2
1 Ma jɩɩlɛ ɩ̃ dɩ bɛr cɔ gbana ƴũu,Ma jɩɩlɛ dɩ bɛr go gbaana ƴũu ma n jʋʋr,
Dɩ ma hɩɩnɛ gɩrɛɛkɛ Thãgba na so marnɩ,
Gɩ do nɔɔ ɩ̃ jɩ gɩrɛɛkɛ ma birseenɩ ɩ̃ bɩɛlsɔɔra.
Ha pɛrɛra tɩɩ sarʋ na hana yire.
2 Dɩ Thãgba Kɔ̃tɩn birse mer ayɩ:
Kherene thɩ̃ yɩrɩlera,
Khera gɩ boka thelna phɛlɛsɔɔra gɩ hɩrɛ casɩ,
Gɩ do nɔɔ ʋrɛɛkɛ n hɩnɛ gɩnɩ, a puno a jɩ gɩ a hɩɩn bɔɔbɔɔ.
3 Gɩdonɩ bɔɔ haleekɛ pɩɛrnɩ, kɛ thɩ̃ yɩrɩlera na danɩ,
dɩ agɩ bɔra gɩ n pɩɛr,
Ga do sõsor ga.
Ado ga pʋɔrakɛ mɔ̃, sɩ na pɩɛrɛ gɩ,
Gɩdonɩ ga daan otirə, baalɛ na hala'.
4 Hɩnɛ, ʋrɛɛkɛ n kaanɩ ire, aa ha hʋ sarʋra ga,
Sɩ tɩɩ sarʋ na hananɛ yire gɩ do ɔɔ ha pɛ dɔ nɔɔ.
5 Dɩvɛ̃ n fɩɩlɛ waa vʋ̃ʋ,
A n cʋʋrɛ i ƴaaldaar aa n too cɔcɔa'.
Dɩ ha nʋɔ da n pɩɛrna a ho khĩdi dɩɩ, ga n dãa kpɩɩa'.
A honanɛ khir, aa n hi yuurəka'.
Gɛr gɩ dɩ haal ca kpɩɩsɔ da n pɛ ɔɔ pa,
Dɩ khɩɩ tɩbɩla dɩ der da n hʋɔlɔ.
6 Sɩ caarsɔɔlera fɛw na dʋɔ sokpaa dɩkhõo,
Wa n maanʋnɛ, wa n phiilenaa.
Wa n sor aa:
Ga puurore tibilləəkɛ n khɩanɩ lẽle thɩ̃ɛɛkɛ aa hɩna'.
Bɔɔ yemɔ̃ ga dã sɩ na pɩ ya fɛ̃ ?
Hel kɔ̃tɩ̃ɩ gɩ dɩ kur da n pɛ ɔɔbarara.
7 Sɩ aa jɩ dɩ ɔɔ heldarara na ɩɩrnaanɛ dapaara gaa koi!
Wɩrɛ na tutuoneenɩ na ɩɩraarɛ mɔ̃ tibil n jaanɩ daanɔ.
Dɩ a na fire na do awɩ lẽle thɩ̃!
8 Mɔna fɩ kɔɔ phʋʋnɩ ca kpɩɩsɔ dɩɩ thʋ̃ ka,
Mɛna tɩbɩlaakɛ sɛnɩ na phʋʋn fɩ dakha.
Gɩdonɩ fɩ kɔɔ deere tibil tɔmɩn,
A hʋɔl dɩɩsɔɔra,
Na dɩ kɔ̃tɩnasɔɔra na dʋɔdarara fɛw.
9 Ga puurore tibiləəkɛ n 'lɛnɩ lẽle thɩ̃ɛ na fɩlɛɛkɛ na teenanɩ kha ga da n mɩna ɔɔ cɔ !
Gɩ do nɔɔ ɔɔ too pa ho 'lomin tɩɛl le ƴũu pər, thɩlkɩɩr na n 'laa liirəə ga.
10 Ɔɔ cɔra a n pɛr yicuru.
Gɩdonɩ tɩɩ jɔjʋɔɔkɛra a kʋʋrnɩ, ɔɔbara a cʋʋ puure.
