Thãgbaa mɩmɩɩ waalɛ bʋɔ
7
1 Hu ! Aɲee thɩlke ca 'le mɩ thaa ya nɛr !Mɩ hor tibilikɛ jalanɩ ɩnɩ n khʋ̃ thɩr be thɩr bi khʋ̃ bɔɔ,
A hona tibilikɛ jalanɩ ɩnɩ ƴaal dɩvɛ̃ thɩr bi jaarɛ ɔbɔɔkɛ wɩ khʋnɩ pɩ,
Aa yɩ thɩ̃ɛ a na khoa';
Aa yɩ dɩvɛ̃ thɩr bi jaarɛ bɩɛllakɛ dɩ fɩgɩ thɩr bi mãa bɩɛl gɩrakɛ
Kɛ a kɔɔ hananɩ ƴaala'.
2 Tɩɩ telẽ pɩrɛ dɩɩra.
Tɩɩ sarʋ na hale bã,
Wɩ n nɔr fɛw sɩ a na kʋʋr tɩbɩla,
Wɛr fɛw bɩɛlbɩɛl n phere kha phera.
3 Wɩ jɔ puu cʋʋrɛra;
Sɩ ado bɔ cʋʋrɛra gɩ,
Jamanasɔ n yɩ foo wɩ hanɩ mɔlɔ thɩ̃ɛ;
Dɩ sogʋʋrdara na n ƴaal khor,
Tɩɩ kɔ̃tɩna dakha na n nɩna awɩ kɛbɩ cãacãa,
Dɩ mɛ̃ wɛr fɛw gbɛbɩ dɩ wa n cʋʋ thɔ̃ bɩɛlla.
4 Ʋrɛ dɔnɩ tɩɩ ɓʋɔnakɛ awɩ thɩ̃thɩɩn hʋrɛ uu,
Dɩ ʋrɛ dɔnɩ tɩɩ telẽ puuro a jɔ u thɩr phɔrɔ luu.
Wireekɛra gɩgɩla sonɩ ha ʋrɛ,
Kɛ dɔnɩ wireekɛ wa kɩɩlna nɩnɩ.
Nɛnɛ̃ nɩ hinəne yicuru.
5 Na n pɛ anɩ tibil haara'
Na n hana ha pɛrɛ anɩ kuun bɩnɔna ga.
Anɩ khɛrɩ ƴɛrarakɛ,
Na n dɔ bʋrɛ gɩrɛra nɩ n mɩɩnɩ.
6 Gɩdonɩ bikuun n beesire ɔɔ thɩ,
Bikhɩɛn n ɩɩrna lãʋ ɔɔ nɩra,
Bikuuni khɛr na n kena ɔɔ koo nɩ,
Ntɛɛ cɔdara n fire do ɔɔ lãlaardara.
7 Me wer, Thãgba Kɔ̃tɩnna mɩ kɛr ƴɩɛ pɛ,
Ma dɛɛnɛ ɩ̃ nũ pɛ Thãgbaraakɛ ɩ̃ taa n thenɩ,
Ɩ̃ Thãgba na ture ɩ̃ we.
Tujɩɩr Thãgbaa bɔjɩra
8 Fa n kãka ɩ̃dara gaa yaa ɩ̃ sodaar!
Gɩdonɩ a mɩ təə ji, ma palɛ na ɩɩr.
A mɩ ha dabirərə,
Thãgba Kɔ̃tɩn dʋɔn ɩ̃ dahɩrɛ.
9 Ma fʋrɛ haar Thãgba Kɔ̃tɩnɩ nĩkhirə,
Gɩdonɩ mɩ cʋʋraarɛ sopuu,
Gɩ dana wireekɛ a na teenɩ na pɛ mar, a kɩɩl ɩ̃ so;
A cʋʋ mɩ ɩ̃ the dahɩrɛra,
Ɩ̃ tor yire ɔɔ fɩl sar thɔna.
10 Ɩ̃ sodaar na yɩ gɛr,
Dɩ yicuru na fʋʋ,
Ɔrkɛ n kɔɔ bulene mɩnɩ aa:
«Ka Thãgba Kɔ̃tɩn afɩ Thãgbara ha?»
Ma tor ɩ̃ sodaara yire,
Wa saarʋʋrɛ nɛnɛ̃
Mɔ̃ wɩ n saarnɩ pɔɔsɔɔkɛ hanɩ hʋɛra.
11 Ga wiikɛ wa birni na mɩ anɩ gosɔ,
Ga wiile wa tɔr anɩ pɛlsɔ na pɛr.
12 Ga wirəəle,
Tɩbɩla na ther Asɩrɩ na Ejipiti dɩɩsɔra,
Wɩ the Nɩɩl mɩɩr nʋɔra, na Efɩratɩ mɩɩr nʋɔra
ʋ̃ Laɲɔnna a jal thʋ ʋ̃ Laɲɔna,
Na ʋ̃ gɔ̃gɔna a jal thʋ ʋ̃ gɔ̃gɔna,
Wa n pɔ anɩ pa.
13 Dɩɩ na kpolole gɩ do dɩdara dɔ nɔɔ,
Gɩ the awɩ cʋʋ pa puurəəkɛ wɩ cʋʋnɩ.
14 Kɔ̃tɩn, cʋɛ wa n khe afɩ too na afɩ nʋ̃khe gbol,
Afɩ tookɛra fɩ hɩnɩ,
Kɛ tɔɔnɩ kəl thɩr luu,
Karmɛl gɔ̃gɔnaa thɩ̃thɩɩn!
Dɔ wa n khʋʋl Basã bəənnə na Galaadɩ bəənnə
Mɔna wɩ n kɔɔ khʋʋlnɩ mamara.
15 Mɔna gɩ kɔɔ hanɩ wiresɔɔraakɛ sɩ thenɩ Ejipiti,
Cʋɛ wɩ wɩ yɩ ma thɩɛsɔ na yire.
16 Ca kpɩɩsɔ narakɛ awɩ puno fɛw,
Na yɩ nɛr dɩ yicuru na fʋlɛ wɩ
Wɩ ɓa nʋɔ.
Nũu na nʋʋr wɛr gbɛfɛlɛ.
17 Wa n khor thɩn si khaa,
Mɔ̃ nʋmaakɛ n haalɛnɩ na bɩnɛ n khonɩ.
Wa car na maar awɩ cɔ para a the,
Wɩ pɔ fɛr Thãgba Kɔ̃tɩn asɩ Thãgbara.
Maar na fʋlɛ wɛr,
Wa n ma fɩ.
18 Thãgba ʋmɔ̃ hãale a hona fɩ ?
Fɛr kɛ n hɛllɛ sopuu,
Dɩ fɩ faa afɩ tookɛ sɛnɩ na yiree dɩpa
Fa n fʋrɔ afɩ nĩkhi bɔɔ khorra'.
Sɩ gɩ n da farɛ dɩ fɩ nɩna afɩ bɔjɩ.
19 Bʋɔ na bire na fʋ fɩ sɛrɛra wo,
Fa therna asɩ dɩpasɔ bã,
Fa dʋʋrnanɛ asɩ sopuusɔ laɲʋɔnnɔ tɩɛr na faa.
20 Fa jɩrɛ Abɩrahamɩ məlsɔ bʋɔra,
Fɩ nɩna Jakɔbɩɩ too afɩ fɩl sar,
Mɔna fɩ kɔɔ ʋlfɛnanɩ asɩ thɩ kɔ̃tɩ̃sɔ mamara.