MISEE SƐBƐ
Thãgba Kɔ̃tɩn phaanɛ Ɩjɩrayɛldara na Juda bə̃dara
1
1 Gɩrɛ dɔ thɩmɩɩrɩkɛ Thãgba Kɔ̃tɩn mɩɩnɩ Mɩseekɛ thɛnɩ Moresɛtɩ dɩɩra bɔɔraakɛ Yotam na Akajɩ na Ejekɩasɩ donɩ Juda jamanasɔ. Thɩ̃ɛɛkɛ Thãgba nɩnaanɩ Samarɩ dɩɩ na Jerujalɛmdara gɩ.Thãgba Kɔ̃tɩn phaanɛ Ɩjɩrayɛldara
2 Nɛr caar fɛw, nɩ pɛ nũu!
Thɩɩ na gɩrɛɛkɛ n haaraanɩ,
Nɩ jɩɛ pɛ nũu!
Kɔ̃tɩn, Thãgba Kɔ̃tɩnɩkɛra thɛnɩ ɔɔ fʋɔr cɔ phurə da n ɩ̃
N dɔ yi torodaar anɩdara.
3 Hɩnɛ Thãgba Kɔ̃tɩn ɩɩrɛ ɔɔ cɔra da n the,
A n gbune, a n ɩɩrɛ gɔ̃gɔ̃ gbanana.
4 Gɔ̃gɔna n ɲɩɩrɛ ɔɔ nɛ balɔ,
Dɩ ɓɛlɛ̃sɔ na n kpɩɩle kora
Mɔ̃ thʋ khuul n hɩlnɩ dɔɔra,
Mɔ̃ ɲʋɔn n celnɩ gɔ̃gɔ̃ yʋɔ dɩ ga n gbũ.
5 Gele fɛw daan, gɩdonɩ Jakɔbɩɩ məlsɔ ɩɩrnanɛ lãʋ,
Gɩdonɩ Ɩjɩrayɛlɩ cɔdara cʋʋrɛ sopuu!
Amɛ wer n tɔ Jakɔbɩɩ toora dɩ pɛr lãʋna ?
Ga do Samarɩ dɩɩ gaa?
Amɛ wer n tɔ Juda bə̃darara dɩ pɛr dɩ wa n fʋɔr Thãgba kpɩɩsɔ?
Ga do Jerujalɛm gaa?
6 Ma cʋʋrɛ Samarɩ dɩɩ da do lɛ cii,
Ɩ̃ thelo dɩvɛ̃ thɩra.
Ma dʋʋrnanɛ ɔɔ bokasɔ dɩ ga kpuro na jiir ɓɛlɛnɔ,
Ma bũburone ɔɔ go kpɛɛsɔ.
7 Ma cʋɔrɛ ɔɔ thɩlbisɔ
Ɔɔ lɩmɩsɔɔkɛ a 'lɛnɩ kpɔ̃kpɔrɔ̃ thɔmana na hɩnɛ dɔɔra.
Dɩ ma khaarɛ ɔɔ thɩlsɔ fɛʋʋkɛ
Wɩ dɩnanɩ bɔdɛl cʋʋ mũsumo,
Gɩ debɩ gɩ do bɔdɛlaa lɩmɩda dakha.
8 Dɩ gɛr gɩ mɛr Mɩse, ma bɩrɛ ma n waalna,
Ma n ɩɩrɛ na nɛ biire na sãɓɔlɔ̃,
Ma n hulene hɔ̃ be khaa,
Ma n bɩrɛ mɔ̃ siwilə̃sɔ n bɩnɩ.
9 Gɩdonɩ Samarɩdaraa kho sɛ na do dakpɛɛna ga.
Gɩ ƴɛrɛ phaphapha a jal thʋ Juda bəən.
Gɩ thʋrɛ Thãgbaa too dɩ lõfonɔra,
A jal phaphapha a dã Jerujalɛm.
10 Na n mɩɩ gɩ Gatɩ dɩɩra ga.
Na n ba'!
Bɛtɩ-Leafɩra dɩɩra, nɩ je na kpũkpurone thɩlãkoberə.
11 Nɛr Safɩɩrdara yaa,
Nɩ gba hʋɛ na sãɓɔlɔ̃ na yicuru a na jala dɩ kpɩɩra.
Saanandara na 'la na the awɩ dʋɔa'.
Bɛtɩ-Haetɩsɛldara ha bɩɩra, wa puno a na bul nɩ bã.
12 Marɔtɩdara n jɩ̃ɩ awɩ thɛthɛɛdara,
Gɩdonɩ thɩlkɩɩrɩkɛ thɛnɩ Thãgba Kɔ̃tɩnɩ pa gbune a dã Jerujalɛm dɩ lõfonʋɔra.
13 Lakɩsɩdara yaa,
Nɩ pɛ hotorosɔ gãgonana!
Nɛr cʋɛ Sɩyɔ̃ dɩ bɔbʋɔ dɩ cʋʋ sopuu
Gɩdonɩ anɩ pa Ɩjɩrayɛlɩ cʋʋ pa puusɔ the.
14 Dɩ gɛr gɩ na leere kha na Moresɛtɩ-Gatɩdara;
Akɩjɩbɩ cɔna na dor ha kʋɛ paar
Ɩjɩrayɛl jamanasɔɔra.
15 Ma tɔr sodaar phaa na pɛ nar yaa, Maresadara;
Jamanasɔɔkɛ dɔnɩ Ɩjɩrayɛl I dʋbɩ, na jaal na wʋɔn Adulamɩ kaara.
16 Nɩ khaba yʋsuune;
Nɩ bela yʋʋsɔ,
Anɩ bikũusɔɔkɛ nɩ nanɩɩdara,
Nɩ bela yʋʋ pɔpɔpɔl a hɔ duun
Gɩdonɩ wɩ n jalna wɛr dɩ kpɩɩra wɩ hʋnɔna nɩ fĩi!