Kɩɩlɛɛkɛ Thãgba Kɔ̃tɩn na kɩɩlnanɩ ɔɔ too
6
1 Nɩ jɩɛ pɛ nũu gɩrɛ Thãgba Kɔ̃tɩn sonɩ. A sor aa:Ɩrɛ, a jala jɩlɛ gɔ̃gɔnaa ƴɛbʋrɔ
A kɩlɛ kɩɩlʋ na nɔ kheu,
Gɔ̃gɔ̃ bii dakha na n nɩɛ afɩ wi!
2 Gɔ̃gɔna wei,
Nɩ pɛ Thãgba Kɔ̃tɩnɩ kɩɩl nũu,
Na nɛr go kʋʋsɔɔkɛ thɩɩ dɛɛnɔnɩ,
Kɛ na dɔnɩ da tutugona ga!
Gɩdonɩ Thãgba Kɔ̃tɩn hananɛ kɩɩlʋʋ na ɔɔ too,
A hananɛ thɩmɩɩr na Ɩjɩrayɛl bɩsana.
3 A sor : "Ɩ̃ too yaa,
Aɲe mɩ cʋʋ nɩ?
Aɲera mɩ vɔɔ nɩ?
Nɩ birsene mɩ!"
4 Mɩ ti nɩnɩ Ejipiti dɩɩra a thena
A taa nɩ dee thɔmana
A pɛ nar Mʋɩjɩ na Aarɔ̃ na Mɩrɩyam wa n thɔa nɩ; gɛr gɩ ya?
5 Ɩ̃ too yaa, nɩ jɛna
Puureekɛ Moabɩ jamana Balakɩ kɔɔ tini kpɩɛrɛ a cʋʋ nɩ
Na tuurikɛ Bewɔɔrɩ bikuun Balam haanɩ.
Agɩpɩ mɩ cʋʋ nɛr dɩ nɩ kana Sɩtɩm hʋɛ phaphapha a jal dã Gɩlgal,
Dɩ nɩ yɩ
Mɛr Thãgba Kɔ̃tɩnɩ fɩl sar thɔ̃sɔɔkɛ mɩ cʋʋnɩ.
Gɩrɛ Thãgba n ƴaalɛnɩ ɔɔ toora
6 Aɲe ma gba na jɩɩlna Thãgba Kɔ̃tɩnɩ ƴɛra,
Ɩ̃ gburõkhunə Thãgba Ƴũu Pərdaarɩ ƴɛra ya fɛ?
Ɩ̃ jɩlɛna bonɩ thiinəsɔ ya ?
Ɩ̃ jɩlɛ na yɛ bɩɛl na ɓola ya?
7 Bana kena tə̃tə̃tə̃
Na niinikɛ jʋɔnɔnɩ dɩ ga n cel poo ɲɔ khaa,
Thãgba Kɔ̃tɩn n ƴaal ya?
Ɩ̃ hanaa ɩ̃ caca bɩsã
Sɩ a faa ɩ̃ dɩpa yaa?
Ɩ̃ hanaa ɩ̃ bi bɩnɔ
Sɩ a faa ɩ̃ sopuusɔ yaa?
8 Wɩ dɩɩr fɛr dɩ fɩ jɩ gɩrɛ bʋɔnɔnɩ
Na gɩrɛ Thãgba Kɔ̃tɩn n ƴaal farnɩ;
Gɛr dʋɔn fa n cʋɛ gɩrɛ telenenɩ,
A na cʋɛ fɩl sarʋ,
A na ɩrɛ na dɩbara jor afɩ Thãgbara.
Thãgba na pɛr gõgolõdarara sor.
9 Thãgba Kɔ̃tɩn n mɩɩnanɛ dɩdara.
A na taarɛ ʋrɛ n maanɛɛnɩ.
Nɩ pɛ nũu yaa, Judaa too,
Nɛrɛ fɛʋʋkɛ kpanɩ a der le dɩɩra.
10 Ma punone na tu
Tɩɩ puusɔ n hana awɩ cɔsɔ,
Lẽle thɩ̃ɛsɔɔkɛ wɩ 'lɛnɩ,
Na thɩ̃ mɩ̃ɛdasɔɔkɛ na telenena', kɛ n kɔ mɩnɩ nĩkhii ya ?
11 Wɩrɛ n mɩɛnɛnɩ thɩ̃ɛ na thɩ̃ mɩ̃ɛdaasɔɔkɛ na sarana',
Kɛ n hananɩ awɩ lokara thɩ̃ mɩ̃ɛdaasɔɔkɛ wɩ n yunənɩ,
Ma gbaar wele wɩ do mar dɩpa 'leedara ya?
12 Dɩɩkɛɛ lẽledasɔ n khor fãga tɩbɩlala,
Ɔɔ too n kuure sɔ̃sɔ,
Awɩ delẽbisɔ hinenə fɩɩlɛ.
13 Dɩ gɛr gɩ ma ber ner
Ma pɛ narɛ khoo
Ma bũburõ ner gɩ do anɩ sopuusɔ dɔ nɔɔ.
14 Nɛrɛ, na n khor dikor sɩ na hiə',
Kɔmɛr na hale anɩ thɩ̃thɩɩn 'lo.
Na n phɔmɩnɛ dɩkɔ
Sɩ ga toa'.
Dɩ a nɩ phɔmɩ thɩ̃doo,
Ma ber kʋʋr na pɛ nar,
Kokena n khɩɩ gɩ fɛw.
15 Nɛrɛ, na diire,
Sɩ na kha ga.
Na tiri olɩvɩ niin
Sɩ na hana niin a na thirə'.
Na cʋ̃ɔnɛ dɩvɛ̃ thɩr be,
Sɩ na 'lɛ dɩvɛ̃ na ɲɔa'.
16 Nɩ gbaar Omɩrɩ jamanaa kpam.
Dɩ na n kpana ɔɔ bikuun Akabɩ na ɔɔ cɔdaraa fɩla;
Dɩ gɛr gɩ, ma bũburõ ner.
Ma cʋʋ nɛr dɩ na do maan nɔɔ,
Nɩ hinə yicuruukɛ dɔnɩ ɩ̃ too fɛʋʋda.