Nɩnɩvɩdara 'lɛr kɩɩlʋ awɩ puu cʋʋra
3
1 Ga puurore Nɩnɩvɩdarara,kɛ n deerenɩ tɔmɩn,
kɛ n henənɩ fɩɩl khor na fãga khor,
kɛ na n sɛrɔnɩ gbõgolõ thɩ̃ tagɩrɛ kpɩɩraka'.
2 Wɩ n nɩrɛ khasa bɩɩ le,
Na koke hotoro nɛ bɛɛrɛ,
na gãgo nɛ bɩna,
na koke hotoro bɛɛrɛ.
3 Dɩ gãgodara jʋʋn awɩ gãgosɔɔra,
Dɩ bajɩnasɔ na n lɩ dɔɔ,
Dɩ kpɩlasɔ na n carbara,
Dɩ khodara phɩl dapaara,
Dɩ khe der bərəəm,
Khe na ha therera ga, wɩ və̃viəne.
Dɩ tɩbɩla na n bara war.
Nɩnɩvɩ dɩɩ hor thɛtoo khɛr
4 Gele fɛw,
Nɩnɩvɩɩ bɔdɛl thɔ̃ cʋʋ jɔjɔrara gɩ the.
Mɔna a bɔrnɩ ka sa jɔ sidumõ cʋʋrɛra,
A n halɛ tɩbɩla na ɔɔ bɔdɛl cʋʋ,
A n halɛ ca kpɩɩsɔ na ɔɔ sidumõ cʋʋ.
5 Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃, mɛr sɔ: Mɩ ɩɩrna fɛr dɩphã Nɩnɩvɩ dɩɩ!
Ma pur fer maakurokɛrɛ fɩ saanɩ ɩ̃ jʋʋna ɩ̃ dana pelela,
Sɩ ɩ̃ nɩna afɩ sãɓɔlɔ̃ ca kpɩɩsɔ,
Ɩ̃ nɩna dakha gɩrɛ n kɔ fɩnɩ yicuru jamana dɩ kpɩɩsɔ.
6 Ma mamarã fɛr gɩrɛ n kɔnɩ ƴɔ̃ƴʋɔnɛ,
A na kʋɛ fɩ ire,
Ɩ̃ carã fɩ tɩbɩla fɛw na n hɩɩn.
7 Dɩ tibil wo tibilikɛ na yɛ fɩnɩ na car na jal ƴɔɔ fĩi,
Sɩ a na n so aa: Nɩnɩvɩ dɩɩ wɩɛlɛ koe!
Amɛ na jɩɛnɛɛ bʋɔra ya nɛ?
Nɩnɩvɩ yaa, kana wa yɩ tɩbɩla wɩ ɩ̃ wɩ ƴɔl fɩ haar?
Nɩnɩvɩ dɩɩ na gaarɛ No-Amɔ̃ dɩɩ kha
8 Fɛr baan No-Amɔ̃ dɩɩ ya?
Ɔr dakha, mɩɩrsɔɔ thɩ̃thɩɩn a kɔɔ ha,
Dɩ ɲɔnasɔ diirəə.
A kɔɔ hananɛ laɲʋɔn dɩɩ do bɛbɛr gʋʋ a kpalalaa,
A hana laɲʋɔn dɩɩ do go pɩɛ a diirəə.
9 Etiopi dɩɩ na Ejipiti dɩɩ kɔɔ dʋɔn ɔɔ fãgaakɛra thʋnanɩ a wabɩ ka,
Dɩ Puti dɩɩ na Lɩbɩ dɩɩ kɔɔ do ɔɔ bubulsɔ.
10 Sɩrakɛ wɩ khɩɩrɛ dɩdaraale a jalna,
A cʋʋ wɩ dɩ wɩ do dea.
Wɩ kʋʋrɛ awɩ bɩsã yɩrasɔ hʋ lee paarsɔ fɛw a faa,
Sa lɩ lɩɩ a tɩnɛna wɩrɛ dʋɔnɩ nũfesɔ,
A pɛ tɩɩ kɔ̃tɩnasɔɔra fɛw jɔrkɔ̃.
11 Fɛr Nɩnɩvɩ dɩɩ dakha, fa hire bɔ gaarɛ gɩ ho taan fɩ ɲɔ ga n kʋ fɩ.
Fa n wʋɔn dɩkhõo.
Fɛrɛ dakha fa ƴaalɛ kãakɛ fa wɔnɩ afɩ lãlaardarara.
Nɩnɩvɩ dɩɩ na hana punone a na pɩɛrna bã
12 Afɩ dɩ bɛr cɔ gbãsɔ fɛw
hor fɩgɩ thɩrʋʋkɛ sɩɛnɩ a bɩ̃.
A wɩ yɛyɛɛ dɩɩ do ʋrɛɛkɛ n ƴaalɛnɩ a kho, ɔɔ nɔra gɩ ji.
13 Yɛ afɩ sɔrasɩsɔɔkɛ fɩ hananɩ,
Khɛr bulona wɛ mɔlɔ!
Afɩ dɩ lõfonɔsɔ khɛrɛ a pɩɛr hoo afɩ lãlaardarara.
Dɔɔ hɩnɛ afɩ lo kpaladasɔ.
14 Maanɔ a cɛ ɲʋɔn phɔma a na pɩɛrna mɔ̃ lãlara na sɔbɩ fɩnɩ.
Jɩɛ gbɛbɩ afɩ dɩ bɛr go gbãsɔ gɩ tɩ.
Do jaar a sa, a ƴaalɛ muul, kɛ dɔnɩ biriki mɩdaa mɔ̃ fa mɩnɩ biriki!
15 Kɩɛra wa thii fɩ na dɔɔ,
A na kʋ afɩ too na bajɩna na ti.
Wa cɛcɛbɛ fɛr mɔ̃ toosõosɔ n cɛcɛbɛnɩ thɩ̃ɛ.
Nɩ jʋɔnɔnakɛ mɔ̃ a hɔ toosõosɔ,
A jʋɔnɔ mɔ̃ a hɔ toosõ bii!
Nɩnɩvɩdara bũburone fɛʋ
16 Afɩ ƴaƴabɩdara kɔɔ jɔrɛ a ho ƴepələ̃be ƴũu,
a hona toosõosɔɔkɛ n uboni.
17 Thɔ̃ jʋʋrdara kɔɔ jɔrɛ a ho toosõosɔ,
Dɩ afɩ thɔ̃ dodara jɔr a ho toosõ biikɛ n manɩ dãgbol bãa ie kʋ bɔɔ.
Sɩ a wire hẽ dɩ wɩ ubi fɛw,
Tibil na n jɩ ka wɩ kɔɔ jinə'!
18 Afɩ tɩɩ kɔ̃tɩ̃sɔɔra yaa Asiri jamana,
wɩ jaal wɩ hɩɩr!
Afɩ kuun khasɔɔra,
wɩ daarɛ mɛ̃!
Afɩ too bɩ̃bɩlanɛ fɛw a ha gɔ̃gɔnana,
Tibil na n kpa wɩ a jɛ woa'.
Ʋrɛ n kɔnɩ tɩbɩla maar na khiri
19 Thɩɩ na hale dɩ wa pɛ far afɩ kho sɛsɔɔrara ga,
khookɛ fɩ phɩnɩ kho kʋnanɛ gɩ!
Wɩrɛ fɛʋʋkɛ na nɩɛnɛnɩ afɩda,
Wa phor ɲɛ̃ɛ wa n pɛ far;
Gɩdonɩ amɛ hãale fa kɔɔ bɩkhɩrɔnɩ a dɛbɩ dɛba'?