Thɩmɩɩrɩkɛ mɩanɩ Judaa məlsɔɔdara
2
1 Nɩ hɩnɛ gɔ̃gɔnana yaa Judaa məlsɔ,ʋrɛɛkɛ n mɩanɩ thɩmɩɩ pha bʋɔɔkɛ dɔnɩ ha iedaa, a n ɩnɛ!
Na n cʋɛ anɩ fɛtɩsɔ,
Nɩ hɛlla nʋɔsɔɔkɛ nɩ kɔɔ sonɩ!
Gɩdonɩ puu cʋʋ tibilile na bir
na lõ anɩ dʋɔ yuurəkɛ bã.
A bũburone khorr.
Thɩmɩɩrɩkɛ mɩanɩ Nɩnɩvɩ dɩɩdara
2 Ʋrɛɛkɛ na bɩ̃bɩlanɛnɩ afɩ too hale da n pɔ far yaa Nɩnɩvɩ dɩɩ.
Na jɩɛ bɛr afɩ fãga pa bɔɔbɔɔ!
Na jʋrɛ hʋɛ!
Fɔ gɩ ma dɛ!
Pɩɛr fãga fɛw !
Thɩmɩɩrɩkɛ mɩanɩ Judaa məlsɔɔdara
3 A mɛ̃ ga Thãgba Kɔ̃tɩn bire kɛrna Jakɔbɩɩ məlsɔɔ i dʋbɩ da n ha wɩ,
A bire kɛrna Ɩjɩrayɛlɩa məlsɔɔ i dʋbɩ da n ha wɩ,
Gɩdonɩ hɔ̃hɔla kɔɔ phʋ̃ʋ wɛr,
A kʋɛna awɩ dɩvɛ̃ thɩrsɔ.
Thɩ̃ yɩr Nɩnɩvɩ kʋɛrɛra
4 Lãlaraa sɔrasɩsɔɔ kũkũ kɛɛ thersɔ dor dasɛna,
Awɩ sɔrasɩ kuun khasɔɔ tor
kẽkẽ sɛna kpakpakpa,
Awɩ ther koke hotorosɔ n carbararɛ
dɔ kpãbe khaa ɔbɔɔkɛ wɩ n gbanɩ ko ɲɔ̃ɔ.
Dɩ awɩ kpɩlasɔ na n phɩphɩlã.
5 Lãlaraa koke hotorosɔ har hʋɛrasɔ dɩ wa n ca na phananɛ,
Wɩ n par nɛɛ wɩ lõ dapaara kpa jɛ paarsɔ.
A fɩ yɩ wɩ, wɩ hor dɔ khɩmʋʋkɛ wɩ n caranɩ.
Wɩ n jaal dapaara kɔrɔ a ho thãgba jʋ khor.
6 Dɩ Nɩnɩvɩ jamana jɩnanɛ ɔɔ sɔrasɩ kuun khasɔ a we wɩ,
Sɩ wɩ n ɩɩrɛ na bʋɔ awɩ nɛ ti para.
Wɩ phananɛ a jal dɩ bɛr go kɩrɔ,
A gbɛbɩ koke thɩ̃ɛsɔ wɩ pɩɛr.
7 Dɩ dapaara lõfonɔ gɩrɛ eenenɩ mɩɩrsɔra khɛr,
Dɩ jamana cʋɔr ji.
8 Gɩ pɩrɛ thale; awɩ thɩl bu khɛrra ha ole yɩranɩ, dɩ wɩ gbaa wa n jalna dee dʋʋra.
Dɩ thɩl bu khɛrɩ thɔ̃ do khɛrsɔ na n se na bɩnɛ mɔ̃ kʋlãpubə n senɩ,
A ɓana kũkune.
9 Mamara, Nɩnɩvɩ kɔɔ hinəne tɩbɩla mɔ̃ ɲʋɔn n hini poo,
Sɩ wɛr ha wele n caalɛnɛnɩ fɛw.
Dɩ wa n we : Nɩ jɩlɛ, nɩ jɩlɛ!
Sɩ pɔy wɩ n we, tibilləkɛ na n kɛra'!
10 Na n khɩa dɛ bulona! Na n khɩa dɛ!
Nɩnɩvɩ lẽle thɩ̃ɛ na puno na pa'.
Gɩdonɩ a hinəne lẽle thɩ̃ ɓɔ̃ caar dɩɩdɩɩ fɛw.
11 Wɩ khɩɩrɛ thɩ̃ɛ fɛw, wɩ kʋɛrɛ thɩ̃ɛ fɛw, wɩ kʋʋrɛ thɩ̃ɛ fɛw!
Haar phaarɛ tɩbɩla,
Dɩ nɛɛ gbãgbar wɩ,
Dɩ tomɩr fɛw na n jẽ wɩ,
Dɩ ƴɩɛ bɩsɩ wɩ fɛw.
Nɩnɩvɩ dɩɩ hor sidũ'ũukɛ wɩ punonɩ
12 Kana sidũ'ũu dɩra ha?
Le kɔɔ dɔ sidũ'ũ ɓolaa too pa.
Dɩ sidũ'ũusɔ na awɩ dabisɔ na n kpaarɔ,
Sɩ tibil na n tha wara'.
13 Sidũ'ũ kʋʋra n kɔɔ fʋlɛlɛ nʋma
dɩ ɓəər da n ha ɔɔ sidũ'ũ ɓolsɔ,
Dɩ kʋʋr ɩkha da n ha ɔɔ sidũ'ũ khɛrsɔ.
A n kɔɔ kʋʋrɛ nʋma dɩ hi ɔɔ ka,
Dɩ khɩɩna nʋmaakɛ a ɓɩɛlnɩ dɩ hi ɔɔ phɩ̃ pa.
14 Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃, mɛr sɔ: Mɩ ɩɩrna fɛr dɩphã Nɩnɩvɩ dɩɩ!
Ma thiire afɩ koke hotorosɔ dɩ ga hɩ̃ a na do thoo.
Wa kʋʋrɛ afɩ sidũ'ũ daɓolsɔɔra kʋʋra na bajɩna.
Ma pɛrɛ khu paar afɩ gbõgolõ thɩ̃ tagɩsɔɔrara thɩɩraakɛ,
Dɩ tibil na bir na nɩ afɩ thɔ̃thɔnaa wi yuurəkɛ bã.