Thãgba Kɔ̃tɩn bũburone punoda kpɛna
11
1 Lɩbã, khɛrra afɩ lõsɔ,sɩ dɔɔ n hɩ̃ afɩ sɛdɩrɩ thɩrsɔ.
2 Na n orone sɩpɩrɛsɩ thɩra,
gɩdonɩ sɛdɩrɩ thɩra jiire;
Wɩ wɩɛrɛ thɩr ɓɔ̃ caarsɔɔle.
Na n orone sɛn thɩrasɔɔkɛ hanɩ Basã bəənnə,
Gɩdonɩ anɩ luukɛ na kɔɔ hanɩ lʋʋna ga wɩɛrɛ.
3 Nɩ pɛ bana khɛɛ khɩɩ nũu,
Gɩdonɩ awɩ thɩ̃ ɓɔ̃ kʋɛrɛ.
Nɩ pɛ sidũ'ũ ɓolaa oor nũu;
Gɩdonɩ Jʋrdɛ̃ poo lu ɓɔnasɔraakɛ wɩ hanɩ wɩɛrɛ.
Bana kheda bʋɔ na bana kheda puu
4 Thãgba Kɔ̃tɩn ɩ̃ Thãgba so marɛ thakɛ ayɩ:
Na khɛ banaakɛ tɔɔnɩ kʋkʋʋr togʋʋ.
5 Wɩrɛ n thɛ wɩnɩ n kʋʋr wɛr sɩ ga n so wɩ thɩ̃ɛa'.
Dɩ wɩrɛ fɛw n dolone wɩnɩ n sor:
Thãgba Kɔ̃tɩn hɩna fʋɔrɛ, gɩdonɩ mɩ ler.
Sɩ bʋɔ na n fʋ awɩ khekhesɔɔrakɛ awɩdara ga.
6 Bʋɔ na fʋ mɩ dakha tɩbɩlala thɩɩra bã,
Mɛr Thãgba Kɔ̃tɩn sɔ.
Ma gbaar tɩbɩla fɛw bɩɛlbɩɛl ɩ̃ dʋ
ntɛ ʋrɛ khonəənɩɩ ɲɔ̃kɔɔ,
Na ɔɔ jamanaa ɲɔ̃kɔɔ,
Dɩ jamanasɔ na kʋɛrɛ thɩɩ bʋrabʋrabʋra,
Sɩ ma taa tibil awɩ ɲɛna ga.
7 Gɛr gɩ dɩ ma n khe banaakɛra nʋ̃ thɛ thɩɩnɩ kʋkʋʋr thɩɩnʋ. Dɩ mɩ gbaar nʋ̃ khe gbolla yeɲɔ, a dʋ bɩɛl ire Bɔjɩɩr sɩ ma n we ole 'Likha. Sɩ dɩ ma n khe wɩ. 8 Sɩpo bɩɛlla, mɩ weere awɩ khekhesɔɔ yẽther a faa. Agɩpɩ ɲɛ̃ɛ khiir mer banaana, dɩ wɛr dakha, dɩ̃ yaa wɩ. 9 Dɩ mɩ sor banaana: Ma khe nɩ baana'. Ʋrɛ n kheni a khe, ʋrɛ n boni a bo. Dɩ wɩrɛ na sɛnɩ, a wɩ n kʋʋrɛ kha wa n kʋrɛ kha. 10 Dɩ mɩ gbaar ɩ̃ gbolɩlera n dɔnɩ Bɔjɩɩr, a khaar ɩ̃ kʋɛ nɔ bɩɛl ʋlfɛrɛɛkɛ mɩ kɔɔ ʋlfɛnanɩ caar fɛw. 11 Dɩ ʋlfɛrɛɛlera kʋɛrɛ ga wiilera. Dɩ mɛ̃ bana theda wɩrɛ n kɔɔ ɔ marnɩ jɩ dɩ Thãgba Kɔ̃tɩnɩ thɩmɩɩ kɔɔ gɩ. 12 Dɩ mɩ so warɛ ayɩ: Ado nɩ yɩɛrɛ dɩɩ tee kha, nɩ hana mɩ ɩ̃ lɩmɩ; sɩ a ga tee kha woa' na n lɩma'. Dɩ wɩ there dɛ bulo be kpelẽ yʋɔr a lɩmɩ mɩ. 13 Dɩ Thãgba Kɔ̃tɩn so mar: Gba lɩmɩ nʋɔlera wɩ kpɩɛnɩ gɩ kɔ̃tɩnɛ ka dɩɩ do gɛr dɔ ɩ̃ the nɔ, a hana phube. Dɩ mɩ gbaar dɛ bulo be kpelẽ yʋɔrɩlera a jalna ha phube Thãgba Kɔ̃tɩnɩ fʋɔr cɔra. 14 Agɩpɩ mɩ khaarɛ ɩ̃ balaɲɔ gbolɩɩle n dɔnɩ 'Likha, ɩ̃ kuur omɩ dʋʋr Juda na Ɩjɩrayɛldarara.
15 Thãgba Kɔ̃tɩn bire so mar wo ayɩ: Birə cʋɛ gɩ ho bana khe də̃bəl ha fɩ. 16 Hɩnɛ ma thɔnanɛ bana kheda phaa kɛ dɩɩra: A na hɩɩn bana wɩrɛ n khiirenə', a na ƴaal bana wɩrɛ burenə', a na haan bana wɩrɛ hananɩ khoa', a na ha wɩrɛ khɩɩnɔnɩ dikora'; sɩ a na n khor wɩrɛ khɔnanɩɩ nʋ̃sɔ, a na n kpokpoosɩna awɩ nɔ sɔɔrɛsɔ.
17 Ga puure bana kheda
də̃bəllaakɛ n bɔnɩ ɔɔ bana dɩ faa
Bajɩna n gʋɔ ɲɔɔna
Na ɲɔ̃bɔ yirerə.
Ɔɔ ɲɔ̃ n khe fɛw.
Ɔɔ ɲɔ̃bɔ yi n khorone.