Dɩɩraakɛ taadaar thenɩ
5
1 Fɛr Bɛtɩlɛhɛm Efɩrata,Fɛrɛɛkɛ 'lunoni jɔɔ Juda dɩ jɔjʋɔɔ thɩ̃thɩɩn,
Afɩ pa
Ʋrɛ na n thɔɔnɩ Ɩjɩrayɛl ɩ̃ irə na the.
A kɔɔ hale kɛkɛkɛ mamara, sɩ thɩɩ na kɔɔ ti pa'.
2 Thãgba na bor ɔɔ too na faa
Gɩ dana bɔɔkɛ khɛrɩkɛ teananɩ a kɔna kũubirə na kʋɔnɩ,
Dɩ ɔɔ omɩsɔɔkɛ wɩ fʋlɛnɩ jalna dɩ kpɩɩra, kɛ sɛnɩ na yire,
Na kɛrɛ na bir Ɩjɩrayɛl bɩsã welela sɛnɩ.
3 Dɩ a na ɩɩrɛ a na n khe wɩ
Na Thãgba Kɔ̃tɩnɩ fãga,
Na Thãgba Kɔ̃tɩn ɔɔ Thãgbaa i ɓɔ̃.
Dɩ wa toore ba na ha ɩɩ
Gɩdonɩ a fʋna nɛnɛ̃ɛkɛ,
Wa n dɩbʋʋrɛ gɩ dana ka thɩɩ khuni.
4 Ɔr na n 'laanɛ ha ɩɩ.
Ado Asɩrɩdara ɩ̃ a lõ sɩ dɩɩra,
Ado wɩ lõ asɩ jamana cɔsɔɔra,
Sa tire nʋ̃ khɛ makoɲɔ
Na kɔ̃tɩna makõther wɩ kena wɩ.
5 Dɩ wa n kʋmadɩrɛ Asɩrɩ dɩɩ na bajɩna
Na Nɩmʋrɔdɩɩ dɩ na khalʋ.
Dɩ mɛ̃ a na taa sɩ Asɩrɩdaraa ɲɔ̃kɔɔ
Ɔbɔɔkɛ wa lõ sɩnɩ dɩɩra,
A na lõ asɩ dɩ thɩra.
6 Dɩ Jakɔbɩɩ məlsɔɔkɛ sɛnɩ na yire
kɛ hanɩ ca jɔjʋɔɔ thɩ̃thɩɩn,
Na hor mɩ̃ɛɛkɛ thɛnɩ Thãgba Kɔ̃tɩnɩ pa,
Wɩ hor thãgba ɲʋɔnɩkɛ n pɛnɩ hʋɔnna.
Ga n the tibilii pa ga,
Ga do tibil n 'laana'.
7 Jakɔbɩɩ məlsɔɔkɛ na sɛnɩ na yire na har caarsɔɔ thɩ̃thɩɩn,
Wa har ca jɔjʋɔɔ thɩ̃thɩɩn
Mɔ̃ sidũ'ũu n hanɩ nʋmanaakɛ hanɩ thɩr luu,
Na mɔ̃ sidũ'ũ ɓolʋ n hanɩ nʋ̃ yɩraa thɩ̃thɩɩn;
Ɔbɔɔkɛ a n kanɩ, a n fʋlɛlɛ nʋma dɩ cɛcɛbɛ wɩ,
Sɩ tibil na n hale dɩ taa wɩ dɩ faga'.
8 Ɩjɩrayɛl,
Ɩrɛ a kɛna afɩ sodara,
A bũburone afɩ lãlaardara fɛw!
1
Thãgba na bũburone mɔlɔ kpɩɛr dɛ̃ɛ paarsɔ
9 Ga wirəəle,
Ma bũburone anɩ gãgosɔ anɩ thɩ̃thɩɩn,
Ɩ̃ bũburona anɩ koke hotorosɔ.
Mɛr Thãgba Kɔ̃tɩn, mɛr sɔ.
10 Ma bũburone dɩ kɔ̃tɩnaakɛ hanɩ anɩ dʋɔ
Ɩ̃ wɩɛrna anɩ dɩ bɛr cɔ gbãsɔ;
11 Ma bũburone sidumo thɔmasɔɔkɛ nɩ n cʋʋnɩ
Dɩ na hana dɔdɔɔdaar anɩ dʋɔ bã.
12 Ma bũburone anɩ thɩ̃thɩɩn anɩ thɩlsɔ na anɩ boka gbuunəsɔ,
Dɩ na bir na gburõkhu thɩ̃ɛsɔɔraakɛ anɩ ɲɛ̃ cʋʋnɩ bã.
13 Ma phɩɩrɛ anɩ thɩ̃thɩɩn Asera thɩl gãasɔ a na faa,
Sɩ ɩ̃ bũburõ anɩ dɩsɔɔ.
14 Ma tiire helu na nĩkhii na nĩkhi khɩɩ
Caarsɔɔraakɛ na pɛ mɩnɩ nũə'.