JAKARƖ 5

Yẽbe maadõ thɩ̃ yɩr: sɔ̃ sɛbɛ

1 Dɩ mɩ ɓa ƴɩɛ a na hɩɩn a yɩ thɩ̃ yɩr wo, dɩɩ do sɛbɛɛkɛ wɩ n purnɩ gɩ da n ubi. 2 Dɩ thɔ̃thɔ̃ thuiile bule mer aa: Aɲe fɩ yɩ? Dɩ mɩ sʋʋraa: Mɩ yɩrɛ sɛbɛ purnəne da n ubi. Dɩ ɔɔ gbã mãkhana mɛtɛrɛ yʋɔr, dɩ ɔɔ pɛw mãkhana mɛtɛrɛ yeɲɔ. 3 Dɩ a so marɛ aa: A n nɩnanɛ sʋɔnɩkɛ na dananɩ dɩɩ fɛw. Gɩ kherere sɛbɛɛlee bil bɩɛla ayɩ: Wa weelele yo fɛw dɩ wa thɩɩr dɩɩra. A bir khere ʋ̃ʋ billo wo aa: Wa weelele wɩrɛ fɛʋʋkɛ n ʋlfɛnɛnɩ sõso ʋlfɛrɛ dɩ wa thɩɩr dɩɩra. 4 Mɩ thɔnanɛ sʋɔnɩle, gɩ lona yo fɛʋʋ cɔsɔ na wɩrɛ fɛʋʋkɛ n gbaanɩ ɩ̃ i dɩ wɩ ʋlfɛna sõso ʋlfɛrɛ. Sʋɔnɩle na toorele awɩ cɔsɔ, a na thii cʋɔrra koo: gʋʋ na pər fɛw. Mɛr Thãgba Kɔ̃tɩn, kokenaa kɔ̃tɩ̃ sɔ.

Yẽbe makoɲɔ thɩ̃ yɩr: khɛrɩkɛ n nɛnanɩ puure

5 Dɩ thɔ̃thɔ̃ thuilera n mɩana mɩnɩ tɔr pɔ a so mar aa: ɓa ƴɩɛ a hɩnɛ pal dɩkha n ɩnanɩ. 6 Dɩ mɩ bule, mɩɩ: Aɲe gɩ thale? Dɩ a so marɛ aa: Kpʋ̃ʋ gɩ da n ɩ̃. Dɩ a bire so wo aa: Kpʋ̃ʋ gɩɩkɛ dɩɩ sopuusɔ fɛw harɔnɩ. 7 Dɩ hɩnɛ kpõ thireekɛ wɩ cʋʋnanɩ ther dʋbɩ khəire, dɩ̃ yɩ khɛr dɩ toole bɩnɔ. 8 Dɩ thɔ̃thɔ̃ thuiile so marɛ aa: Puure khɛrɩle n nɩna. Agɩpɩ dɩ tʋɔ kpɛɛ le bɩnɔ, sa thiro dathirirə.

9 Dɩ mɩ ɓa ƴɩɛ a na hɩɩn a yɩ thɩ̃ yɩr wo, dɩɩ do khɛra yeɲɔ gɩ a hana gbɛla dɩɩ hona ɔkpɩlãkpo gbɛla dɩ wa n pɔ. Dɩ jɩɛ na n gba wɩ dɩ wa n ubi. Dɩ wɩ gbaar kpʋ̃ʋle dɩ wa n jʋʋna ƴũu. 10 Dɩ mɩ bulele thɔ̃thɔ̃ thuiilera n mɩana mɩnɩ, mɩ yɩ: Dɩ kana wɩ n jalna kpʋ̃ʋlera? 11 Dɩ a birse mer aa: Babɩlɔn dɩɩra wɩ n jalnaa, kãakɛ wa mɩnɩ cʋɔr a na pɩɛraa. Ɔbɔɔkɛ cʋɔrɩle na pɩnɩ, le wa gbɛbɩraa jəədaa a na thɩɩnʋ khorr.