Thãgba Kɔ̃tɩnɩ wi n wɔrɔnɛ
2
1 Nɩ ʋna tutuu Sɩyɔ̃ dɩɩra,na n hulene Thãgba Kɔ̃tɩnɩ gɔ̃gɔna
nɛrɛɛkɛ dɔnɩ dɩdara,
na n jena gɩdonɩ Thãgba Kɔ̃tɩnɩ wi n ɩnɛ
ga pʋɔra'.
2 Wire gɩɩkɛ puuroni,
kɛ henanɩ ndɔlɔ̃pa birǝ,
wire gɩɩkɛ dɔnɩ thuthuur wire na dabirə,
A n ɩnɛ na phananɛ
a ho duu dahɩrɛɛkɛ n caranɛnɩ gɔ̃gɔnana
Caar gɩ a jɔr ka, dɩ ɔɔ too hana fãga ka,
Sa kɔɔ yɩ ga thɩ̃ caala',
dɩ sa yɩ gɩ kpɩɩrakɛ
gɩ dana thɩ kɔna yemɔ̃ɔkɛ na kpaanɛna'.
3 Wɩ hor dɔɔkɛ n kʋɛanɩ thɩ̃ɛ,
dɔ delẽbeekɛ n thiǝni thɩ̃ɛ fɛw
awɩ ƴɛkʋʋlɔ na awɩ khiro.
Mɔ̃ wa kɔɔ ɩnɩ pa'
thɩɩ kɔɔ hor Ɛdɛ̃ nãkʋɔr.
Sɩ nɛnɛ̃ a khɩrɛ mɔ̃ bǝ̃ kpara n hanɩ.
A wɩ ka pɩ thɩ̃ bɩɛl na n hana yirǝ'.
4 Wɩ hor koke gãgona,
Wɩ n car mɔ̃ koke gãgona n canɩ.
5 Wɩ n kɩɛrɛ nʋɔ koke hotoroo kha,
kɛ n bɩnanɩ le gɔ̃gɔnana,
agɩbo mɔ̃ dɔ delẽbe n hɩnɩ hʋ̃ɔ khɩna
dɩ ga n phaan.
Wɩ n ɩnɛ a cʋr a ho kokenaakɛ
hananɩ fãga ka.
6 Maar n fʋrɛ tɩbɩla
bɔɔraakɛ wɩ n yɩ wɩnɩ,
dɩ awɩ ƴɛ fɛw n debire.
7 Caarɩlee too n car kũu khanaa kha,
wɩ n jʋʋnɛ gʋʋsɔra kokenaa kha,
ntɛ n gbaar ɔɔ hʋ da n jal,
sɩ aa n dɩ hʋɛra ga.
8 Bɩɛl na n babiri ɔɔ alãkha ga,
ntɛ jaal ɔɔ ƴɛbʋrɔ.
Wɩ n kar sẽe thɩ̃thɩɩn
sɩ wa n lɛ̃a'.
9 Wɩ n caalɛlɛ lõ dɩɩra,
dɩ wɩ jʋʋn gʋʋsɔɔra,
wɩ n lʋʋn cʋɔrɔ,
na fɛnɛtɩrɩ a ho yo.
10 A wa ɩ̃, thɩɩ na n jẽ,
dɩ thãgbara ƴũu na n ƴaal gɩ ji.
Dɩ wire na sɩpor n birǝ
dɩ ƴepǝlǝ̃be na n carã bã.
11 Dɩ Thãgba Kɔ̃tɩnɩkɛ hanɩ
ɔɔ sɔrasɩsɔ ƴɛkʋʋlɔ phãa nʋɔ.
Ɔɔ sɔrasɩsɔɔkɛ n pɩɛnɩ nũu, jɔrɛ a hana fãga ka.
Thãgba Kɔ̃tɩnɩ wi wabɩrɛ,
a puurore da n kʋ maar,
dɩ tibil na puno na jɩɩl a na pɩɛrrʋa'.
Thãgba n wer ɔɔ too
12 Mɛr Thãgba Kɔ̃tɩn so ayɩ:
Nɩ kɛra ɩna mar na anɩ ha fɛw.
Nɛnɛ̃ dɔ bɔɔ.
Nɩ le nʋɔ, nɩ te be nɩɛ, a na bɛ.
13 Ga do anɩ kẽkẽ teena nɩ ɓəǝrǝ'
sɩ anɩ ha teana gɩ deba.
Ɔɔ, nɩ kɛra birǝ ɩna Thãgba Kɔ̃tɩn,
anɩ Thãgbara.
a dor bɔjɩdaar, na bɔfʋdaar;
nĩkhi jodaar a do, a hinə ha bulole
a na faarɛ nɩwɛɛkɛ
a n kɔɔ ƴaalnɩ gɩ dana nɩ.
14 Amɛ jɩ̃ɛ? agakpaana' a na debire
ɔɔ kpɩɛr sɩ a cʋʋ nɩ bɔɔ .
Dɩ na punone a na pɔna Thãgba Kɔ̃tɩn
anɩ Thãgbara bonɩ ji mɩ̃ɩ na bonɩ ji dɩvɛ̃.
