ABƖDƖASƖƖ SƐBƐ
Thãgba Kɔ̃tɩn sor ɩna wɩɛlɛ Edɔ̃ dɩɩ \ref Jer 49.7-22
1
1 Yɛkɛ thɩ̃ nɩrɔrɛɛkɛ Kɔ̃tɩn, Thãgba Kɔ̃tɩn nɩnanɩ Abɩdɩasɩ Edɔ̃daraadara.Thãgba Kɔ̃tɩn thɔnanɛ tibil a sɔ ca kpalalala
ayɛ: "Nɩ ɩrɛ, sɩ jal
sɩ ke kʋʋr na Edɔ̃dara".
Thãgba Kɔ̃tɩn cʋʋ sɛr dɩ nɩɛ gaa thɩmɩɩ
2 Nɛr Edɔ̃dara,
Nɩ hɩnɛ ma cʋʋ nɛr dɩ na 'lũ
caar fɛw thɩ̃thɩɩn,
Wa ti ner a na jã.
3 Anɩ i ƴaal khe n fɩɩl nɛr,
Nɩ n cɔr boka kanana,
Anɩ cɔsɔ ha gɔ̃gʋɔna ƴũu.
Dɩ na n so anɩ hara
Amɛ na punone na ti nɩ na gbuno.
4 Adorakɛ nɩ jʋʋn ƴũu pǝr
sɩgbʋraa kha,
A nɩ tɛllakɛ anɩ tɛl ƴepǝlǝ̃bee thɩ̃thɩɩn,
Sɩ ma ti ner na kpɛɛ thɩɩra.
Mɛr Thãgba Kɔ̃tɩn sɔ.
5 Ado yo, agɩbo
thɩ̃ tagɩrɩdara pɔ nar dɩtɩnɔ,
wa khɩɩrɛ gɩrɛ fɛw wɩ punonɩ
a na jalna.
Dɩ ga dor wɩ kʋ nɛr.
Dɩ ado dɩvɛ̃ thɩr bi khʋ̃dara lõ nɩ dɩvɛ̃ lɔɔ,
Aɲe wa sɩ saagado dakpɛnanɛ ga?
6 Hu! Ejayuu məlsɔa ya,
wɩ cabɩlɛlɛ anɩ thɩ̃sɔ
Anɩ lẽle thɩ̃sɔɔkɛra keranɩ yɩrɛ jɩɛra.
7 Wɩ n wee ner anɩ dɩra;
wɩrɛ nɩ ɓananɩ kha n fɩɩl nɛr.
wɩrɛ dɔnɩ anɩ kũusɔ puno ner,
Wɩrɛ nɩ n kɔɔ khonanɩ kha dikor n
pɛ narɛ phera.
Sɩ dɩ wɩ so aa : Nɩ də̃bəəle!
8 Mɛr Thãgba Kɔ̃tɩn sɔ :
ga wiirəəle ma bũburone
Edɔ̃ tɩɩ kpɛsɛsɔ,
Ejayuu məlsɔɔ gɔ̃gɔnana,
fɩl jɩn bɩɛllakɛ na sa'.
9 Maar na gbãgbarɛ
afɩ kokena yaa Temã dɩɩb.
Dɩ mɛ̃ Ejayuu məlsɔɔ gɔ̃gɔnana
Tɩbɩla fɛw na khiir kʋʋrra .
Edɔ̃daraa dɩpa
10 Nɩ phʋʋnɛ, a kʋʋrna
Jakɔbɩɩ məlsɔɔkɛ dɔnɩ anɩ omɩsɔ.
Gɛr gɩ, na dor yicur haa
wa bũburõ ner khorr.
11 Nɩ kɔɔ jɩɩlɛ khokhɩara
Ɔbɔɔkɛ awɩ lãlaardara n
kɔɔ fʋlɛnɩ awɩ sɔrasɩsɔ dɩ wa n jalna.
Ɔbɔɔkɛ wɩ lonɩ Jerusalɛm dɩɩra
dɩ wa n khɩɩ lẽle thɩ̃ɛ,
nɛrɛ dakha, nɩ kɔɔ cʋʋrɛ awɩ kha.