11 Gɩdonɩ bokanaakɛ hanɩnakɛ go pɩɛra na hulene wa n pɛ far,
Dɩ kparɛsɔɔkɛ dɔnɩ cɔ pə thɩra na 'laarɛ tuur na ha wɩ.
12 Ga puurore tibiləəkɛ n kʋʋrɛnɩ tɩbɩla dɩ mɩna dɩɩ,
Dɩ dee tɔmɩn dɩ kurnə dɩɩ.
13 Thãgba Kɔ̃tɩnɩkɛ dɔnɩ kokenaa kɔ̃tɩ̃, cʋɛ thɩ̃ɛ dɩɩ ha thakɛ :
Dɩ tɩbɩla na n do thɔma sɩɩdo dɔɔ n hɩna gɩ,
Dɩ caarsɔ na n vɔɔ sɩɩdo pɔy gɩ.
14 Gɩdonɩ dɩkhõo tɩbɩla fɛw thɩɩra
na yɩrɛ Thãgba Kɔ̃tɩnɩ i dʋbɩ,
kɛ heni thɩɩra,
Mɔ̃kɛ laɲɔ̃ kõkorʋ n hinəni ɲʋɔn.
15 Ga puurore tibiləəkɛ n cʋɛnɩ ɔɔ alãkha tibil dɩ ɲɔ taan,
kɛ ɲaɲaanɛnɩ taan dɩɩ khar a ho kpalʋ gɩ do nɔɔ a ɲɔ ga n kʋʋ a puno a hɩɩn ɔɔ sãɓɔlɔ̃!
16 Fɩ ka pɛr yicuru afɩbarara,
ga do i dʋbɩrɛ ga.
Fɛrɛ dakha, ɲɔ 'lɛ hɩnɛ, a nɛna afɩ sãɓɔlɔ̃ dakha fer!
Thãgba Kɔ̃tɩnɩ thɛthɛ 'laa farɛ nɛnɛ̃ dɩphã ɔɔ nĩkhi ɲɔ̃kpobi na ɔɔ ɲɔ̃bɔ.
Afɩ i dʋbɩra bire fi a do far beesire!
17 Gɩdonɩ Lɩbã gɔ̃gɔ̃ thɩraakɛ fɩ bɩkhɩrɔnɩ ga kɛrɛ na hẽe fɩ,
Dɩ gɩrɛɛkɛ afɩ nʋsɔ kʋɛnɩ ga kʋ fɛr maar.
Gɩdonɩ fɩ kɔɔ deere tibil tɔmɩn,
A hʋɔl dɩɩsɔɔra,
Na dɩ kɔ̃tɩnasɔɔra na dʋɔdarara fɛw.
18 Aɲee bɔ ca thɩl buu n taa,
Dɩ ɲɛ̃ thɔ̃ jɩn na n thellʋ,
Aɲee bɔ ca thɩl buukɛ wɩ phebɩnɩ n taa?
Wɛr n dɔ nɔɔ dɩ tɩbɩla na n pɛr sõsor haar,
Dɩ ɲɛ̃ thɔ̃ jɩnɩɩkɛ thelaanɩnakɛ wo n pɩɛ haar,
Dɩ ba cʋʋrɔ sõso thãgbasɔɔkɛ na n punonenɩ dɩ wɩ mɩɩ thɩmɩa ga.
19 Ga puurore fɛrraakɛ n sɔnɩ dɔkurura aa: Ɩrɛ mɛ̃ lee!
Na boka khirira aa: Jaa daanɔ mɛ̃ lee!
A hananɛ punone na dɩɩrna tibil ya?
Ɔr haan ole wɩ kʋɛnɩ dɛ na dɛ bulo a callʋ pɔy,
Sɩ fesue na hale ɔɔ bɩnɔ fɩɩʋrakɛ a na haa yirə'.
20 Sɩ Thãgba Kɔ̃tɩn wer, a hale ɔɔ fʋɔr cɔ phurə, dɔ tɩbɩla fɛw thɩɩra n pɩr nʋɔ ɔɔ ƴɛbʋrɔ!