23
1 A fɩ too dɩko kho paar na tɩɩ kɔ̃tɩ̃ɩ,Jɩɛ dʋ bʋrɛ ʋrɛraakɛ tɔɔnɩ afɩ ƴɛra.
2 A fɩ dor tibilikɛ n kɛbanɩ,
Kho afɩ kɛbɩ faa gɩ ba.
3 Fa n do ɔɔ dɩko dasɔ n kʋ fɩ thuə',
Gɩdonɩ gɩ punone do dikorɩkɛ a pherna fɩnɩ.
4 Fa n vɔɔ afɩbara lẽle thɩ̃ ƴaalɛla ga,
Fa n dorakɛ ga n too fɩ kpɩɛrɛra ga.
5 Fɩ bor gar yire lẽle thɩɛna ya?
Ga hale bã!
Lẽle thɩ̃ɛ hor thɩ̃ɛɛkɛ hananɩ gbɛla,
A n phor kɔrɔ mɔ̃ sɩgbʋra n ubini ƴũu.
6 Tibilikɛ na n hɩnɛ fɩnɩ na yi bʋɔa',
Fa n kho ɔɔ dɩkoa',
Fa n do ɔɔ dɩko dasɔ n kʋ fɩ thuə'.
7 Gɩdonɩ gɩrɛ ɔɔ nɔ n sonɩ har kpɩɩ na gɩrɛ hanɩ ɔɔ hara.
A n so farɛ wer na nʋɔ dɩ yɩ:
«Khɔ dikor a ɲɔ taan a he.»
Sɩ aa ha fɩ na haara'.
8 Dɩ fa kpeere gɩrɛra fɩ khonɩ,
Sɩ gɩ do pɔy fɩ mɩgʋʋ thɩmɩɩ bɔy.
9 Fa n mɩɩ də̃bəl thɩmɩɩra',
Gɩdonɩ a na beesire afɩ fɩl bɔ thɩmɩɩkɛ fa mɩɩnɩ.
10 Bokaarɩkɛ afɩ thɩ kɔ̃tɩ̃sɔ kɔɔ thɩɩnɩ a pɛna pɛl,
Fa n tʋɔ khokhɩa ga.
Fa n kʋʋl a lona khilə̃bii thɩra ga.
11 Gɩdonɩ awɩ hel tiirdaar hananɛ fãga ka,
A na teere na pɛ war.
12 Khɛra haar a na ƴaalɛ dɩɩr bʋɔ,
Na jɩɛ pɛ nũu thɩmɩaraakɛ n 'laanɛnɩ jɩɩr.
13 Fa n bo bɩsã naara',
Gɩdonɩ a fɩ ciluu na ciləmũu gele na kʋa'.
14 A fɩ ka naarʋ na cilǝmũu,
Khĩdi dɩ hʋɛra fɩ n diguu.
15 Ɩ̃ bikuun, ado fɩ hana kpɛsɛrɛ,
Mɛrɛ dakha ma hananɛ daw.
16 Ado afɩ nɔ jɩrɛ datelẽe dɩ mɩɩ,
Ɩ̃ ha na n kãkarɛ na sobɔr.
17 Fa n pɩɛr hara sopuudarara ga,
Sɩ hanana maar Thãgba Kɔ̃tɩnna wire fɛw.
18 Gɩdonɩ ga do farɛ nɔbɔɔ dɩkhõo,
Dɩ afɩ nũ pɛ na do mɔlɔ kpɩɩa'.
19 Fɛr ɩ̃ bikuun, na pɛ mɩ nũu a hanana kpɛsɛrɛ,
Thɔɔ afɩ ha na pɩɛr hʋ teleena.
20 Fa n toona ta kʋdara
Dɩ wɩrɛ n kɛbanɩ nʋʋna ga.
21 Gɩdonɩ ta kʋdaar na kɛ̃kɛbɩ n jire bʋɔra,
Dɩ ʋrɛ n daarɛnɩ daan jɔɔ kẽkẽ sɛlɛɛ a n to.
22 Na pɛ afɩ thɩ nũu, gɩdonɩ ɔr kɔna fɩ,
Dɩ ado afɩ nɩ tɩnakɛ, sɩ fa n beesua'.
23 Dɔ sobɔ cʋʋdaar, a jɩlɛlɔ kɩbɩ,
Na ƴaalɛ kpɛsɛrɛ na dɩɩr bʋɔ na thɩ̃ lee jɩɩr,
24 Tɩɩ sarʋʋ thɩ n hinəne kãkar na sobɔr,
Dɩ ʋrɛ kɔnanɩ bɩsã kpɛsɛ, da haar a n do.
25 Cʋɛ daw na n fʋ afɩ thɩ na afɩ nɩ,
Cʋɛ nɩrɛɛkɛ kɔna fɩnɩ a na n kãka.
26 Pɛ mɩ haar ya ɩ̃ bikuun,
Dɔ ɩ̃ cʋʋ pasɔ na n da far.
27 Thetoo khɛr hor kõkor hulõ,
Dɩ khɛr bɔdɛl ho birikɛ 'lurunenɩ nʋɔ.
28 A n nɔr mɔ̃ yu hɔ̃hɔl n nɔnɩ,
A n cʋʋrɛ kuun jɔjʋɔ dɩ wɩ do fɩ̃fɩla.
29 Ana n hulene aa: Hu aɲaal ? Ana n hulene aa: A ma jɩ?
Ana n hana sʋʋ? Ana n hɩna waalɛ?
Ana n 'lɛ bɩɩrɛ dakhɩɩ mɔlɔ?
Anaa yisɔ n bɩa kpakpakpa?
30 Wɩrɛ n ɲʋɔnɩ dɩvɛ̃ dɩ wa n pʋɔrna ƴɛrr,
wɛr gɩ,
Wɩrɛɛkɛ n ɲaɲaanɛnɩ taan bɔɔ fɛw
dɩ wa n ɲɔ, wɛr gɩ.
31 Fa n 'lar taanɩ sɛra,
mɔ̃ a n hanɩ wənənənə̃ ga,
Fa n hɩɩn mɔ̃ a n thanɩ ɲɔ̃kpʋʋna phʋʋ ga,
A n daarɛ ɲʋɔra wer sobɔr
32 Sɩ pɩpɩɩ paar a n dɔ̃ fɛr si khaa,
Dɩ cɩ fɩ mɔ̃ dɔ̃phaanʋ n cɩnɩ.
33 Dɩ fa mar fa n yɩ dɩkhasɔ burburbur,
Afɩ nɔ n ma ga n mɩɩlɛ kpalakpalasɔ.
34 Dɩ fa n kpɩɛrɛ gɩ ho bato ther gbaana ƴũu fɩ ha a phɩ̃, laɲɔ̃ thɩ̃thɩɩn.
35 Dɩ fa sor : «Wɩ kɔɔ be mer ya? Ga kho ma'!
Wɩ kɔɔ bɩɩr mɛr yaa? Sɩ ma nɩ thɩ̃ɛa dɛ!
A mɩ jaa, foo ɩ̃ bir ɩ̃ ɲɔ wo!