12 Edɔ̃ɔ məlsɔ yaa,
na kɔɔ teena na n kãka
ɔbɔɔkɛ thɩlkɩɩr 'lini
anɩ omɩ Judaa məlsɔa'.
Na kɔɔ teena nɩ hana daw
Ɔbɔɔkɛ wɩ n bũburõ wɩna'
Na kɔɔ teena na n nɩrɛ wɩ
Ɔbɔɔkɛ wɩ hanɩ ha kʋɛrɛra ga.
13 Na kɔɔ teena nɩ lona
ɩ̃ too dʋɔ
ɔbɔɔkɛ wɩ n bũburõ wɩna'.
Na kɔɔ teena nɛrɛ dakha
gɩ da nar ɔbɔɔkɛ
thɩlkɩɩr 'li wɩna'.
Na kɔɔ teena nɩ tha awɩ lẽle thɩna,
ɔbɔɔkɛ lãlara n khɩɩ wɩnɩ thɩ̃ɛa'.
14 Na kɔɔ teena nɩ jɩɩlɛ hʋ karã paarsɔ
a kʋrɛ wɩrɛ n fuonə',
Na kɔɔ teena nɩ kɔɔ fʋlɛ wɩrɛ sɛnɩ na yire
nɩ ha lãlara nɩwɛ bɔɔraala'.
15 Gɩdonɩ wireekɛ mɛr Thãgba Kɔ̃tɩn na kɩɩlnanɩ
tibil caar fɛw n wɔrɔnɛ
wa cʋʋ narɛ gɩrɛra
nɩ kɔɔ cʋʋnɩ ɩkhara.
Puureekɛra nɩ kɔɔ cʋʋnɩ
na bire na hẽe nɩ.
Ɩjɩrayɛl bɩsana 'lɛr kǝǝre
16 "Nɛr Ɩjɩrayɛl bɩsana,
Nɩ kɔɔ ɲɔr ɩ̃ nĩkhi
ɩ̃ gɔ̃gɔ̃ phurəc mɔ̃ wɩ n ɲɔnɩ taan.
Dɩ mɛ̃ ga ha na ca kpɩɩsɔ.
Wa ɲɔr ga n kʋ wɩ
agɩpɩ wɩ bũburõ.
17 Sɩ Sɩyɔ̃ gɔ̃gʋɔna wer,
tɩbɩla na hale na sɩ.
ga bire na do pa phuu
Dɩ Jakɔbɩɩ məlsɔ na bire na tee awɩ dɩ
tɩbɩlalaakɛ kɔɔ taa warnɩ.
18 Jakɔbɩɩ məlsɔ na hor dɔɔ.
Jojɛfɩɩ məlsɔ n ho dɔ lɩnanɛ
Sɩ Ejayuu məlsɔ n ho war hʋɔn
kɛ wa thiini
Dɩ tibil bɩɛl na sɩ Ejayuu məlsɔra ga.
Mɛr Thãgba Kɔ̃tɩn sɔ.
19 Wɩrɛ hanɩ Negɛvɩ bəənnə,
Wɛr na gbaan Ejayuu gɔ̃gɔ̃ bə̃,
Wɩrɛ hanɩ Sefelala n gba Fɩlɩsɩtɛ̃sɔɔ bə̃,
Wɛr na gbaan Efɩrayɩmɩ məlsɔɔ bə̃ na Samarɩ bəən.
Bɛ̃jamɛ̃ɛ məlsɔ n gba Galaadɩ bəǝn.
20 Dɩ wɩrɛ wɩ kɔɔ fʋlɛnɩ dɩ wɩ do dea,
kɛ dɔnɩ Ɩjɩrayɛl sɔrasɛ,
wɛr na hɩna Kanãadaraa dɩ,
wɩ jalna wɩ dana Sarɛpɩta.
Dɩ wɩrɛ wɩ kɔɔ fʋlɛnɩ Jerujalɛm dɩ wɩ do dea,
kɛ hanɩ Sefaradɩ,
wɛr na hɩna Negɛvɩ bəən.
21 Wa 'lɛr kǝǝre
dɩ wa jʋʋnɛ Sɩyɔ̃ gɔ̃gʋɔna.
Liir wa too sɩ wa n thɔɔ Ejayuu məlsɔɔ dɩ.
Thãgba Kɔ̃tɩn dʋɔn Jamana!