SOFONƖƖ SƐBƐ
Sorɩɩkɛ Judaa məlsɔ na Jerujalɛmdara na 'lɛnɩ awɩ puu cʋʋra.
1
1 Gɩrɛ dʋɔn Thãgba Kɔ̃tɩnɩ thɩmɩɩkɛ a hanɩ Sofonɩ ɔbɔɔkɛ Jojɩasɩɩkɛ dɔnɩ Amɔ̃ɔ bikuun kɔɔ donɩ Judaa məlsɔɔ jamana. Sofonɩna dʋɔn Kusii bikuun dɩ Kusi do Gedalɩaa bikuun dɩ Gedalɩa do Amarɩaa bikuun dɩ Amarɩa do Ejekɩasɩɩ bikuun.2 Mɛr Thãgba Kɔ̃tɩn, mɩ sor :
Ma bũburone thɩ̃ɛ fɛw thɩɩra a na ti.
3 Ma bũburone tɩbɩla na nʋma,
'Lominə ƴũu na thʋma laɲʋɔnɔ,
Ɩ̃ bũburõ nɛ baradaasɔ na tɩɩ puunə.
Ma bũburone tɩɩ ye dɩ wa hɛllɔ thɩɩra,
Mɛr Thãgba Kɔ̃tɩn, mɛr sɔ.
4 Ma ɩɩrnanɛ Judaa məlsɔ,
Na Jerujalɛmdara fɛw.
Ma bũburone Baalɩ fʋɔr thɩ̃bisɔɔkɛ
sɛnɩ kɩɛr paarɩkɛ dɩ ga hɛllɔ,
Ɩ̃ bũburonə ɔɔ thɔ̃darasɔɔ i,
Ɩ̃ bũburonə bonɩ jidara.
5 Ma bũburone wɩrɛɛkɛ n gburõkhuneni
awɩ nãsʋrɔsɔ dɩ wa n fʋɔr
wire na sɩpor na ƴepələ̃be
kɛ dɔnɩ ƴũu kokena,
Na wɩrɛɛkɛ n gburõkhunenɩ
dɩ wɩ fʋɔr mɛr Thãgba Kɔ̃tɩnɩ,
Sɩ dɩ wɩ bir wo a ʋlfɛ na wena Molɔkɩɩai.
6 Ma bũburone wɩrɛɛkɛ feni khiru a pɛ mɛr Thãgba Kɔ̃tɩnna,
Kɛ na n ƴaalɛ mɩna',
dɩ wa n therna ma'.
Thãgba Kɔ̃tɩnɩ wi
7 Nɩ ɩa nʋɔ Kɔ̃tɩnɩkɛ dɔnɩ Thãgba Kɔ̃tɩnɩ ƴɛra!
Gɩdonɩ Thãgba Kɔ̃tɩnɩ wi wɔrɔnɛ.
Thãgba Kɔ̃tɩn gbɛbɩrɛ bonɩɛ,
A phʋɔlɛ wɩrɛ a wenɩ pɩ.
8 Bonɩ ji wireele, mɛr Thãgba Kɔ̃tɩn,
Ma pɛr nũfesɔɔra sor nakha jamanaa bikũusɔɔra,
Na wɩrɛ fɛʋraakɛ n tʋɔnɩ kẽkena ca kpɩɩsɔɔ kha.
9 Ga wiile, tibil wo tibilikɛ n bɩnanɩ lõfonɔ sa paar dɩ kãasɩb, ma pɩɛraarɛ sor,
Na wɩrɛra fɛʋkɛ n taganɩ thɩ̃ɛ na bɩkhɩɩrɛ na fɩɩlɛ a hi awɩ kɔ̃tɩ̃ɩ cɔ.
10 Ga wiile, mɛr Thãgba Kɔ̃tɩn sɔ,
hulẽbe na n ther lõfonʋɔraakɛ wɩ n wenɩ Thʋ̃ lõfonʋɔɔ billo,
benɩɛ na n the balaɲɔ dɩ seeroc,
dɩ nɔ khena na hale gɔ̃gɔ̃ bi yʋɔsɔ a na kɔ̃tɩ̃ na ka.
11 Na n bɛ, nɛrɛɛkɛ hanɩ Makɩtɛsɩ seerod;
Gɩdonɩ ƴayaba fɛw thiire,
Mũsũdara fɛw bũburone.
12 Ga bɔɔle, ma wɩɛsɩrɛ Jerujalɛm dɩɩ na dɔ carãa,
Dɩ wɩrɛ fɛʋkɛ hananɩ tu jɩɩr awɩbarara,
kɛ n sɔnɩ awɩ hara aa,
mɛr Thãgba Kɔ̃tɩn na n cʋʋ nar thɩ̃ɛa',
ma hẽe wer sor.
13 Wa khɩɩrɛ awɩ lẽle thɩ̃sɔ,
wɩ kʋɛna awɩ cɔsɔ.
Wɩ mɩrɛ cɔna wer, sɩ wa 'lɛ gɩ na cɔrɔa',
Wɩ kʋʋlɛ dɩvɛ̃ thɩr lɩɛ, sɩ wa 'lɛ dɩvɛ̃ a na ɲɔa'.
14 Thãgba Kɔ̃tɩnɩ wi kɔ̃tɩ̃ n wɔrɔnɛ,
A n wɔrɔnɛ dapaara na phananɛ.
Ma kʋ hulẽbi khena na n ther Thãgba Kɔ̃tɩnɩ wirəəle.
Dɩ ʋrɛ dɔnɩnakɛ kuun khaa,
na ha nʋɔ na pɛr a na khɩɩ.
15 Wireele na dor nĩkhi khe wire.
A na dor ha hel wire na bɔgaar wire,
A na dor kʋɛ wire na bũburõ wire,
A na dor wi birə na dabirə wire,
A dona ndɔlɔ̃pa wire na dabirə kɔ̃tɩ̃ wire.
16 Wire gɩɩkɛ wa n ʋnɩ tutuu,
wa n bena ko hulẽbi khena.
Wa sɔbɩrɛ dɩɩsɔɔkɛ gʋʋ diironi,
kɛ hananɩ bɛbɛr gbanasɔ ƴũu.
17 Ma tor tɩbɩla ha hellela;
wa n bəəre yaar khaa,
gɩdonɩ wɩ cʋʋrɛ sopuu mɛr Thãgba Kɔ̃tɩnna.
Awɩ tɔmɩn na hor thɩlãkobe a na gba paar fɛw.
Awɩ khisɔ n ho sɔ̃sʋɔnɛ.
18 Awɩ mũsũ na awɩ dɛ na puno na taa wɩ Thãgba Kɔ̃tɩnɩ nĩkhi wi kɔ̃tɩnna ga.
Ɔɔ gbugi nĩkhiikɛ hɔnɩ dɔɔ na hɩnɛ thɩɩ fɛw.
Dɩ thɩ̃ kʋɛrɛ ga do, kɛ na puuronɩ na sobɔr, ga n kʋ maar,
Gɩdonɩ a na bũburone tɩbɩla fɛw thɩɩra.