JONASƖƖ SƐBƐ
Thãgba thʋ̃ɔ Jonasɩ dɩ bo \ref Fãg 14.25; Jon 4.2; Khɩ 139.7-10.
1
1 Kuun bɩɛl gɩ da n do Jonasɩ; Amɩtayɩɩ bikuun gɩ. Wi bɩɛl Thãgba Kɔ̃tɩn sʋʋraarɛ: 2 «Jala dɩ kɔ̃tɩ̃ɩnaakɛ wɩ n weni Nɩnɩvɩ, a phaanaa; gɩdonɩ ɔɔ puu cʋʋra jʋʋnɛ a dã mɩ.» 3 Sɩ Jonasɩ ɩɩr a ca ɩnɩ n jal Tarsɩsɩ ɩnɩ n hʋnɔna Thãgba Kɔ̃tɩnɩ ƴɛ. Dɩ mɔ̃ a danɩ Jafa, a yɩrɛ batookɛ n jalanɩ Tarsɩsɩ. Dɩ a lɩmɩnɛ sa lõ ɩnɩ n jal na batodara Tarsɩsɩ, ɩnɩ n hʋnɔna Thãgba Kɔ̃tɩnɩ ƴɛ. 4 Sɩ Thãgba Kɔ̃tɩn cʋʋrɛ dɩ jɛ kɔ̃tɩ̃ɩ ɩɩr laɲʋɔnna. Dɩ mɔ̃ jɛ kɔ̃tɩ̃ɩle ɩɩrnɩ laɲʋɔnna, bato hor ga wɩɛlɛ. 5 Dɩ maar fʋlɛ batodara, dɩ wɛr fɛw na n hulẽ awɩ thãgbasɔɔra dɩɩdɩɩ, a tiirnǝ thɩ̃ɛsɔɔkɛ hanɩ batora a dʋʋrna laɲʋɔnnɔ sɩ gɩ haba. Sɩ Jonasɩ kɔɔ tɔr gbũ batora tɩɛr, a phɩ̃ daar khi kper. 6 Dɩ batodaraa kɔ̃tɩ̃ tɔr pɔ a sʋʋraa: «A! Mɔ̃gɩdo dɩ fer na n daar? Ɩrɛ hulene afɩ thãgbara, agakpaana' a na jɩ sɛr bʋɔra dɩ sa khiirǝ'.» 7 Dɩ batodara mɩɩrɛ kha ayɩ: «Sɩ lɛ lɩɩ a jɛ ntɛɛkɛ pɛ sarnɩ thɩlkɩɩrɩkɛ.» Dɩ wɩ lɩrɛ lɩɩ, dɩɩ fʋ Jonasɩ.8 Dɩ wɩ sʋʋraa: «Fɛr hana thɩlkɩɩrɩkɛ dɩɩ 'li sɩ. Amɛ ha fɩ? Ʋmɔ̃ɔ dʋɔ fɩ the? Aɲee ca ha fɩ? Aɲee thɔ̃ ca fɩ n cʋʋ?» 9 Dɩ birse wɩ: «Ebirǝ ha mɩ. Thãgba Kɔ̃tɩnɩkɛ dʋɔnɩ Thãgbaakɛ hanɩ ƴũu mɩ n fʋɔr, ʋrɛ teni laɲʋɔn na thɩɩ.» 10 Agɩpɩ a gbaar ɔɔda a mɩɛ wɩ. Dɩ ma kɔ̃tɩ̃ɩ fʋlɛ batodaraale mɔ̃ wɩ nɩɛnɩ dɩɩ do Thãgba Kɔ̃tɩnna a n ca. Dɩ wɩ sʋʋraa: «Aɲera fɩ cʋʋ thaa?» 11 Dɩ mɔ̃ laɲʋɔn n ubini sɩ dɩɩ jɩ ji na pɛr, wɩ buleele: «Mɔ̃ sa cʋʋ fɩ sɩ laɲʋɔn n jɩɩl sar cɔcɔcɔ?» 12 Dɩ birse wɩ: «Nɩ dɔna mɩ laɲʋɔnnɔ, laɲʋɔn na jɩɩl narɛ cɔcɔcɔ; gɩdonɩ mɩ jɩrɛ dɩ mɛr dɔ nɔɔ, dɩ thãgba jɛ kɔ̃tɩ̃ɩkɛ ɩɩr nar thaa.»
13 Sɩ konaale kɔɔ ƴaalɛ ɩnɩ n vɩrra na fãga bɩɩ a dana gẽgerẽ nʋɔ, sɩ wa punoǝ'; gɩdonɩ laɲʋɔn n ubire dɩ ga n jɩɩ pɛr.
14 Dɩ wɩ bɩɛlɛ Thãgba Kɔ̃tɩn ayɩ: «Thãgba Kɔ̃tɩn, sɩ n ƴɛɛ fɛr, fa n faa sɩ sɩ khiir gɩ do kuunikɛ dɔ nɔa'. Fa n tiir sar helu mɔ̃ sa dʋnanɩ kuunikɛ na cʋɛ sɩnɩ thɩ̃a', ɲʋɔnɔa', gɩdonɩ fɛr Thãgba Kɔ̃tɩn, gɩrɛ fɩ n ƴaalnɩ gɛr fɩ n cʋʋ. 15 Agɩpɩ wɩ gbaar Jonasɩ a dʋna laɲʋɔnnɔ; dɩ laɲʋɔnɩ nĩkhi cɩɩraa; dɩ jɩɩl dapaara cɔcɔcɔ. 16 Dɩ ma kɔ̃tɩ̃ɩ fʋlɛlɛ konaale ka Thãgba Kɔ̃tɩna, Dɩ wɩ kɔɔ jiirǝǝre bonɩɛ a sona awɩ bɩ̃ kpɩɛr.