Tɩɩ bʋɔ na tɩɩ puuda
24
1 Fa n pɩɛr hara puu cʋʋdarara ga,Fa n ƴaal na n tɔɔ kha ga.
2 Gɩdonɩ kʋɛrɛ awɩ ha n kpɩɛrna dɩbara,
Dɩ awɩ nɔ na n mɩɩ puurera dakha.
3 Kpɛsɛrɛ n cʋɛ cɔkaar dɩɩ do cɔkaar,
Fɩl hananɛ n cʋgɛɛ dɩɩ tɩ.
4 Jɩ hananɛ n dɔ nɔɔ dɩ duusɔ n hinə,
Thɩ̃ ɓɔ̃ caar fɛw na thɩ̃ bɔy.
5 Tɩɩ kpɛsɛ hananɛ fãga,
Ʋrɛɛkɛ jɩɛnɩ fɩlɛ, gɩ n tɔr ɔɔ fãga a dɛɛnɔ.
6 Gɩdonɩ fɩl jɩɩr na dɔ nɔɔ fɩ puno fɩ ke kʋʋr,
Dɩ a fɩl 'laadara jɔr thɩɛna, gɩ n 'laarɛ taarɛ.
7 Də̃bəl na puno na 'laa na 'li kpɛsɛ thɩmɩɩra ga,
Aa teena a 'lɔɔ nʋɔ sogʋʋr paar dɩ lõfonʋɔra ga.
8 Tibilikɛ hananɩ puu cʋʋ kpɩɛrɛ,
Ɔr wɩ n we puuree kɔ̃tɩ̃.
9 Gɩrɛ də̃bəl n kuurnɩ na bɩnɛ fɛw puurera gɩ,
Dɩ ɓoɓorodaar n pɛr laarɛ dɩbara na tɩbɩla.
10 A nɩwɛ wire phã dɩ ɲɛ̃ɛ khiir fɩ,
Sʋʋrʋ ha fɩ.
11 Wɩrɛ wɩ n jalnanɩ khirə, vənə wɩ a te,
Wɩrɛ wɩ haalnɩ wa n jalna kʋʋr paar dɩ wa n jẽ, taa wɩ faa.
12 A fɩ so fa kɔɔ ja'»,
Fɩ kpɩɛrɛ ʋrɛ n jʋrɛnɩ haar, aa jɩrɔ kɩrʋaa ya?
Dɩ ʋrɛɛkɛra n hɩnɛ fɩnɩ, aa jaa?
A na lɩmɩnɛ tɩbɩla fɛw bɩɛlbɩɛl mɔ̃kɛ ntɛɛ cʋʋ pasɔ hanɩ.
13 Ɩ̃ bikuun, na dɛ thʋʋr gɩdonɩ thɩ̃ bʋɔ gɩ,
Dɩ fa nɩrɛ thʋʋrɩ da afɩ nɔra.
14 Dɩ mɛna gɩ, jɛ dakha thale kpɛsɛrɛ ha far,
Ado fɩ 'lii, ga do farɛ nɔbɔɔ dɩkhõo.
Dɩ afɩ nũ pɛ na do pɔy yuurəka'.
15 Fa n hana kpɩɛr puu, tɩɩ puu kha, tɩɩ sarʋʋ cɔra ga,
Fa n wɩɛl cʋɔrɩkɛ a n cɔrɔna'.
16 Gɩdonɩ a tɩɩ sarʋ jirəkɛ a dɛbɩ ɲẽbe makoɲɔ, sɩ a na ɩɩrɛ,
Sɩ tɩɩ puusɔ n jiri wa n ɩɩr bã.
17 A afɩ lãlaardaar ji, fa n kãka ga,
A a be nɔɔ a gara, fa n do gɩ da fara'.
18 A mɛ̃ ga Thãgba Kɔ̃tɩn na yɩ gɛr dɩ ga daaraa ga,
Dɩ a na sɩrɔrɛ nĩkhiikɛ a kɔɔ gbanaanɩ.
19 Fa n gbana puu cʋʋdara nĩkhiə',
Fa n gbuginə tɩɩ puusɔa'.
20 Gɩdonɩ puu cʋʋdara na 'lɛ nɔbɔɔ bɔɔraakɛ n ɩnana'.
Tɩɩ puunə na khiire mɔ̃ dɔ carã n khiirni.
21 Ɩ̃ bikuun, na ma Thãgba Kɔ̃tɩn na jamana,
Fa n too kha na wɩrɛ n filenenɩ thɩ̃ɛa'.
22 Gɩdonɩ bũburone na phuro wer,
Dɩ amɛ jɩ̃ɛ sorɩkɛ Thãgba Kɔ̃tɩn na jamana na pɛ warnɩ?
Fɩl kpɩɩsɔɔkɛ tɩɩ kpɛsɛsɔ 'laanɩ
23 Yɛkɛ fɩl kpɩɩsɔɔkɛ tɩɩ kpɛsɛsɔ 'laanɩ wo:
Tibil hɩɩnɛ dɩɩdɩɩ sogʋʋr paar na bɔra'.
24 Sogʋʋrdaarɩkɛ n sɔnɩ tɩɩ puurə dɩ yɩ: «Fɩ hananɛ hʋɛ»,
Tɩbɩla n sʋɔnɛ, dɩ dɩdara n gbanaanɛ nĩkhii.
25 Sɩ wɩrɛɛkɛ n bɔnɩ tɩɩ puuda, wɛr n cʋɛ bɔɔ,
Dɩ wa 'lɛr bɔnanɛ na nɔbɔɔ.
26 Tibilikɛ n hana fɩnɩ tuur, dɩ so sobɔr casɩ,
Gɛr n nɛna ɔr dʋɔn afɩ kuun bɔ.
27 Kɔɔ cʋɛ afɩ thɔ̃ɔkɛ dɔnɩ jɛdaa ɓo,
A gbɛbɩrɛ afɩ lɛsɔ bɔɔbɔɔ,
Agɩpɩ fɩ hana afɩ cɔka.
28 Fa n pɛ afɩ alãkha tibilə so khɩɩ pɔɩa',
Fa n fɩɩl tɩbɩla na afɩ thɩmɩɩsɔa'
29 Fa n so fɩ cʋɛ tibil mɔ̃kɛ a kɔɔ cʋʋ fɩna',
Agɩbo, fɩ lɩma ntɛ mɔna ɔɔ cʋʋ pasɔ hana'.
Gɩrɛɛkɛ khaalɛ n lɩmɩnɩ
30 Wi bɩɛl mɩ n kɔɔ kar khãkhalɩ lɛ nɔra,
Mɩ kɔɔ kananɛ fɩl 'leedaarɩ dɩvɛ̃ thɩr lɛ nɔ,
31 Dɩ hɩnɛ, hɔ̃ puu gbaar lɩɛra fɛw,
Dɩ uu tee paar fɛw,
Dɩ gʋʋkɛ a mɩnɩ na bokana jire.
32 Dɩ mɩ hɩɩnɛ sa gba kpɩɛrɛ jɔɔ,
Dɩ gɩrɛra mɩ yɩnɩ, gɩ dɩɩr mɛr fɩlɛ.
33 A fɩ so fɩ daar gbe, aa fɩ yuufe fɩɩʋ,
A fɩ boro ɲɛ̃ɛ, aa fɩ phɩ̃ gbe ya mɔ̃!...
34 Bʋɔ na phuro fer mɔ̃ kpãkpar n phuroni tibil,
Dɩ thɩ̃ leere na wu farɛ mɔ̃ kuunɩkɛ hananɩ koke thɩ̃ɛ n wuni tibilə.