛ jʋʋnɛ wɩnɩ na kʋʋrɛ kha awɩha.
23 Mɛr Thãgba Kɔ̃tɩn, kokenaa kɔ̃tɩ̃ mɛr sɔ,
ga wiile, fɛr Jorobabɛl, Seasɩɛlɩ bikuun, kɛ dɔnɩ ɩ̃ thɔ̃daar,
mɛr Thãgba Kɔ̃tɩn, mɛr sɔ,
ma gba fɛr fɩ ho mar jẽ dʋdaaa ɩ̃ ɲɔ̃kɔɔ.
Gɩdonɩ fɛr mɩ phiir.
Mɛr Thãgba Kɔ̃tɩn, kokenaa kɔ̃tɩ̃, mɛr sɔ.