Bɔ waal benɩɛ, Ɩjɩrayɛl bɩsanaadara
5
1 Nɛr Ɩjɩrayɛl bɩsanaNɩ pɛ thɩmɩɩrɩkɛ mɩ n mɩɩnɩ nũu
Bɔ waal benɩɛ gɩɩkɛ mɛr Amɔsɩ tini anɩdara.
2 Hu! Ɩjɩrayɛl caar khiri
mɔ̃ khebiire n khini
A na mar na ɩɩr bã
A khire ɔɔ thɛthɛɛ dʋɔ
Tibil na hale na taagʋa'.
3 Gɩdonɩ Kɔ̃tɩn, Thãgba Kɔ̃tɩn sor ayɩ:
Ɩjɩrayɛl bɩsanaa dɩ ʋrɛra
kona gbɩlanɩ na thenɩ na jal kʋʋrra,
Kona tamaa na sɛ na yire a na kɛr dɩɩra.
Dɩ dɩ ʋrɛra kona tamaa na thenɩ na jal kʋʋrra,
Kona yʋɔr na sɛ na yire a na kɛr dɩɩra.
Thãgba Kɔ̃tɩn n wer Ɩjɩrayɛl bɩsana wɩ kɛra birǝ ɩnɛrɛra
4 Ɩjɩrayɛl bɩsana, Thãgba Kɔ̃tɩn so narɛ ayɩ:
Nɩ kɛra birǝ ɩnɛrɛra ado nɩ n ƴaalɛ nɩ hana yire.
5 Sɩ na n jal Betɛl ɩnɩɩ fʋɔr pa, a fʋɔr na'
na n lõ Gɩlgal Thãgba fʋɔr paar dakha ga
Dɩ na n phɛl hʋɛ a jal Bɛɛrseba Thãgba fʋɔr paar ga;
Gɩdonɩ wa fʋʋlɛlɛ Gɩlgaldara na jaal dɩ kpɩɩra.
Dɩ Betɛl, Thãgbaa cɔ, na wɩɛllɛ.
6 Jojɛfɩɩ mǝlsɔ, ado nɩ n ƴaalɛ nɩ hana yire,
Nɩ kɛrra birǝ Thãgba Kɔ̃tɩnna,
A mɛ̃ ga a na ɩɩrna nɛr na fãga
mɔ̃ dɔɔ n manɩ
a na hɩ̃ Betɛl bʋra bʋra
sɩ tibil na hale na khiirǝ'.
7 Nɛrɛ, nɩ firi datelẽe dɩɩ do nar kpalbii
A dʋna dasarʋ thɩɩra dɩ na n saar na nɛɛ.
8 Thãgba Kɔ̃tɩn cʋɛ ƴepǝlǝ̃beekɛ wɩ n wenɩ kpeere,
Na ƴepǝlǝ̃beekɛ wɩ n wenɩ kɔkɔ.
Ɔɔ I n dʋɔn Thãgba Kɔ̃tɩn.
Ɔr n cʋɛ dabirǝ dɩɩ fi do dahɩrɛ
Ɔr n cʋɛ dɩwɩlʋ dɩɩ fi do dɩtɩnɛ
Ɔr n cʋɛ laɲʋɔn dɩɩ jʋʋn ndɔlɔ̃panana
a do thãgba ɲʋɔn a bir na dã thɩɩra fɛw.
9 Ɔr n tuon dɩ bũburone n phuro kuun khena dapaara
Sɩ dɩ wɩ wɩɛl dɩɩkɛ wɩ mɩnɩnakɛ gʋʋ a diiro.
10 Nɩ n laarɛ ʋrɛ n sɔnɩ so kɩɩl paar,
wa n kɩlɛ kɩɩl telẽe,
Na n na ʋrɛ n sɔnɩ sobɔra'.
11 Nɩ n phʋʋnɛ bɔdaar
Dɩ nɩ taa ɔɔ lɛ thɩ̃
Dɩ gɛr gɩ boka cɔ ɓɔnaakɛ nɩ mɩnɩ
na cɔra'
Dɩvɛ̃ thɩr bɔɩkɛ nɩ thelnɩ
Na ɲɔ agɩ dɩvɛ̃a';
12 Gɩdonɩ mɩ jɩrɛ anɩ puu jɔjɔɔkɛ nɩ cʋʋnɩ
Na anɩ sopuu kɔ̃tɩ̃sɔ
Nɩ n laarɛ tɩɩ sarʋ
Nɩ n teere khaar thɩ̃ɛ
Sɩ dɩ nɩ bo bɔdaraa hʋ hana kɩɩl paar
13 Dɩ mɔ̃ bɔɔ puuronɩ thakɛ,
gɛr gɩ dɩ tibiliikɛ kpɛsɛnɛnɩ n pɩr nʋɔ.
