Thãgba Kɔ̃tɩn dɩbara n 'laanɛ thãgba nyʋɔn
10
1 Nɩ bɩɛlɛ Thãgba Kɔ̃tɩn a cʋɛ thãgba ɲʋɔn n ɩ̃bɔɔraakɛ thãgba ɲʋɔn teenanɩ gɩ ɩna.
Ɔr n cʋɛ dɩ thãgbaa jõ a ɩ̃,
dɩ a na n ha nɛr thãgba ɲɔ kɔ̃tɩna
dɩ a na cʋʋrɛ thɩ̃ phulole n bɔr tɩbɩla fɛw bɩɛlbɩɛlɩ lɔɔ.
2 Sõso thãgbasɔɔkɛ nɩ n jalɔnɩ n sõsʋʋr
dɩ wa n ha nɩ;
Bobona n yɩrɛ gɩrɛ na dɔnɩ sobɔra'
Dəəlesɔɔkɛ wɩ n mɩɛnɩ na n hana kɩrʋa'
Ha ƴɔlɛɛkɛ wɩ n 'laanɩ, fɩɩlɛ gɩ
Gɛr gɩ dɩ tɩbɩla buur a ho nʋma
Dɩ wa n kʋ bʋɔ gɩdonɩ wa hana khekha'.
Thãgba Kɔ̃tɩn na birnəne ɔɔ too
3 Nĩkhii fʋ mɛr nʋ̃khe puusɔraakɛ ƴaalɛnɩ
wa n thɔa ɩ̃ too.
Gɛr gɩ ma pɛr bʋkenanaale sor.
Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃,
ma teere na pɛ ɩ̃ toora, kɛ dɔnɩ Judaa məlsɔ.
Ma cʋʋ wɛr dɩ wa ho mar koke gãgo bʋɔ kʋʋra.
4 Judaa məlsɔɔra kɔ̃tɩ̃ caar fɛw na the.
Wa hananɛ fagã mɔ̃ go nɔ bokaar n hanɩ,
wɩ khɩɩr kpabire khaa,
wɩ khɩɩr dakha mɔ̃ koke thaa hanɩ.
5 Wa hor nakalãtusɔ.
Kʋʋra wa saarɛ wɩrɛ n kɛ̃kɛrɛna wɩnɩ,
Mɔ̃ wɩ n saarnɩ pɔsɔ hʋɛra.
Thale wa kɛ̃kɛrɛ̃
Gɩdonɩ mɛr Thãgba Kɔ̃tɩn har kha na wɛr.
Dɩ lãlaraakɛ jʋnɛnɩ gãgosɔɔra
Na dor yicur haar.
6 Ma har Judaa məlsɔ fãga,
Ma taarɛ Ɩjɩrayɛlɩ məlsɔ
Ɩ̃ kɛrna wɩ awɩ pa,
Gɩdonɩ bʋɔ fʋ mɛr wɛra
Dɩ ga bire na horakɛ ma kɔɔ dʋna wɩ faga;
Gɩdonɩ mɛr dʋɔn Thãgba Kɔ̃tɩn awɩ Thãgba,
Ma ture awɩ bɩɛlsɔ.
7 Efɩrayɩmɩ məlsɔ na dor nakalãtusɔ;
Wa hananɛ daw gɩ ho mɔ̃ wɩ n ɲɔnɩ dɩvɛ̃ dɩɩ ha.
Ɔbɔɔkɛ awɩ bɩsãsɔ na yɩ wɩnɩ thale, wa n kãkarɛ,
Daw na ka warɛ gɩ do Thãgba Kɔ̃tɩn dɔ nɔɔ.
8 Ma we wer a na kpa wɩ na jɛ,
Gɩdonɩ mɩ ƴaalɛ ɩ̃ taa wɩ,
Dɩ wa lerre mɔna wɩ kɔɔ lernɩ mamara.
9 Ma bɩ̃bɩlã wɛr ca kpɩɩsɔɔra
Dɩ mɔ̃ wa hanɩ ƴɔɔrakɛ
sɩ wa jɩna mɛr.
Wa toore le na awɩ bɩsãsɔ,
Agɩpɩ wa kɛrɛ na ɩ̃.
10 Ma cʋʋ wɛr dɩ wa the
Ejipiti dɩɩra na Asɩrɩ dɩɩra,
ɩ̃ kpa wɩ ɩ̃ jɛ
Ɩ̃ cʋʋ wɩ wɩ bir Galaadɩ bəənnə na Libã bəənnə.
Sɩ liisɔɔrakɛ paar na dã wa'.
11 Wa iire ha kʋɛ laɲʋɔn,
Ma ber laɲʋɔnnɩkɛ n ubəni sɩ dɩ ga n ji;
Nɩl mɩɩr thɛrɛrakɛ na khɩrɛ;
Gɩrɛ dɔnɩ Asɩrɩɩ i ƴaalda n wɩɛl,
Dɩ Ejipitiɩ puno na hale bã.
12 Ma har ɩ̃ too fãga,
wa n ɩɩr na ɩ̃ i
Mɛr Thãgba Kɔ̃tɩn sɔ.