JOWƐLƖ SƐBƐ
Toosõsɔ na thãgba ɲɔ kure
1
1 Thãgba Kɔ̃tɩn kɔɔ mɩɩnanɛ Jʋwɛl, kɛ dɔnɩ Petʋɛlɩ bikuun.2 Nɩ pɛ nũu nɛr kɛ dɔnɩ tɩɩ kpɛɛna
nɩ jɩɛ pɛ nũu, Juda dɩdara!
Thɩ̃ ca ʋrɛ daan anɩ bɔɔ
agɩbo anɩ thɩ kɔ̃tɩ̃sɔ bɔɔ ya?
3 Nɩ mɩɛnɛ anɩ bɩsãsɔ;
Anɩ bɩsãsɔ n gba wɩ mɩɛ awɩ bɩsãsɔ,
dɩ awɩ bɩsãsɔ na mɩɛrɛ wɩrɛ na kpa warnɩ.
4 Gɩrɛ badɔ khonɩ sa sɩ
ɓãsʋlãsɔ kho ger.
Gɩrɛ ɓãsʋlãsɔ khonɩ sa sɩ,
dokora kho ger,
gɩrɛ dokora khonɩ sa sɩ,
toosõsɔ kho ger.
5 Nɩ jaga, nɛr ta kɔ a na bɛ!
Wɩrɛ fɛw n ɲʋɔnɩ dɩvɛ̃, na n sɛ!
Dɩvɛ̃ phaa na ka nɩ nʋɔ bã.
6 Ca ʋkha ɩɩrnanɛ kʋʋr na ɩ̃ dɩ.
Awɩ too hananɛ fãga ka, a jɔr, tibil
na puno na ther wa'.
Wɩ n cɛcɛbɛrɛ mɔ̃ sidũ'ũu n cɛcɛbɛnɩ,
Awɩ gbuokho hor sidũ'ũ khɛrɩ gbuokho
7 Wɩ n kʋɛrɛ asɩ dɩvɛ̃ thɩr lɛsɔ,
wɩ n kʋɛ sɛr thɩraakɛ hɔnɩ ca thɩra fɛw,
dɩ wɩ kho a kpo khʋrɛ a jɛ gɩ
dɩ agɩ jɛ̃ yɩra n bulolo phɩphɩphɩl.
8 Na n bɛ mɔ̃ khebiire n bɩnɩ
ɔɔ kookɛ a heni dɩ ga pʋɔra' sɩ dɩ khi.
9 Tibil bɩɛlakɛ na n pɔna Thãgba fʋɔr cʋɔrɔ
bonɩ ji mɩ̃ɩ na bonɩ ji dɩvɛ̃a'.
Gɛr gɩ bonɩ jidaraakɛ hanɩ
Thãgbaa thɔmana na n bɩ.
10 Lɩɛsɔ kʋɛrɛ,
Dɩ thɩɩ hi na bʋɔ.
Bile na hale
dɩ dɩvɛ̃ phaa gɩ,
dɩ nĩ phaa ga.
11 Ɲɛ̃ɛ khiire kokola,
wɩrɛ n kʋlɛnɩ dɩvɛ̃ thɩr lɩɛ na n se;
gɩdonɩ bile na ɔɔjɩ kʋɛrɛ,
thɩ̃ɛ fɛʋʋkɛ wɩ kʋʋlnɩ kʋɛrɛ.
12 Dɩvɛ̃ thɩr lɩɛ khɩrɛ,
dɩ thɩraakɛ hɔnɩ caa na n se bã.
Girenadɩ thɩra, na kalã thɩra na pɔm thɩra,
na thɩra fɛʋʋkɛ n sɩɛnɩ khɩrɛ.
Ɔɔ, daw pɩrɛ tɩbɩlaa thɩ̃thɩɩn.
Nɔ lir na Thãgba bɩɛlɛ
13 Nɛr bonɩ jidara,
nɩ tɔ anɩ be kẽkẽsɔ a na bɛ.
Nɛr kɛ hanɩ Thãgbaa thɔmana Kɔ̃tɩnɩ cɔ,
na n bɛ!
Nɛr kɛ dʋɔnɩ asɩ Thãgbaa thɔ̃dara,
ha helle na n cɔna.
gɩdonɩ, tɩbɩla na n pɔna Thãgba fʋɔr cʋɔrɔ
bonɩ mɩ̃ɩ na bonɩ dɩvɛ̃a'.
14 Nɩ hulene a sɔ wɩ li nʋɔ,
nɩ kpa tɩbɩla a dera.
Nɩ wɛ tɩɩ kpɛɛna na dɩdara fɛw
le Thãgba Kɔ̃tɩn asɩ Thãgbaa fʋɔr cɔra a bɩɛlnɛɛ.
Thãgba Kɔ̃tɩnɩ wi n daan
15 Hu! Aɲee wi puu ha ʋrɛ!
Kɛ na gbe Thãgba Kɔ̃tɩnɩ wi na daan.
A n ɩnɛ a hona thɩlkɩɩr kɛ n kʋɛnɩ thɩ̃ɛ fɛw,
kɛ Thãgba Punone fɛʋʋ Hɩ̃daar thɔnanɩ.
16 Asɩ dikor bure asɩ ƴɛra,
daw na ha ɩɩ ther asɩ Thãgbaa fʋɔr cɔra.
17 Thɩ̃ beekɛ sɩ diirni khɩrɛ thɩ bɩnɔ.
Thʋʋnɛsɔ dor dakhɩna,
Dɩ ga thʋʋnɛsɔ kʋɛrɛ gɩdonɩ bile na hale bã.
18 Nɩ pɛ nũu mɔ̃ nʋma n bɩnɩ!
Nasɔ na n caalɛ ba ba,
gɩdonɩ wa hana hʋ̃ɔ na khoa',
dɩrakɛ nʋ̃ yɩra n gaarɛ.
Thãgbaa mɩmɩɩ Thãgba bɩɛl
19 Thãgba Kɔ̃tɩn, fɛrra mɩ n hulẽ!
Dɔɔ hɩnɛ khʋʋl paar fɛʋʋkɛ hanɩ hʋɔnɔ,
dɔ delẽbe hɩnɛ thɩra fɛʋʋkɛ hanɩ hʋɔnɔ.
20 Dɩ nʋmaakɛrakɛ dɔnɩ hɔ̃ nʋma
fɛrra wɩ n hɩɩn, gɩdonɩ poosɔ khɩrɛ.
Dɔɔ hɩnɛ khʋʋl paar fɛʋʋkɛ hanɩ hʋɔnɔ.