Jerujalɛm na bire na do ha ie dɩɩ.
4
1 Wi bɩɛl na daanDɩ gɔ̃gʋ̃ɔɔkɛ wɩ mɩrɔnɩ Thãgba Kɔ̃tɩnɩ cɔ,
Na jɔ gɔ̃gɔna fɛw,
A na gbaan gɔ̃gɔ̃ biisɔ ɓibi,
Dɩ caarsɔ na n curre le girgirgir.
2 Ca jɔjʋɔ bərəəm na n mɩɩrɛ wa n jalna le aa:
Nɩ ɩna sɩ jʋʋn Thãgba Kɔ̃tɩnɩ gɔ̃gɔna,
Sɩ jala Jakɔbɩɩ Thãgbaa cɔra,
A na n dɩɩr sɩ ɔɔ fɩlsɔ,
Sa n ɩɩr ɔɔ hʋsɔɔra.
Gɩdonɩ Sɩyɔna jɔfʋ na the
Jerujalɛmna Thãgba Kɔ̃tɩnɩ thɩmɩɩ na the.
3 A na dor sokɩɩldaar ca jɔjʋɔra
A do sokuurdaar caarsɔɔraakɛ hananɩ punone,
Kɛ thɛnɩ nakɛ ƴɔɔ fĩi
Dɩ wa gbaar awɩ bajɩnasɔ a na be gɩ do na sũgbu be.
Wɩ be awɩ kpɩlasɔ gɩ do hɔ̃ khabɩdaasɔ.
Caar na ɩɩr a bir a na n kena ʋ̃ ca bã.
Dɩ tibil na bir a na n dɩɩr ko kɩɩr kpɩɩ bã.
4 Tɩbɩla fɛw bɩɛlbɩɛl na n toore ntɛ ɔɔ dɩvɛ̃ thɩr kɩrɔ na ɔɔ fɩgɩ thɩr kɩrɔ,
Sɩ tibil na hale na kʋ wɩ maara';
Mɛr Thãgba Kɔ̃tɩn kokenaa kɔ̃tɩ̃ mɛr mɩa.
5 Ca kpɩɩsɔɔra fɛw,
Ca dɔɔ n nɩrɛ ɔɔ thãgba nũu,
Se wer, Thãgba Kɔ̃tɩn asɩ Thãgba
Sa n nɩ nũu bɔɔ khorr.
Thãgba Kɔ̃tɩn na kpa wɩrɛ wɩ fʋlɛnɩ jalna dɩ kpɩɩra a na gbɛbɩ.
6 Ga wirəəle,
Ma kpar wɩrɛ n sʋʋrɛnɩ,
Ɩ̃ kpa wɩrɛ wɩ fʋlɛnɩ jalna dɩ kpɩɩra ɩ̃ gbɛbɩ,
Kɛ dɔnɩ wɩrɛkɛra mɩ kɔɔ hʋɔlɔnɩ jɔɔ.
Mɛr Thãgba Kɔ̃tɩn, mɛr sɔ.
7 Dɩ ma cʋʋrɛ wɩrɛ n sʋʋrɛnɩ
Dɩ wa sɩ na hana yire,
Ɩ̃ cʋʋ wɩrɛ wɩ fʋlɛnɩ a jalna dɩ kpɩɩra,
Wɩ do caarɩkɛ hananɩ punone.
Dɩ mɛr Thãgba Kɔ̃tɩn na do warɛ jamana Sɩyɔ̃ gɔ̃gʋɔnɔ,
A fʋna nɛnɛ̃ na bɔɔ khorr.
8 Sɩ fɛr, Jerujalɛm gɔ̃gʋɔn
kɛ n bɛranɩ tɩbɩla mɔ̃ nʋ̃ khee n bɛrnɩ ɔɔ nʋ̃sɔ.
Fɛr Sɩyɔ̃ dɩ bɔbʋɔ
Afɩ dakpɛ dookɛra fɩ kɔɔ donɩ mamara,
na kɛrɛ na bir far.
Jamana dʋʋr na dor fɛr Jerujalɛm dɩ bɔbʋɔɔda.
9 Aɲe gɩ nɛnɛ̃ dɩ na n be hulẽbe ?
Na hana jamana anɩ pa gaa?
Anɩ fɩl 'laadasɔ khiire ya ?
Aɲe gɩ dɩ na n gaar a ho khɛrɩkɛ n walanɩ ?
10 Sɩyɔ̃ dɩ bɔbʋɔɔ too, nɩ gaarɛ a na sɛna
Gɩ ho khɛrɩkɛ n walanɩ
Gɩdonɩ nɛnɛ̃ na ther dɩɩra
Na n cɔ hʋɔnɔ,
Na jaal phaphapha nɩ dã Babɩlɔn.
Le na 'lɛ taarɛ;
Dɩ liir Thãgba Kɔ̃tɩn na birse nɩ
Anɩ sodaraa ɲɔ̃kɔɔ.
11 Nɛnɛ̃ wer ca jɔjʋɔ kpar a dii nar dɩ wa n so aa:
«Awɩ dɩ n kʋɛa,
Sɩyɔ̃ dɩɩ n kʋɛa sɩ toro yire!
12 Sɩ wa jɩ Thãgba Kɔ̃tɩnɩ kpɩɛra'
Wa jɩ ɔɔ ƴaalsɔ
Wa jɩ a kpa wɛr gbɛbɩ mɔ̃ wɩ n gbɛbɩnɩ jʋ le jʋ gbʋʋlɔa'.
13 Sɩyɔ̃ dɩ bɔbʋɔɔ too,
Nɩ ɩrɛ a bɛ wɩ mɔ̃ wɩ n benɩ jɔ!
Ma cʋʋ nɛr nɩ hana fãga
Mɔ̃ naakɛ hananɩ ther ʋma n hanɩ;
Ɩ̃ cʋʋ anɩ nɔsɔɔrɛsɔ n do ther sɩɛ.
Na cʋ̃baanɛ ca jɔjʋɔ.
Na gbaar thɩ̃ɛsɔɔkɛ nɩ taanɩ kʋʋrra
Gɩ do mɛr Thãgba Kɔ̃tɩnɩda;
Nɩ gba awɩ lẽle thɩ̃sɔ gɩ do mɛr thɩɩ fɛʋʋ Kɔ̃tɩ̃.
14 Nɛnɛ̃, nɛr Jerujalɛm kokena,
Nɩ lɩɩrɛ tomɩra
Nɩ kpa jɛ !
Wɩ sɔɔ sɛr;
Wɩ ber Ɩjɩrayɛl thɔthɔɔdaar gbʋara
Na gbʋʋl.