14 Na n cʋɛ gɩrɛ bʋɔnɔnɩ
Na n cʋʋ gɩrɛ kpalana'
gɩ do nɔɔ nɩ hana yire
Dɩ mɛ̃ Thãgba Kɔ̃tɩnɩɩkɛ dɔnɩ Thãgba kokenaa kɔ̃tĩ
na ha kha na nɛrɛ mɔna nɩ n sonɩ.
15 Na n ƴʋɔnɛ gɩrɛ kpalanɩ
sa na gɩrɛ bʋɔnɔnɩ.
So kɩɩl paara na n kpa dasarʋra
agakpaana' Thãgba Kɔ̃tɩnɩɩkɛ dɔnɩ Thãgba kokenaa kɔ̃tĩ
Na jɩrɛ nɛr Jojɛfɩɩ mǝlsɔɔkɛ sɛnɩ bʋɔra.
16 Nɛnɛ̃, nɩ yɛ gɩrɛ Kɔ̃tɩn, Thãgba Kɔ̃tɩnɩɩkɛ dɔnɩ Thãgba kokenaa kɔ̃tĩ sonɩ:
Kpa jɛ paarsɔɔra fɛw wa n nɩrɛ bɔ waal benɩɛsɔ.
Hʋɛsɔɔra fɛw, tɩbɩla na n hulene aa: Hũ! Hũ! Hũ!
Wa wer kokola wɩ ɩna a bɛ bɩɩ,
Wɩ we benɩ te wa n te benɩɛ
17 Dɩ dɩvɛ̃ thɩr lɩɛsɔɔra fɛw,
Tɩbɩla na n bɩrɛ
Ɔbɔɔkɛ a na pɔnɩ le.
Thãgba Kɔ̃tɩn sɔ.
Wireekɛ Thãgba Kɔ̃tɩn na kɩɩlnanɩ tɩbɩla
18 Ga puure wɩrɛraakɛ n ƴaalɛnɩ Thãgba Kɔ̃tɩnɩ wi n phana.
Mɔ̃ nɩ n kpɩɛr dɩ Thãgba Kɔ̃tɩnɩ wiilera na har tɔr?
Da wire ga do nar ya?
Kpei! Ƴɛ bɩɩ wire ga do nar.
19 Ga ho narɛ tibiliikɛ n caanɩ sidũ'uuna
A caana ursi,
A ca kɔ̃ cʋɔrɔ a yɩ ɩnɩ n ɩa ɲɔ̃ɔ gʋʋra,
Dɩ sii dʋ̃ɔ.
20 Thãgba Kɔ̃tɩnɩ wi na dor wi bʋɔ ya?
Kpei! Wi puu ga do; dabirǝ haa ga do. Dahɩrɛ na hale fɩʋraka'.
Thãgba fʋɔrɛɛkɛ Thãgba na n ƴaalna'
21 Thãgba Kɔ̃tɩn sor ayɩ:
Ma n ƴaal anɩ thãgba fʋɔr fɛtɩsɔa',
gɩ n yaa mɛr ka;
Anɩ kpa jɛ kɔ̃tɩ̃sɔ na n da marra'.
22 Anɩ bonɩ thiinǝsɔ,
na anɩ thɩ̃ bi bonɩsɔɔkɛ nɩ n ji marnɩ
ma n tee ga.
Anɩ 'likha bonɩsɔɔkɛ nɩ n ji marnɩ na nʋ̃ khʋ̃ɔsɔ,
ma n hɩɩn gɩraka'.
23 Nɩ hʋnɔnɛna mɩ anɩ nɔkɩɛr nɩsɔ.
ma n ƴaal ɩ̃ nɩ anɩ kolõjõ wisɔa'.
24 Sɩ nɩ cʋɛ datelẽe na n cel mɔ̃ ɲʋɔn n buni ɲo bu kaara dɩ ga n cel, a cʋɛ dasarʋ n ho pookɛ na n ƴɛna'.
25 Nɛr Ɩjɩrayɛl bɩsana, na kɔɔ ji mar bonɩɛ dɩ thɩ̃ bi bonɩɛ gɩ dɩ nɩ ji mar yɛna kpalaɲɔɔkɛ nɩ cʋʋnɩ bǝ̃ kparara ga. 26 Sɩ nĩ, nɩ hananɛ thɩl biikɛ nɛrɛɛ thɛthɛ cʋʋnɩ,
kɛ dɔnɩ Sakutɩ, anɩ thɩl-jamana,
na Kewan kɛ dɔnɩ anɩ thɩl-ƴepǝlə̃bi.
27 Gɛr gɩ ma cʋʋrɛ dɩ wa khɩɩ nɩ na jalna na bena Damasɩ dɩɩ sɩ na faa nɩ.
Thãgba Kɔ̃tɩn sɔ. Ɔɔ I n dʋɔn: Thãgba kokenaa kɔ̃tĩ.