Thãgba ƴaalɛ tɩbɩla n kɛra nar
2
1 Nɩ kpa jɛ a kpɩɛrɛ hɩnɛ,Nɛr caarɩkɛra dɔnɩ yi khedara,
2 Ɔbɔɔkɛ kpɩɛrɛ na gbanɩ anɩdara pa',
Dɩ wireele na pho pɩ mɔ̃ jɩɛ n gbanɩ hɔ̃ phɩɩna',
Dɩ Thãgba Kɔ̃tɩnɩ nĩkhi kheele na ɩɩr nar pa',
Dɩ Thãgba Kɔ̃tɩnɩ nĩkhi wirə na phã nar pa'.
3 Na n ƴaalɛ Thãgba Kɔ̃tɩn, nɛrɛ fɛʋkɛ dɔnɩ dɩbara wurdara dɩɩra,
Kɛ dɔnɩ wɩrɛ n cʋɛraanɩ dasarʋ.
Na n cʋɛ fɩl sarʋ, nɩ hanana hɛlɛlɛ fɩlɛ,
Agakpaan na 'lɛr phi paar Thãgba Kɔ̃tɩnɩ nĩkhi wirə.
Gɩrɛ na dananɩ ca kpɩɩsɔɔkɛ hanɩ wi lõ paar.
4 Gaja dɩɩ na ber,
Asɩkalɔ̃ dɩɩ na kpolole,
Asɩdɔdɩdara, wa weele wer ʋlkhɔ gbãgbeelena,
Ekʋrɔ̃ dɩɩ, wa wɩɛlʋlɛ.
5 Ga puu narɛ, nɛrkɛ tɔɔnɩ laɲɔ̃ nʋɔra,
Caarɩkɛ thɛnɩ Kɩrɛtɩ dɩɩra,
Gɩdonɩ Thãgba Kɔ̃tɩn ɩɩrna nɛr thɩmɩɩr.
Fɛr Kanãakɛ dɔnɩ Fɩlɩsɩtɛ̃sɔɔ dɩ,
Ma cʋʋ fɛr foo tɩɩ 'leere n kpolo fɩ.
6 Laɲɔ̃ bəən na debire na do nʋ̃ khʋʋl paar,
Na nʋ̃ khɛɛ too pa,
Na nʋ̃ yɩrasɔɔ cɔ pa.
7 Laɲɔ̃ bəənilera, Judaa məl wɩrɛ na sɛnɩ na yire, wɛr na hɩna.
Dɩ le wa jalna awɩ nʋ̃sɔɔ wa n khe; a dɩɩ dʋɔr wɩ lõ Asɩkalɔ̃ cɔnanɔ wa n cɔ,
Gɩdonɩ Thãgba Kɔ̃tɩnɩkɛ dɔnɩ awɩ Thãgba na teere na pɛ war.
A na cʋʋrɛ thɩ̃ɛ gɩ bir gɩ fi gɩ ha mɔ̃kɛra gɩ kɔɔ hanɩ fʋ paar.
Gɩrɛ na dananɩ ca kpɩɩsɔɔkɛ hanɩ wi phã paar
8 Mɩ nɩɛrɛ mɔ̃ Moabɩdara n nɩɩrnɩ ɩ̃ too, na mɔ̃ Amɔ̃ɔ məlsɔ n maan wɩnɩ.
Wɩ taarɛ ɩ̃ too bə̃ a ɓã awɩ dɩra dɩɩ kɔ̃tɩ̃.
9 Gɛr gɩ mɛr yi hɩ̃daar, mɛr Thãgba Kɔ̃tɩn, kokenaa kɔ̃tɩ̃, kɛ dɔnɩ Ɩjɩrayɛlɩ Thãgba, mɩ sor ayɩ:
Moabɩ dɩɩ na kʋɛrɛ mɔ̃ Sodɔm dɩɩ kʋɛnɩ,
Amɔ̃ɔ məlsɔɔ dɩ n kʋɛ mɔ̃ Gomɔɔr dɩɩ kʋɛnɩ.
Uu na phure awɩ dʋɔ fɛw,
Laan na teere paar, dɩ dɩɩ na kpolo khorr vʋ̃ʋ.
Ɩ̃ tookɛ na sɛnɩ na yire na khɩɩrɛ awɩ thɩ̃,
Ɩ̃ caakɛ na sɛnɩ na yire, wɛr na gbaan awɩ dɩ.
10 Gɛr na dʋɔn lɩmɩnɛɛkɛ wa 'lɛnɩ awɩ I ƴaalala,
Gɩdonɩ wɩ kɔɔ nɩɩrɛ tɩbɩlaakɛ Thãgba Kɔ̃tɩn, kokenaa kɔ̃tɩ̃ hɩnɩ,
A taana awɩ bə̃ a ɓã awɩ dɩra dɩɩ kɔ̃tɩ̃.
11 Thãgba Kɔ̃tɩn na kʋ wɛr maar na sobɔr,
Ɔbɔɔkɛ a na bũburonɩ thɩɩkɛɛ thãgbasɔ fɛw.
Ga bɔɔle, tɩbɩla fɛw bɩɛlbɩɛl na gburõkhure ɔɔ ƴɛbʋrɔ wa n fʋɔrʋ, ntɛ le ɔɔ thɛthɛɛ dʋɔ,
Na ca wɩrɛ hanɩnakɛ ɲɔ dɩɩsɔɔra ƴɔɔ fĩi.
Gɩrɛ na dananɩ ca kpɩɩsɔɔkɛ hanɩ ka wire n phanɩ dɩ pɛ ɲɔ̃bɩlã
12 Nɛr Etiopidara dakha,
Ɩ̃ bajɩna na kʋrɛnɩ kʋʋrra.
Gɩrɛ na dananɩ ca kpɩɩsɔɔkɛ hanɩ ka wire n phanɩ dɩ pɛ ɲɔ̃bɔɔ
13 Kɔ̃tɩn na kɛrɛ dakha na ee ka wire na n jalnɩ dɩ pɛ ɲɔ̃bɔɔ,
A na kʋɛ Asiri dɩɩ.
A na kpolole Nɩnɩvɩ dɩɩ
a khɩ phɩphɩphɩ a fi a do bə̃ kparaa.
14 Nʋmaakɛ na n cʋɔnɩ le ɔɔ bɩnɔ,
Nʋ̃ caarsɔ dɩɩdɩɩ fɛw wa do.
Mɩɩr thʋ̃kpɩlasɔ narakɛ namuusɔ
na n cɔ le ɔɔ go kpũsɔɔra;
'Lomĩ khɩɩrɛ na n ther fɛnɛtɩrɩsɔɔra.
A na kpolole a na thena lõfonʋɔra ɓoɓo,
Gɩdonɩ wa haalɛ sɛɛdɩrɩ kparɛsɔ a na tiir fɛw.
15 Nɩnɩvɩ dɩɩrra ha ole thale,
ɔrkɛ kɔɔ henənɩ daw,
Dɩ dɩdara too na ha ɩɩ,
Dɩ wa n so awɩ hara aa,
ɩnɛr gɩ dɩbara tibil na hale a ho na'.
Dɩ mɔ̃ a cʋʋ sa kpolo thaa,
a debi do nʋmaa cɔ pa?
Tibil wo tibilikɛ na kananɩ le,
a na kher yaya na pɩɛraa a na n sona 'lẽlerẽ.