Jerujalɛm na pɛ Kɔ̃tɩn nũə'
3
1 Ga puurore dɩɩraakɛ ɩrɛnanɩ lãʋ,kɛ cʋɛnɩ kpɔ̃kpɔrɔnɛ,
A dona dɩɩkɛ n hʋɔlɛnɩ.
2 Gɩdonɩ aa pɛ Thãgba nũə',
Aa tu dɩɩra',
Aa pɛ haar Thãgba Kɔ̃tɩnna ga,
Aa wɔrɔ̃ ɔɔ Thãgba ga.
3 Ɔɔ tɩɩ kɔ̃tɩ̃sɔɔkɛ a hananɩ,
sidũ'ũsɔɔ wɛ dɩ wa n ulo,
Dɩ ɔɔ sogʋʋrdara do dʋɔr sɩɓɛlɛ̃sɔɔkɛ
na n khɔnɩ thɩ̃ɛ sa sɩ thɩɩn gɩ do duurdaa ga.
4 Ɔɔ Thãgbaa mɩmɩɩsɔ, i ƴaaldara wɛ,
Na tɩɩ fɩɩldara.
Dɩ ɔɔ bonɩ jidara na n ƴɔ̃ƴɔ̃ɔ thɩ̃ phuusɔ,
Dɩ wa n kʋɛna jɔfʋ.
5 Sɩrakɛ Thãgba Kɔ̃tɩnɩkɛ telenenɩ hale ɔɔ thɩ̃thɩɩn,
Aa n cʋʋ thɩ̃ gõgolõa'.
Duuro wo duuro, mɛ̃ a n nɩna ɔɔ fɩl sar, a n sɩrɔa',
Sɩrakɛ yicuru na n fʋ tɩɩ gõgolõa'.
6 Thãgba Kɔ̃tɩn sor aa:
Mɩ bũburone ca kpɩɩsɔ,
A wɩɛr awɩ dɩ bɛr cɔ gbãsɔ.
Mɩ kʋɛrɛ awɩ hʋsɔ a faa,
Tibil na n kana gɩ bã.
Awɩ dɩsɔ kpolole, tibil na hala',
tibil na n cɔrɔa'.
7 Mɩ kɔɔ sor mɩɩ:
Adora nɛr Jerujalɛmdara kɔɔ hana marɛ maar,
Adora nɩ n kɔɔ turi dɩɩrɛ,
anɩ pa na bũburõə'
gɩrɛ fɛʋkɛ mɩ kɔɔ sonɩ na dã na',
Sɩ nɩ n ka jɩɛ phana a cʋʋ puure na dɛɛnɔ.
8 Gɛr gɩ, na n pɩɛrɛ mɩ,
wireraakɛ ma ɩɩrna nɩnɩ,
a na khɩɩ nɩ thɩ̃ɛ.
Gɩdonɩ mɩ tire kpɩɛrɛ ma kpar
ca kpɩɩsɔ a na gbɛbɩ pa bɩɛl,
Ɩ̃ kpana jamana dɩɩsɔ ɩ̃ der pa bɩɛl,
ɩ̃ deer war ɩ̃ nĩkhi khe,
Kɛ dɔnɩ nĩkhiikɛ phʋrɔnɛnɩ kpõkpõkpõ.
Gɩdonɩ ɩ̃ gbugi dɔ na thiire thɩɩ fɛw.
Mɛr Thãgba Kɔ̃tɩn, mɛr sɔ.
Thãgba na bire na debi caar fɛʋ thɩɩra wɩ ha mɔ̃ a n ƴaalnɩ.
9 Agɩpɩ, ma phʋɔlɛ caarsɔɔ delẽbisɔ,
Gɩ do nɔɔ wɛr fɛw na n fʋɔr mɛr Thãgba Kɔ̃tɩn,
Wa n dona mar thɔma na kpɩɛr bɩɛl.
10 Dɩ ɩ̃ fɔfʋɔrdasɔ, ɩ̃ tookɛ kɔɔ bɩ̃bɩlanɛnɩ,
A ha Etiopi mɩɩr seer bilosɔ, wa ɩnanɛ khaardaasɔ wa n ha mɩ.
Ɩjɩrayɛl caarɩkɛ na sɛnɩ na dor hɛlɛlɛ fɩldara
11 Ɩ̃ too wei,
ga wiile, gɩrɛsɔraakɛra nɩ n kɔɔ ɩɩrnanɩ lãʋ mɛrɛra,
ga bir na fʋ nɩ yicuru bã.
