HABAKUKII SƐBƐ
1
1 Hɩnɛ gɩrɛ dʋɔnɩ thɩmɩɩr khɩɩkɛ Thãgbaa mɩmɩɩ Habakuki nɩɛnɩ thɩ̃ yɩrra.Habakuki n hulene Thãgbara puureedara
2 Thãgba Kɔ̃tɩn ya,
bɔɔ yemɔ̃ ma hulẽ a na bɩɛlna far bulle na dana,
sɩ fɩ nɩɛr?
Mɩ n hulẽ farɛ ayɩ: Bɩkhɩrɛ karrɛ dɩɩra!
Sɩ pɔy fa n 'laa taara'.
3 Aɲe gɩ dɩ fɩ cʋʋ mɩ ma n yɛ puure,
Aɲe gɩ dɩ fɩ tu bɩkhɩrɛ na n cʋɛ afɩ yiro ?
Paar fɛw, tɩɩ hʋɔlɛ he na bɩkhɩrɛ ɩ̃ ƴɛra.
kɩlasɔ n hale dɩ thʋ̃kha thʋ̃ kar.
4 Gɛr dɔ nɔɔ dɩ jɔfʋ kʋkʋʋl,
Dɩ hʋ hananɛ na n taa bʋɔ 'lo bã.
Tɩɩ puu n phʋʋnɛ tɩɩ sarʋ,
Gɛr gɩ gõgolõ kɩɩlɛ thʋ̃ kar.
Tuurɩkɛ Thãgba hanɩ Habakuki
5 Nɩ hɩnɛ! Nɩ yɛ pal ca kpɩɩsɔɔra,
Na yɩrɛ thɩ̃ phurona, nʋɔ n kpaa nɩ kpõkorõo !
Gɩdonɩ mɩ har ma n cʋʋ thɔ̃ bɩɛl anɩ bɔɔ,
Ado wa mɩɩ nɩ na pɛ gɩ haara'!
6 Hɩnɛ, mɛrɛ ma tire Kaldedara na pɛr,
Caar gɩɩkɛ kharanɩ, a hana fãga ka.
Wɛr, wɩ n kpaarɛ paar fɛw, a tagɩ bənəsɔɔkɛ wa hɩna'.
7 Caar gɩɩkɛ awɩda khɩɩrnɩ, dɩ wa n kʋ maar.
Wɛr thɛthɛ n thɩnɛ awɩ hʋ hana,
dɩ wɩ pɛrna awɩ thɛthɛɛ kɔ̃tɩɩn do dɩbara.
8 Awɩ gãgosɔ n car dɩ wɩ jɔ kpe,
Wɩ puurore a jɔ dʋɔr sɩɓɛlɛ̃ɛkɛ n cʋɔlɛnɩ.
Awɩ gãgodara ther ƴɔɔ dɩ wa n ɩ̃, dɩ wɩ ca dɩ wa n bɩna.
Wɩ n ɩnɛ awɩ sodarara a ho mɔ̃ sɩgbʋraa n yɩnɩ thɩ̃ɛ da n be a gba.
9 Wɛr ha wele fɛw n ɩnanɩ tɩɩ phʋ̃ʋ paar.
Ƴɛkʋʋlɔ wɩ ga ƴɩɛ dẽdẽdẽ dɩ wa n jal,
Wɩ khɩɩrɛ tɩbɩla tə̃tə̃tə̃ mɔ̃ gbalãkothɩn n hanɩ dɩ wɩ do dea.
10 Caar gɩ jamanasɔ na n kʋ wɩ maara',
Wa n thernanakɛ wɩrɛ dɔnɩ tɩɩ kɔ̃tɩna ga.
Dɩ bɛr gʋʋsɔ fɛw hor ɓol thɩ̃ɛ awɩ ƴɛra,
wɩ n kɔlɔ̃kɔɩrɛ thɩn go kɩrɔ, sɩ dɩ wɩ tee dɩ dɔɔ na fãga.
11 Thale wɩ n cʋʋ jɛ khaa sɩ dɩ wɩ kɛr jal,
Wɩ n cʋʋrɛ puure a kəəro dɩɩ do wɩ pɛrɛ dɩɩ awɩbarara,
Gɩdonɩ awɩ thɛthɛɛ fãga wɩ gba dɩɩ do awɩ thãgba.
Habakuki n waalɛ Thãgbara wo
12 Ga do fɛr kɔɔ hãale kɛkɛkɛ mamara a do Thãgba Kɔ̃tɩnaa ?
Ga do fɛr dɔ Thãgba phuu ɩ̃ Thãgba gaa ? Gɛr dɔ nɔɔ sa khiirə'.
Thãgba Kɔ̃tɩn, fɛr thɩnɛ caarɩkɛra fɩ gba wɩ fa n kɩɩlna sɩ.
Ɩ̃ nãabõ, fɛr cʋɛ wɩ fa n naarna sɩ.
13 Sɩ afɩ yisɔ phure jɔɔ ka puu hɩɩnɛna,
Fa puno na tu wa n hʋɔlɛ tɩbɩlala ga.
Sɩ mɔ̃ dɔ nɔɔ dɩ fɩ sɩrɔ tɩɩ fɩɩldara a na hɩɩn?
Mɔ̃ dɔ nɔɔ a tɩɩ puu fʋ ʋrɛ telenenɩ a jʋɔ a na kʋ,
dɩ fɩ pɩr bib sɩ na hɩɩn?
14 Fɩ gbaar tibil dɩ ho far mɔ̃ laɲɔ̃ thʋmɩ hanɩ,
Na thɩ̃ yɩrasɔɔkɛ na hananɩ kɔ̃tɩn dɩ thɔɔ wa'.
15 Kaldedara n fʋlɛlɛ tɩbɩla fɛw
mɔ̃ wɩ n fʋlɛnɩ thʋma na julẽ.
Wɩ n haal wɛr dɩ wɩ to awɩ jɔɔra dɩ wɩ thena,
Wɩ n khɩɩ wɛr na leesin.
Dɩ gɩ n dar warɛ dɩ wa n kãka.
16 Wɩ n jire bonɩɛ awɩ jɔɔra,
Dɩ wɩ n thii parfɛ̃ awɩ leesinna,
Gɩdonɩ gɛr n dɔ nɔɔ awɩ diko n donɩ dikor ɓʋɔn,
Dɩɩ daar a pho ka.
17 Gɩrɛ wɩ fʋlɛnɩ na awɩ jɔɔra wa deere sɩ wɩ bir wa n fʋlɛ 'lo,
Fa sɩ warɛ wa n kʋʋr ca kpɩɩsɔ bɔɔ fɛw,
sɩ bʋɔ na fʋ waa ya ?