NAHUMƖƖ SƐBƐ
Thãgba Kɔ̃tɩn bɔrɛ sɩ a n kʋrɛ maar.
1
1 Thɩmɩɩr khɩɩkɛ na 'lenɩ Nɩnɩvɩ dɩɩ ha gɩrɛ. Thãgba mɩa Nahumɩkɛ thɛnɩ Ɛlkɔsɩ dɩɩra, thɩ̃ yɩrra, dɩ kherẽ pɛ sɛbɛraakɛ. 2 Thãgba Kɔ̃tɩn dʋɔn Thãgba gbugidaar; a n tiire helu.Thãgba Kɔ̃tɩn n tiire helu, ɔɔ nĩkhi puurore na sobɔr.
Thãgba Kɔ̃tɩn n tiire helu ɔɔ sodarara.
A n jɩnanɛ puureekɛ ɔɔ lãlaardara cʋʋnɩ.
3 Thãgba Kɔ̃tɩnɩ fãga wabɩrɛ,
Aa n gba nĩkhii kɔrɔa',
Sɩ a n pɛ dɩpadaara so.
Jɛkhur kɔ̃tɩ̃ɩ na thãgba jɛ kʋkʋʋlʋ dʋɔn ɔɔ hʋʋkɛ a n kananɩ,
Dɩ ndɔlɔ̃pana dʋɔn thɩlãkobeekɛ ɔɔ nɛ n banɩ.
4 A n phaanɛ laɲʋɔna dɩ laɲʋɔn n khɩ.
A n cʋʋrɛ mɩɩr ɲʋɔnsɔ fɛw dɩɩ ɩ,
A n cʋʋrɛ Basã bəən na karmɛl gɔ̃gɔ̃ bəən dɩɩ khɩ,
A n cʋʋrɛ thɩr faa dɩɩ ɔ̃'ɔɔlɔ̃ fɛw Lɩbã dɩɩra.
5 A n cʋʋrɛ gɔ̃gɔna dɩ ga n jẽ ɔɔ ka para,
Dɩ gɔ̃gɔ̃ biisɔ n yɩɩ.
Thɩɩ biləni n palɛ ɩɩr ɔɔ ƴɛra,
Dɩ dɩɩ na wɩrɛ haaranɩ dakha pal ɩɩr jɩɩl ɔɔ ƴɛra.
6 Amɛ na punone na jɩɩl ɔbɔɔkɛ a gbanɩ nĩkhii?
Amɛ na hãale na pɩɛr ɔɔ nĩkhirəəkɛ hɔnɩ dɔɔ?
Ɔɔ nĩkhi n bele dɔ khaa.
Nãabõ n cɔr ɔɔ ƴɛra sɩ da n ka.
7 Thãgba Kɔ̃tɩn bɔrɛ,
Wɔ̃ pa bʋɔ a do nɩwɛ wirera.
A n hɩɩnɛ wɩrɛ faaraanɩ awɩbara.
8 Sɩ ɲʋɔnɩkɛ na khanɩ a na gbʋma
gɛr a na kʋɛna Nɩnɩvɩ dɩɩ cacaca.
Dɩ a na weelele ɔɔ lãlaardara na jalna na pɛ dabirəra.
Thɩmɩɩrɩkɛ mɩanɩ Juda kɔ̃tɩnaadara
9 Aɲe nɩ n gʋʋr Thãgba Kɔ̃tɩnɩdara ?
Ɔr na bũburone anɩ lãlara fɛw cacaca.
Dɩ bɔ gaarɛ na bir na dɛbɩ balaɲɔ bã.
10 Adorakɛ wɩ ho uukɛ loni a papar,
Ado wɩ hi taan a ho wɩ hurore ɓɩbɩ,
Sɩ wa thiire fɛw, wa hɩnɛ mɔ̃kɛ hɔ̃ khɩna n hɩnɩ.
Thɩmɩɩrɩkɛ mɩanɩ Nɩnɩvɩ dɩɩdara
11 Fɛr Nɩnɩvɩ dɩɩ,
Afɩ pa tibilikɛ hananɩ kpɩɛr puu Thãgba Kɔ̃tɩnna the.
Tibil gɩɩkɛ dɔnɩ puu cʋʋ tibil.
Thɩmɩɩrɩkɛ mɩanɩ Judaa məlsɔɔdara
12 Gɛr gɩ Thãgba Kɔ̃tɩn sor Judaa məlsɔɔdara aa:
Adorakɛ awɩ too daan fɛw, dɩ wɩ jɔr a ha mɔ̃,
Sɩ wa bũburone a na pɩ fɛw.
Mɩ kɔɔ 'lũ ner wer, Judaa məlsɔ,
sɩ ma bir na 'lũ nɩ bã.
13 Nɛnɛ̃ɛkɛ, ma khaarɛ lãlarɩ kpeleekɛ a pɛ farnɩ fʋɔrɔ na faa.
Ma kuure lidaakɛ a linə fɩnɩ.
Thɩmɩɩrɩkɛ mɩanɩ Nɩnɩvɩdaraadara
14 Sɩ nɛr Nɩnɩvɩdara wer,
Yɛkɛ gɩrɛ Thãgba Kɔ̃tɩn sonɩ anɩdara:
Na bir na hana məlle wa n wena anɩ i bã.
Dɩ le anɩ thãgbasɔɔ cɔ,
ma tiire thɩlbi gɩrɛ nɩ thelnɩ
na thɩlbi gɩrɛ nɩ hɩlnɩ ther a cʋʋ.
Mɩ har ma n kpe anɩ kasɔ,
Gɩdonɩ na do bɔ taa thɩ̃ɛa'.