Thãgba Kɔ̃tɩn ƴaalɛ a bɔna ɔɔ too
8
1 Thãgba Kɔ̃tɩnɩkɛ dɔnɩ kokenaa kɔ̃tɩ̃ so marɛ thakɛ ayɩ: 2 Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃ sor thakɛ ayɩ wɔɔ: Mɩ nar Jerujalɛm na naʋkɛ huloneni, ɔɔda lõ mer haar ga ha kpãkpalã ga. 3 Gɛr gɩ dɩ mɛr Thãgba Kɔ̃tɩn so ayɩ: Mɩ n kɛrɛ na bir Sɩyɔ̃, Jerujalɛm dɩ bɩnɔ ma n cɔ. Wa n wer Jerujalɛm fɩl sar dɩɩ, sɩ wa n we Sɩyɔ̃ gɔ̃gʋ̃ɔɔkɛ dɔnɩ ɩ̃da, mɛr Thãgba Kɔ̃tɩn kokenaa kɔ̃tɩ̃ɩ gɔ̃gɔ̃ phu.4 Mɛr Thãgba Kɔ̃tɩn kokenaa kɔ̃tɩ̃ sor ayɩ: Kuun kɔ̃tɩna na khɛr kɔ̃tɩnaakɛ n gbuoni gbʋʋl dɩɩ do mɔ̃ wɩ tɩnɩ ka dɔ nɔɔ, na bire na ha Jerujalɛm wɩ too kpa jɛ paarsɔ.
5 Bɩsã kuuminə na kheminə na bire na hi Jerujalɛm wa n ɓol kpa jɛ paarsɔ.
6 Mɛr Thãgba Kɔ̃tɩn kokenaa kɔ̃tɩ̃ sor ayɩ: Ado Ɩjɩrayɛl bɩsã wɩrɛ na sɛnɩ na yire ga wisɔraale kpɩɛrɛ dɩ thɩ̃ punonə ga, ɩ̃ pa thɩ̃ punonə gɩ. Mɛr Thãgba Kɔ̃tɩn kokenaa kɔ̃tɩ̃ sɔ.
7 Mɛr Thãgba Kɔ̃tɩn kokenaa kɔ̃tɩ̃ sor ayɩ: Ma taarɛ ɩ̃ tookɛ wɩ fʋlɛnɩ jalna dɩɩsɔɔraakɛ hanɩ wi phã paar na dɩɩsɔɔraakɛ hanɩ wi lõ paar.
8 Ma kɛrna wɛr na birnə dɩ wa too Jerujalɛm dɩ bɩnɔ. Wa dor ɩ̃ too, ɩ̃ do awɩ Thãgbaakɛ dɔnɩ sobɔdaar na fɩl sardaar.
9 Mɛr Thãgba Kɔ̃tɩn kokenaa kɔ̃tɩ̃ sor ayɩ: Na n do ɲɛ̃ɛ n khiir na', nɛrɛɛkɛ n nɩɛnɛnɩ ga wisɔraakɛ thɩmɩɩ nɔ bɩɛlɩkɛra ɩ̃ mɩmɩɩsɔ kɔɔ mɩɩnɩ dabɔɔkɛ wɩ kɔɔ kpɛɛnɩ go kʋʋr, wɩ mɩ mɛr Thãgba Kɔ̃tɩnɩ fʋɔr cɔ. 10 Ga bɔsɔɔle na kɔɔ danɩ pa thɔmaakɛ tɩbɩla n cʋʋnɩ wa n 'lɛrɔ lɩmɩna', dɩ nʋmaa thɔ̃ na n 'laa dɩkha ga. Lãlaraada dor nɔɔ dɩ tibil na n kɔɔ puno na kpaar na ha ɩa'. Mɩ kɔɔ cʋʋrɛ dɩ tɩbɩla na n thʋ̃ kha fɛw bɩɛlbɩɛl. 11 Sɩ nɛnɛ̃kɛ ma cʋʋ tɩbɩlalaakɛ sɛnɩ gɩrɛ na yire mɔ̃ mɩ kɔɔ cʋʋnɩ kɛkɛra bã. Mɛr Thãgba Kɔ̃tɩn kokenaa kɔ̃tɩ̃ sɔ. 12 Ma 'laarɛ ha ɩɩ thɩɩra :
thãgbara ƴũu na 'laarɛ thãgba ɲʋɔn,
dɩvɛ̃ thɩra na n ser be,
thɩɩ na n bɔrɛ thɩ̃ɛ.