Nɔ li bɔɔ na Thãgba ƴɛɛ bɔɔ daan
15 Nɩ ʋna tutuu Sɩyɔ̃ dɩɩra,
Nɩ hulene a sɔ wɩ li nʋɔ.
Nɩ kpa tɩbɩla a dera.
Nɩ wɛ tɩɩ kpɛɛna na dɩdara fɛw
16 Nɩ kpa dɩdara a gbɛba Thãgbaa ƴɛra.
Nɩ kpa tɩɩ kpɛɛna na tɩɩ ɓola
na bɩsã bii a gbɛba.
dɩ wɩrɛ hɛnɩ khɛ he phaa n thɛ ɔɔ duu
dɩ wɩrɛ hɛnɩ kuun he phaa n thɛ ɔɔ duu
17 Nɛr bonɩ jidaraakɛ n dɔnɩ thɔma
Thãgba Kɔ̃tɩnna na n bɛ a fʋ lõ paar
a jalna dana bonɩ ji paar.
Na n bɩɛlnɛ Thãgba thakɛ ayɛ:
Thãgba Kɔ̃tɩn, jɛ sɩ bʋɔra sɛr kɛ dɔnɩ afɩ too.
Fa n faa yicuru n fʋ wɩrɛ fɩ hɩna';
fa n faa ca kpɩɩsɔ na n
ɓoɓoro sar wa n sona aa:
Dɩ awɩ Thãgbara, kana a ha?
Thãgba Kɔ̃tɩn ture ɔɔ too bɩɛl
18 Thãgba Kɔ̃tɩn nar ɔɔ dɩ jɔɔ ka,
bʋɔ fʋʋrɛ ɔɔ toora
19 gɛr gɩ dɩ tu awɩ bɩɛl.
Dɩ a so warɛ ayɩ:
Ma bire na ha nɩ bile na dɩvɛ̃ na nĩ phaa.
Mɔ̃kɛ nɩ n ƴaalnɩ mɛ̃ na 'li gɩ.
Ma faa hʋɛ kpɩɩrakɛ a na ha
ca kpɩɩsɔ
wɩ pɛr nar yicurua'.
20 Ma welele anɩ lãlara
kɛ na thɛnɩ ka wire na n jalnɩ dɩ pɛr ɲɔ̃bɔɔ,
ma weele wer na jalna
na faa bǝ̃ kparara.
Awɩ sɔrasɩ wɩrɛ na kʋlɛnɩ ƴɩɛ
ma cʋʋ wɛr wɩ jiir laɲɔ̃ khirera,
dɩ wɩrɛ hanɩ khiro
ma dʋna wɛr na faa
Medɩterane laɲʋɔnna.
Dɩ sɔrasɛɛlera khiireni,
awɩ hʋ̃ na phɔbɩrɛ jɩɛ
gɩ gba paar fɛw.
sobɔr gɩ Thãgba Kɔ̃tɩn n cʋʋrɛ thɩ̃ kɔ̃tɩna.
21 Thɩɩ, fa n do maar n fʋ fa'.
Na kãkanɛ a na sana bɩna
gɩdonɩ Thãgba Kɔ̃tɩn cʋʋrɛ thɩ̃ kɔ̃tɩna.
22 Nɛr hɔ̃ nʋma
na n do maar n fʋna'.
Bǝ̃ kparara hʋ̃ɔ bire phu.
Thɩra ser be; thɩraakɛ hɔnɩ caasɔ
na dɩvɛ̃ thɩra 'laarɛ awɩ lẽle thɩ̃sɔ.
23 dɩ nɛr kɛ dɔnɩ Sɩyɔ̃dara,
nɩ sa bɩna a na kãkanɛna
gɩ do Thãgba Kɔ̃tɩnɩkɛ dɔnɩ
anɩ Thãgba dɔ nɔɔ.
Mɔ̃ ubulo kanɩ pɩ,
a n 'laarɛ thãgba ɲʋɔn
kɛ dɔnɩ bɔnanɛ.
Dɩ yʋʋro a n 'laarɛ thãgba ɲʋɔn dɩ ga n dã
mɔna mamara hanɩ.
24 Dɩ thʋnɛsɔ na hiri na thɩ̃ be.
Bɩlãkpona na hinǝne dɩvɛ̃ phaa na nĩ
ga n deer.
25 Thãgba Kɔ̃tɩn sor ayɩ:
Anɩ lɛ thɩ̃ɛkɛ mɩ thɔnanɩ
Badɔ na ɓãsʋlã na dokora
na toosõsɔ tə̃tə̃tə̃ sɔrasɩ khaa dɩ wɩ kho,
ma birsere a na ha nɩ.
26 Na khor na hi na n dɩbɩ ɩ̃ i
mɛr Thãgba Kɔ̃tɩn anɩ Thãgba
kɛ cʋɛ narnɩ nɔ kpaa thɩ̃ɛsɔ.
Nɛr ɩ̃ too na hana yicuru kpɩɩrakɛ bã.
27 Dɩ mɛ̃ na jɩ dɩ mɩ har
nɛr Ɩjɩrayɛl bɩsanaa thɩ̃thɩɩn
dɩ mɛr dʋɔn Thãgba Kɔ̃tɩn anɩ Thãgba
dakpɩɩ na hale bã.
Nɛr ɩ̃ too na hana yicuru kpɩɩrakɛ bã.