Gɩdonɩ ga bɔɔle, ma hɛlɔlɛ wɩrɛɛkɛ dɔnɩ dɩbara dʋbɩdara anɩ thɩ̃thɩɩn.
Dɩ fa bir na fʋrɔ i ƴaalɛ ɩ̃ gɔ̃gɔ̃ phurə bã.
12 Tɩbɩlaakɛ dɔnɩ hɛlɛlɛ fɩldara na bɔdara,
Dɩ wa n ƴaal bɛrɛ mɛr Thãgba Kɔ̃tɩnna,
Wɛr ma sɩrɔ wɩ too anɩ thɩ̃thɩɩn.
13 Ɩjɩrayɛlɩ məl wɩrɛ na sɛnɩ na yire na bir na cʋʋ thɩ̃ gõgolõ bã,
Wa sõso bã,
Fɩ̃fɩɩl thɩmɩa na the wɩ nʋɔra 'lo bã.
We wer, wa khor dɩkɔ, sɩ wa n phɩ̃ ba,
sɩ tibil na pɛ war maara'.
14 Mana na bɛna hulẽbe yaa, Sɩyɔ̃ dɩ bɔbʋɔ !
Na n bɛ da hulẽbe, Ɩjɩrayɛlɩ too!
Hana daʋra, a na kãkanɛ na haar fɛw ya Jerujalɛm dɩ bɔbʋɔ!
15 Gɩdonɩ Thãgba Kɔ̃tɩn sɩrɔrɛ kɩɩlʋkɛra kɔɔ telene fɩnɩ,
A tinəne afɩ lãlaardaar dɩ fuu.
Thãgba Kɔ̃tɩnɩkɛ dɔnɩ Ɩjɩrayɛlɩ jamana hale nɛnɛ̃ afɩ thɩ̃thɩɩn,
Fa n do maar n fʋ fɩ puurera 'lo bã.
16 Ga wiile wa sor Jerujalɛm dɩɩra a na yɩ wɔɔ:
Fa n do maar n fʋ fa'!
Sɩyɔ̃, fa n do ɲɛ̃ khiir fa' !
17 Thãgba Kɔ̃tɩn afɩ Thãgba dʋɔn kuun khaakɛ n taanɩ,
A ha kha na fɛrɛ,
Daw fʋʋrɛ da n kãka dɩɩ do fɛr dɔ nɔɔ.
A pɩrɛ nʋɔ kɩrkɩrkɩr,
gɩdonɩ a na fɛr dɩɩ pho ka.
A n kãkarɛ na da hulẽbe dɩɩ do fɛr dɔ nɔɔ.
18 Wɩrɛɛkɛ kɔɔ hʋnɔnɛnɩ na kpa jɛ kɔ̃tɩnasɔɔkɛ n cʋɛnɩ, a ha gbobirera,
Na wɩrɛɛkɛ kɔɔ tɔɔnɩ a hʋnɔna fɩ ya Jerujalɛm,
Kɛ heenəni yicuru hẽeda khaa dɩ ga n nɩ wɩ, ma bire na kpa wɩ na gbɛbɩ pa bɩɛl.
19 Hɩnɛ ga bɔɔle, ma ɩɩrnanɛ wɩrɛ fɛʋkɛra n kɔɔ hʋɔlɛnɩ afɩ toora,
Ma taarɛ wɩrɛ wɩ khaarnɩ nɛɛ dɩ wa n sʋʋr.
Ɩ̃ kpana wɩrɛɛkɛ wɩ kɔɔ weelenɩ faa ɩ̃ gbɛbɩ pa bɩɛl.
Ma cʋʋrɛ wa n khɩɩ wɩ,
Ɩ̃ cʋʋna wɩ wɩ the ire paar fɛw thɩɩra, kãkɛ wɩ kɔɔ pɛ warnɩ yicuru.
20 Ga bɔɔle ma cʋʋ nɛr nɩ bir nɩ kɛr nɩ ɩ̃,
Gɛr na dʋɔn bɔɔkɛra ma birni a na kpa nɩ na jɛ.
Gɛr na dɔ bɔɔkɛ ma cʋʋ nɩnɩ nɩ the ire, nɩ 'lɛna khɩɩrɛ caar fɛʋkɛ hanɩ thɩɩraa thɩ̃thɩɩn.
Gɩdonɩ ma cʋʋrɛ dɩ thɩ̃ɛ na fi a na bir na bɔ nar mɔ̃kɛra gɩ kɔɔ hanɩ fʋ paar nɩ toro yire.
Mɛr Thãgba Kɔ̃tɩn, mɛr sɔ!