Ga thɩ̃sɔɔle fɛw ɩ̃ tookɛ sɛnɩ na yire na hɩna.
13 Judaa cɔdara na Ɩjɩrayɛlɩ cɔdara,
mɔ̃kɛ nɩ kɔɔ donɩ sɔ̃ 'lɛ paar ca kpɩɩsɔɔra
ma taa nɛr, nɩ do war bɔna 'lɛ paar ɔmɛ̃.
Na n hana maar 'lo bã; nɩ hanana 'lar.
14 Mɛr Thãgba Kɔ̃tɩn kokenaa kɔ̃tɩ̃ kɔɔ sor ayɩ: Ɔbɔɔkɛ anɩ thɩ kɔ̃tɩ̃ kɔɔ kʋ mɩnɩ nĩkhii, mɩ kɔɔ tire kpɩɛrɛ ɩ̃ cʋʋ nɩ puure sɩ ma kɔɔ debiro kpɩɛra'. Mɛr Thãgba Kɔ̃tɩn kokenaa kɔ̃tɩ̃ sɔ. 15 Nɛnɛ̃kɛ mɩ debire kpɩɛrɛ sa ti kpɩɛrɛ ɩ̃ cʋʋ Jerujalɛmdara na Judaa məlsɔ bɔɔ. Na n do maar n fʋ na'. 16 Nɩ yɛkɛ gɩrɛ nɩ teenanɩ na n cʋɛ: Dɔ tɩbɩla fɛw bɩɛlbɩɛl na n so kha sobɔr. Anɩ so kɩɩl pasɔ na n kɩlɛ kɩɩl telẽ ga n 'laa ha ɩɩ. 17 Tibil na n kpɩɛrna ɔɔ alãkha tibil kpɩɛr nɔ puə'. Na n na sõso ʋlfɛrɛsɔa', gɩdonɩ ga thɩ̃sɔɔkɛ fɛw mɩ n laa gɛr. Mɛr Thãgba Kɔ̃tɩn sɔ.
18 Thãgba Kɔ̃tɩnɩkɛ dɔnɩ kokenaa kɔ̃tɩ̃ mɩɩna mɛr thakɛ ayɩ: 19 Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃ sor ayɩ: Nɔ lirsɔɔkɛ nɩ n hananɩ yɩɛra balanã sɩpora na balamɔy sɩpora na ɲẽbe makoɲɔ sɩpora na ɲẽbe yʋɔr sɩpora na debire na do Judaa məlsɔra kãka wesɔ na da wesɔ na fɛtɩ daʋsɔ. Sɩ nɩ na sobɔr na ha ɩɩ. 20 Mɛr Thãgba Kɔ̃tɩn kokenaa kɔ̃tɩ̃ sor ayɩ: Ca kpɩɩsɔ na tɩbɩlaakɛ na thɛnɩ dɩ jɔjʋɔra na bire na pɔ Jerujalɛm. 21 Ʋ̃ʋ dɩɩ tibilsɔ na jaal na so ʋ̃ʋ dɩɩ tibilsɔɔra wɩ yɩ: Nɩ ɩna sɩ jaal sɩ bɩɛl Thãgba Kɔ̃tɩn, sɩ ƴaalna Thãgba Kɔ̃tɩnɩkɛ dɔnɩ kokenaa kɔ̃tɩ̃ɩ bɔna. Dɩ wa birse wer nayɩ: Ɔɔ sa jaal! 22 Dɩ tɩɩ jɔjʋɔ na ca kpɩɩ jɔjʋɔɔkɛ hananɩ punone dɩɩ kar na ɩnɛ Jerujalɛm wɩ ƴaal mɛr Thãgba Kɔ̃tɩn kokenaa kɔ̃tɩ̃ wɩ bɩɛlna mɩ. 23 Mɛr Thãgba Kɔ̃tɩn kokenaa kɔ̃tɩ̃ sor ayɩ: Ga wisɔraale, tɩbɩla yʋɔrɩkɛ na thɛnɩ caar dɩɩdɩɩra na awɩ ca thɩmɩɩsɔɔ dɩɩdɩɩ na fʋrɛ Juifɩ bɩɛlɩ gbɔɔlɔ̃ nɔ sɩ wɩ sʋʋraa: Sɩ n ƴaalɛ sɩ jal kha na nɛrɛ gɩdonɩ sɩ nɩɛrɛ dɩ Thãgba ha kha na nɛrɛ.