Thãgba Kɔ̃tɩn n kɩɩlnanɛ ca kpɩɩsɔ
4
1 Thãgba Kɔ̃tɩn sor ayɩ: Dabɔɔkɛ ma kɛrnanɩ wɩrɛ wɩ fʋlɛnɩ jalna dɩ kpɩɩra (dee dʋʋra) a na birnə Juda bəənnə na Jerujalɛm dɩɩra,2 Ma kpar caar fɛʋʋle sɛnɩ ɩ̃ gbuno
ɓɛlɛnaakɛ wɩ n wenɩ Jojafatɩ ɓɛlɛ̃ kɩrʋ dʋɔn
"Thãgba Kɔ̃tɩn dʋɔn kɩɩldaar"
Liir dɩphã ma kɩɩlna wɩ gɩ the gɩrɛraakɛ
wɩ cʋʋnɩ ɩ̃ too Ɩjɩrayɛl bɩsananaakɛ mɩ hɩnɩ.
Wɩ bɩ̃bɩlã wɛr dɩ wɩ jal paar fɛw
ca kpɩɩsɔɔ thɩ̃thɩɩn sa gba ɩ̃ dɩ a tɩnɛ.
3 Wɩ lɩrɛ lɩɩ a tɩnɛna ɩ̃ too.
Wɩ dolone kuuminǝ a thena thɛtoosɔ,
a dolõ kheminǝ a thena dɩvɛ̃ a ɲɔ.
4 Nɛr Tɩɩrdara na Sɩdɔ̃dara,
na nɛrɛ fɛʋʋkɛ hanɩ Fɩlɩsɩtɛ̃sɔɔ dʋɔ,
aɲe nɩ n ƴaal mar?
Nɩ n ƴaalɛ nɩ tiir mar helu yaa?
Ado gɛr nɩ n ƴaal,
ma tiir narrɛ helu dapaara, khə̃khə̃.
5 Nɩ gbaar ɩ̃ dɛ bulo na ɩ̃ dɛ;
Nɩ gbaar ɩ̃ lẽle thɩ̃sɔɔkɛ ma n tunənə'
a kɔna a thɩɩn anɩ thãgba fʋɔr cɔsɔɔra.
6 Nɩ dolone Judadara
na Jerujalɛmɩdara Gɩrɛkɩsɔɔra
gɩ do nɔɔ wɩ hʋnɔna awɩ dɩ.
7 Dɩ nɩ hɩnɛ, ma ti wer kãakɛra
nɩ dolõ wɩnɩ ɩ̃ birnǝ awɩ dʋɔ,
sɩ ɩ̃ tiirnǝ helu.
8 Ma dolone anɩ kũubisɔ
na anɩ khebisɔ Judadarara.
Dɩ wɛr dakha na dolõ wer
Sabedararakɛ hʋnɔnɛnɩ na kɩɛr.
Mɛr Thãgba Kɔ̃tɩn sɔ mɛ̃.
Thãgba Kɔ̃tɩn na gbune so kɩɩl ɓɛlɛnɔ
9 Nɩ sɔ ca kpɩɩsɔɔrara aa:
Nɩ gbɛba koke gbɛbɩrʋ,
nɩ khuo kũu khana.
Sʋrasɛ fɛw n ɩrɛ je hʋɛra!
10 Nɩ gba anɩ na sũgbusɔ
a bɛ bajɩnasɔ.
A gba anɩ hɔ̃ khabɩdasɔ a bɛ kpɩlasɔ.
Wɩrɛrakɛ na hananɩ fãga ga na n sɔ:
Sɩ dor kũu khana.
11 Nɛrɛ fɛw, kɛ dɔnɩ ca kpɩɩsɔɔkɛ khonə sɩnɩ,
nɩ phana a ɩna.
Nɩ kpa jɛ.
Fɛr Thãgba Kɔ̃tɩn,
cʋɛ afɩ kũu khasɔ wɩ gbũ paarɩlera.
12 Thãgba Kɔ̃tɩn sor aa
Ca kpɩɩsɔ n ɩrɛ je hʋɛra,
wɩ gbuno ɓɛlɛnɔ kɛ wɩ n wenɩ
"Thãgba Kɔ̃tɩn dʋɔn kɩɩldaar.
Ɔɔ, liir a na too sɩ a kɩɩlna
ca kpɩɩsɔ fɛʋʋkɛ hanɩ bilo fɛw.
13 Nɩ gba hɔ̃ khabɩdaa
gɩdonɩ lɛ thɩ̃ gba bɔɔ daan.
Nɩ ɩna a nanã gɩ gɩdonɩ
dɩvɛ̃ thɩr bi nã paar hire,
dɩ bɩlãkpona hi dɩ ga n deer.
Sobɔr gɩ, ca kpɩɩsɔɔlee bɩ̃ kpallɛ ka.
14 Tɩbɩla wɛ a jɔr ka dɩ wa n pɔ
ɓɛlɛnɔɔkɛ wɩ n wenɩ "so kɩɩl paar".
Thãgba Kɔ̃tɩnɩ wi wɔrɔnɛ kɛ dɔnɩ
wireekɛ a na ɩnɩ le ɓɛlɛnɔɔlera.
15 Wire na sɩpor birǝre,
ƴepǝlǝ̃be na n hɩrɛ bã.
16 Thãgba Kɔ̃tɩn n phaanɛ nɔ khena
le Sɩyɔ̃ gɔ̃gʋɔna.
Jerujalɛm a ha sa cʋʋ
dɩ wa n nɩ ɔɔ wi.
Ƴũu na thɩɩ n jɩ̃ɩ.
Sɩ Thãgba Kɔ̃tɩn n bɛrɛ ɔɔ too,
a n bɛrɛ Ɩjɩrayɛl bɩsana na ɔɔ fãga.
17 Dɩ mɛ̃ na jɩ
dɩ mɛr dʋɔn Thãgba Kɔ̃tɩn, anɩ Thãgba,
kɛ n cʋɔnɩ Sɩyɔ̃, ɩ̃ gɔ̃gɔ̃ phurǝ.
Jerujalɛm na dor pa phuu
dɩ kpakpala na lõ le kpɩɩrakɛ bã.
Bɔnanɛɛkɛ Ɩjɩrayɛl bɩsana na 'lɛnɩ
18 Bɔ bɩɛl na daan
dɩ dɩvɛ̃ phaa na n cele gɔ̃gɔnana.
Na ɩlɛ̃ na n cel gɔ̃gɔ̃ biisɔɔra,
ɲʋɔn na n cele Judaa poosɔra fɛw,
ɲɔ bu kaar na ther
Thãgba Kɔ̃tɩnɩ fʋɔr cɔra,
a na n sɛ Sitim ɓɛlɛ̃.
19 Ejipiti na hana tɩbɩla bã,
Edɔ̃ dɩɩ na debire na do bǝ̃ kparaa,
gɩdonɩ wɩ khor fãga Judaa məlsɔɔra
a kʋʋrna dɩpa 'leedara awɩ dʋɔ.
20 Sɩ Juda bəənnə, tɩbɩla na hale bɔɔ fɛw
Jerujalɛm dɩɩra dakha tɩbɩla na hale
məle woo məlela fɛw.
21 Sobɔr gɩ, ma tiire awɩ helɩɩkɛ ma kɔɔ tiirnə
Sɩ mɛr Thãgba Kɔ̃tɩn wer, Sɩyɔ̃ mɩ n cɔ.