AMƆSƖ 7

Thɩ̃ɛsɔɔkɛ Amɔsɩ yɩnɩ Ɩjɩrayɛl bɩsanaadara

Caca thɩ̃ yɩr: Toosõsɔ

1 Yɛkɛ gɩrɛ Kɔ̃tɩn, Thãgba Kɔ̃tɩn nɩ marnɩ thɩɛnaakɛ mɩ yɩnɩ : A tire toosõsɔ

Ɔbɔɔkɛ wɩ khabɩnɩ hɔ̃ ƴolo, a ha jamana

sɩ dɩɩ bir dɩ ga n thɔɔ.

2 Dɩ mɔ̃ toosõsɔɔra manɩ a kho hʋɔna dɩɩra dɩ wa n pɩ,

Mɩ hulene: Pha Kɔ̃tɩn, Thãgba Kɔ̃tɩn, mɩ n bɩɛl fɛr,

Faa afɩ too Ɩjɩrayɛl bɩsanaa sopuu a hana wɩ,

A mɛ̃ ga, mɔ̃ wa fʋ sɩ na sɩ,

Wa jɔrna'?

3 Dɩ Thãgba Kɔ̃tɩn debire kpɩɛrɛ gɩrɛra a yaalnɩ a cʋʋ wɩ, a yɩ:

Gelela fɩ yɩnɩ ga dã bã.

Balaɲɔ thɩ̃ yɩr: Dɔɔ

4 Yɛkɛ gɩrɛ Kɔ̃tɩn, Thãgba Kɔ̃tɩn nɩ marnɩ thɩ̃ yɩra wo:

Kɔ̃tɩn, Thãgba Kɔ̃tɩn gbaar dɔɔ a pɛna ɔɔ toora sor;

Dɩ dakporʋ ƴɩrɛ ɲʋ̃ɔsɔɔkɛ hanɩ thɩɩra tɩɛr

A hɩna Ɩjɩrayɛl dɩɩ.

5 Dɩ mɩ hulene: Pha Kɔ̃tɩn, Thãgba Kɔ̃tɩn,

Mɩ n bɩɛl fɛr, cʋɛ gɩ khu;

A mɛ̃ ga, mɔ̃ afɩ too Ɩjɩrayɛl bɩsana na fʋ sɩ na hana yire?

Wa hana fãga ga.

6 Dɩ Thãgba Kɔ̃tɩn debire kpɩɛrɛ gɩrɛra a yaalnɩ a cʋʋ wɩ, a yɩ:

Gelela fɩ yɩnɩ dakha na dã bã.

Balãther thɩ̃ yɩr : Go naar pɔ̃ɔ

7 Yɛkɛ gɩrɛ Kɔ̃tɩn nɩ marnɩ wo:

Ɔɔ thɛthɛ mɩ yɩ dɩ jɩɩl gʋʋrra ƴũu a fʋrɔ go naar pɔ̃ɔ. 8 Dɩ a bule mer aa: Amɔsɩ, aɲe fɩ yɩ?

dɩ mɩ birsee mɩɩ: Go naar pɔ̃ɔ gɩ. Dɩ Kɔ̃tɩn bir so: Ɩ̃ too Ɩjɩrayɛl bɩsana mɩ mɩɛ a hɩɩn, a yɩ wɩ dɩ wɩ ho gʋʋkɛ na telenena', nɛnɛ̃ ma faa na ha wa'. 9 Ma bũburone Ɩjakɩɩ mǝlsɔɔ sãasɩ pasɔ

Ma wɩɛlɛ Ɩjɩrayɛl bɩsanaa pa phusɔ.

Ma be kʋʋr na pɛr Jeroboam jamanaa mǝlsɔɔra.

Amasɩa, kɛ dɔnɩ bonɩ jidaar weere Amɔsɩ le Betɛl

10 Dɩ Amasɩa, kɛ dʋɔnɩ bonɩ jidaar le Betɛl thʋɔn a so Jeroboam jamanana aa: Amɔsɩ n ƴaalɛ a gbũ fɩ jamana dʋʋra Ɩjɩrayɛl dɩɩra, Ɩjɩrayɛl bɩsana na puno na tu ɔɔ thɩmɩsɔɔra 'lo bã. 11 Gɩdonɩ a sor aa: Fɛr Jeroboam na khiri kʋʋrra, sɩ lãlaardara n khɩɩ Ɩjɩrayɛl bɩsana wɩ jalna ƴɔɔ fĩi wɩ hʋnɔna awɩ dɩ. 12 Agɩpɩ dɩ Amasɩa so Amɔsɩra aa: Thɩ̃ yɩ kuun waa, jala pal! Jala Judaa dʋɔ. Le fa puno na do Thãgbaa mɩmɩɩ fa n 'lɛna afɩ diko. 13 Sɩ kɩɛr Betɛl, jɩlɛ afɩ Thãgbaa mɩmɩɩ do! Gɩdonɩ jamanaa pa phu gɩ ka a n fʋɔrnɩ Thãgba; Dɩdaraa Thãgba fʋɔr pa gɩ.

14 Dɩ Amɔsɩ birse Amasɩa thakɛ ayɩ: Ma kɔɔ do Thãgbaa mɩmɩa'; dɩ ma kɔɔ 'lɛ gaa dɩɩra'; sɩ nʋ̃ be mɩ do, dɩ ma n kʋʋlna sɩkomɔɔr thɩra^a 15 Dɩ Thãgba Kɔ̃tɩn we mɩ nʋ̃ khe paar a so mar aa: Jalla mɩana ɩ̃ too Ɩjɩrayɛl bɩsana ɩ̃ irǝ. 16 Sɩ fɛr Amasɩa pɩɛr mɩ aa ma n mɩɩ gɩrɛ Thãgba Kɔ̃tɩn so marnɩ Ɩjɩrayɛl bɩsanaadara ga, ma n mɩɩ dapuu Ɩjakɩɩ mǝlsɔɔra ga, dɩ pɛ nũu gɩrɛ Thãgba Kɔ̃tɩn n so farnɩ. 17 Yɛkɛ gɩrɛ a n sonɩ afɩdara :

Afɩ khɛr na dor khɛ bɔdɛl le dɩɩra

Afɩ bɩsãsɔ na khiire kʋʋrra,

Wa mɩɛrɛ afɩ thɩ na pɔ̃ɔ wɩ tɩnɛ tɩbɩla.

Fɛrɛɛ thɛthɛ na khire ca kpal dɩɩra,

Sɩ wɩ fʋlɛ Ɩjɩrayɛl bɩsana fɛw wɩ jalna ƴɔɔ fĩi.