AMƆSƖƖ SƐBƐ
1
1 Nɩ yɛkɛ thɩmɩɩrɩkɛ Thãgba Kɔ̃tɩn hanɩ Amɔsɩɩkɛ dɔnɩ nʋ̃ be, nʋ̃ bɛsɔraakɛ hanɩ Tekoa dɩɩra Ɩjɩrayɛl bɩsanaadara. Yɛna yeɲɔ gɩ cʋʋ sɩ thɩɩ jẽ. Ɔbɔɔlera Ojɩasɩ kɔɔ do Juda jamana, dɩ Jeroboamɩɩkɛ dɔnɩ Joasɩɩ bikunn do jamana Ɩjɩrayɛl bǝǝnnǝ.2 Amɔsɩ sor:
Le Sɩ̃ɔ gɔ̃gʋɔnɔ
Thãgba Kɔ̃tɩn n oore Sidũ'ũ khaa.
Le Jerujalɛm a n phãa nɔ khɩɩ.
Dɩ nʋ̃ khʋʋl paarsɔ, hʋ̃ɔ ɔ̃'ɔ̃lɔnɛ
Karmɛl gɔ̃gɔ̃ yʋɔ, thɩ̃ɛ khɩrɛ koo.
Sorɩkɛ dɩɩsɔɔkɛ khonǝni Ɩjɩrayɛl na 'lɛnɩ.
3 Thãgba Kɔ̃tɩn sor thakɛ ayɩ:
Damasɩdara cʋʋrɛ puure jɔɔ ka,
sɩ puu ʋrɛ kpalanɩnakɛ a jɔ dʋɔn:
Wɩ kpoore Galaadɩdarara jɔɔ ka,
Gɛr gɩ ma sɩrɔ gɩrɛ mɩ yaalnɩ ɩ̃ cʋʋ wa'.
4 Ma tor dɔɔ awɩ jamana cɔra
Ma tor dɔɔ Hajayɛl na
Bɛn-Hadadɩɩ jamana cɔraakɛ wɩ mɩnɩ.
5 Ma khaarɛ Damasɩ dɩ lõ kpaladaasɔ,
Ma bũburone ʋrɛ hanɩ
puu cʋʋ ɓɛlɛ̃nɔ, kɛ dɔnɩ
jamanaakɛ hanɩ kãka dɩɩraale,
Sɩ wɩ khɩɩ Sɩɩrɩdara wɩ jalna Kɩɩr dɩɩra.
Mɛr Thãgba Kɔ̃tɩn sɔ.
Sorɩɩkɛ Gajadara na 'lɛnɩ
6 Thãgba Kɔ̃tɩn sor ayɩ:
Gajadara cʋʋrɛ puure jɔɔ ka.
Sɩ puu ʋrɛ kpalanɩnakɛ a jɔ dʋɔn:
Wɩ fʋlɛlɛ dɩɩ bilǝnii tibilsɔ a dolõ
Edɔ̃darara dɩ wɩ do dea.
Gɛr gɩ ma sɩrɔ gɩrɛ mɩ ƴaalnɩ
ɩ̃ cʋʋ wa'.
7 Ma tor dɔɔ cɔnasɔraakɛ
hanɩ gʋʋraakɛ diǝni Gaja dɩɩra.
Dɔɔ n hɩ̃ ɔɔ cɔ ɓɔnasɔɔle.
8 Ma bũburone Asɩdɔdɩ jamana
Na jamanaakɛ n thɔanɩ Asɩkalɔ̃ dɩɩ.
Ma pɛr Ekʋrɔ̃dara sor
Dɩ Fɩlɩsɩtɛ̃sɔɔkɛ sɛnɩ na yire na khiire.
Mɛr Thãgba Kɔ̃tɩn sɔ
9 Thãgba Kɔ̃tɩn sor ayɩ:
Tɩɩrdara cʋʋrɛ puure jɔɔ ka
Sɩ puu ʋrɛ kpalanɩnakɛ a jɔ dʋɔn:
Wɩ dolone Edɔ̃darara deaakɛ wɩ thenɩ
Sɩ wa therna ʋlfɛrɛɛkɛ le wɩnɩ kha
na Ɩjɩrayɛl bɩsana ga.
10 Ma tor dɔɔ cɔnasɔɔraakɛ
hanɩ gʋʋraakɛ diǝni Tɩɩr dɩɩra,
Dɔɔ n hɩ̃ ɔɔ cɔ ɓɔnasɔɔle.
Sorɩɩkɛ Edɔ̃dara na 'lɛnɩ
11 Thãgba Kɔ̃tɩn sor ayɩ:
Edɔ̃dara cʋʋrɛ puure jɔɔ ka,
Sɩ puu ʋrɛ kpalanɩnakɛ
a jɔ dʋɔn:
Wɩ weere Ɩjɩrayɛl bɩsana,
kɛ dɔnɩ awɩ omɩsɔ
na bajɩna ɲɔ̃kɔɔ.
Wa hana war
bɔ jɩɩr fɩɩʋraka',
Wɩ n kʋʋr wɛr
bɔɔ fɛw dɩɩ the
awɩ nĩkhi khera,
Wɩ fʋrɔrɛ laarɛ
awɩ hara ga n pa'.
Gɛr gɩ ma sɩrɔ gɩrɛ
mɩ ƴaalnɩ ɩ̃ cʋʋ wa'.
12 Ma tor dɔɔ Temã dɩɩra,
kɛ dɔnɩ awɩ dɩ,
Dɩ dɔɔra na hɩnɛ
cɔ ɓɔnaakɛ hanɩ Bɔsɩra dɩɩra.
Sorɩɩkɛ Amɔ̃ɔ mǝlsɔ na 'lɛnɩ
13 Thãgba Kɔ̃tɩn sor ayɩ:
Amɔ̃ɔ mǝlsɔ cʋʋrɛ puure jɔɔ ka,
Sɩ puu ʋrɛ kpalanɩnakɛ a jɔ dʋɔn:
Wɩ kʋʋrɛ khɛr pɛmɛdara
Galaadɩ bǝǝnnǝ a pǝl wɩ bɩnɛ,
Gɩdonɩ wɩ ƴaalɛ wɩ tee dɩɩ
Wɩ ɓã awɩ dɩra gɩ kɔ̃tɩ̃.
Gɛr gɩ ma sɩrɔ gɩrɛ mɩ ƴaalnɩ ɩ̃ cʋʋ wa'.
14 Ma tor dɔɔ cɔnasɔɔraakɛ
hanɩ gʋʋraakɛ diǝni Raba dɩɩra.
Dɩ dɔɔra na hɩnɛ Raba cɔ ɓɔna
koke hulẽbe thɩ̃thɩɩn,
wireekɛ kʋʋr na phanɩ,
jɛ kʋkʋʋl thɩ̃thɩɩn,
Wireekɛ thãgba jɛ kɔ̃tɩ̃ɩ na ɩɩrnɩ.
15 Awɩ jamana na jaal dee dʋʋra
na fãga bɩɩ ɔr na ɔɔ khukhusɔ.
Mɛr Thãgba Kɔ̃tɩn sɔ.