Yẽbe makõther thɩ̃ yɩr : gãgo hotoro yenã
6
1 Dɩ mɩ n hɩɩnɛ wo, a yɩ gãgo hotoro yenã dɩ wa n the gɔ̃gɔna yeɲɔɔ thɩ̃thɩɩn, kɛ hananɩ ther sɛna. 2 Dɩ wɩ kɔɔ lire gãgo sɛna caca hotorora, a li gãgo birə balaɲɔdaara; 3 a li gãgo bulona balãther hotorora, a li gãgonaakɛ ɓaanɛnɩ pal sɛna balanãdaara. 4 Dɩ mɩ bulele thɔ̃thɔ̃ thuiilera n mɩana mɩnɩ, mɩ yɩ: Kɔ̃tɩn, aɲe hotorosɔɔle na gãgonaale n nɩna? 5 Dɩ thɔ̃thɔ̃ thuiile birse mer aa: Gɛr dʋɔn jɛ caar yenãakɛ kɔɔ hanɩle ƴũu. Kɔ̃tɩnɩkɛ hɩnanɩ thɩɩ fɛw, ɔɔ ƴɛbʋrɔ jɩɛsɔɔle kɔɔ ha. Nɛnɛ̃ gɩ n ther ka gɩ kɔɔ hanɩ. 6 Dɩ hotoro ʋrɛ gãgo birə n halnɩ telene da n jal dɩɩraakɛ hanɩ ka wire na n jalnɩ dɩ pɛr ɲɔ̃bɔɔ. Dɩ hotoro ʋrɛ gãgo bulona n halnɩ na n jal wi lõ paar. Sɩ hotoro ʋrɛ gãgonaakɛ ɓaanɛnɩ pal sɛna n halnɩ telẽ da n jal dɩɩraakɛ hanɩ ka wire na n jalnɩ dɩ pɛr ɲɔ̃bɩlã. 7 Dɩ gãgonaale fɛw ther na fãga haar, wɩ jal wɩ kpaar thɩɩ wɩ fi, wɩ hɩɩn. Dɩ thɔ̃thɔ̃ thuiile so war aa: Nɩ jala kpaarɛ thɩɩ, a fe hɩnɛ. Dɩ hotorosɔɔle jaal a kpaar thɩɩ a fi, hɩɩn. 8 Dɩ thɔ̃thɔ̃ thuiile we mer a so mar aa: Hɩnɛ, wɩrɛ jalanɩ dɩɩraakɛ hanɩ ka wire na n jalnɩ dɩ pɛr ɲɔ̃bɔɔ, na cʋʋrɛ dɩ ɩ̃ thu na gbũ war.Jojue na 'lɛr i dʋbɩrɛ.
9 Dɩ Thãgba Kɔ̃tɩn mɩɩna mɛr ayɩ: 10 Jala tea khaardaakɛ wɩrɛ wɩ fʋlɛnɩ jalna dɩ kpɩɩra 'laanɩ, kɛ Hɛldayɩ na Tobɩa na Yedaya ɩnanɩ. Jala nĩikɛra Yojɩaa cɔ, kɛ dɔnɩ Sofonɩɩ bikuun, ka tɩbɩlaalera thɛnɩ Babɩlɔn a ɩ̃ jalnɩ. 11 Tea dɛ bulo na dɛɛkɛ wɩ ɩnanɩ a cʋɛ jamana kpɩɛr, a subə Jojue gbõdaar, kɛ dɔnɩ Yosadakɩɩ bikuun. 12 Agɩpɩ, sʋɔra ayɛ: Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃ sor ayɩ: Hɩnɛ kuunikɛ ɔɔ i n donɩ phulole ha kɩɛr. Dɩ ɔɔ kɩrrɔ thɩ̃ɛ fɛw na phure. Dɩ a na mɩrɛ mɛr Thãgba Kɔ̃tɩnɩ fʋɔr cɔ. 13 Ɔr na mɛ mɛr Thãgba Kɔ̃tɩnɩ fʋɔr cɔ. A na tor jamana kẽkena. A na toore ɔɔ jamana too para, a na n kʋmãdɩ; dɩ gbõdaar na toore dakha ɔɔ ɲɔ̃bɔra. Dɩ bɩɛl dʋʋr na hale awɩ thɩ̃thɩɩn. 14 Dɩ jamana kpɩɛrɩle na toore le mɛr Thãgba Kɔ̃tɩnɩ fʋɔr cɔra a na do jɩ̃jɩna thɩ̃ɛ wa n jɩnana Hɛldayɩ na Tobɩa na Yedaya, wa n jɩnana dakha Sofonɩɩ bikuuni ha bulo.
15 Dɩ tɩbɩla na ther dɩkhõo ƴɔɔ fĩi a na ɩ̃, a na mɩ Thãgba Kɔ̃tɩnɩ fʋɔr cɔ. Dɩ mɛ̃ na jɩ gɩ do Thãgba Kɔ̃tɩnɩkɛ dɔnɩ kokenaa kɔ̃tɩ̃ thɔna mɩ nɛrɛra. Gelela na cʋʋrɛ, ado na nɩ Thãgba Kɔ̃tɩn anɩ Thãgba nũu bɔɔbɔɔ.