22
1 I bɔ hananɛ baar lẽle thɩ̃ jɔ hananɛ,Dɩ a tɩbɩla na afɩda, gɩ baar dɛ bulo na dɛ hananɛ.
2 Gɩrɛ lẽle na bɔdaar donanɩ bɩɛl dʋɔn :
Thãgba Kɔ̃tɩn te wɛr yeɲɔ fɛw.
3 Bʋdʋ tibil n yɩrɛ puureekɛ na dananɩ ƴɛkʋʋlɔ dɩ golono,
Sɩ fɩl 'leedaar n jal dɩ lono dɩ 'lɛ sor.
4 Gɩrɛ dɩbara wure na Thãgba maar n lɩmɩnɩ tibil,
Gɛr dʋɔn ler na i dʋbɩrɛ na yi gbãa.
5 Gõgolõ tibili hʋ hinəne uusɔ na phera,
Dɩ ʋrɛɛkɛ naanɩ ɩnɩ n hanana yiri a n golonone.
6 Dɩɩrɛ bɩsaan fɩlɛɛkɛ a teenanɩ a hanana,
Aa ɩnakɛ a tɩ̃ sɩ a na faa ga.
7 Lẽle n dʋɔn kɔ̃tɩn bɔdaara,
Dɩ ʋrɛɛkɛ n pemanɩ thɩ̃ɛ n dʋɔn dee ʋrɛraakɛ n pemaanɩ.
8 Tibilikɛ n direni gõgolone,
A na khar puure gɩ do lɩmɩnɛ,
Gɩdonɩ bɩkhɩ fãgaakɛra a hananɩ na pɩrɛ.
9 Bɔ cʋʋ tibil na 'lɛr bɔnanɛ,
Gɩdonɩ a n har bɔdara dɩkɔ.
10 Wea ɓoɓorodaar, kɩla na khure;
Thɩ̃ banaa dakha na tɩɩ beesire na hale bã.
11 Tibilikɛ hananɩ bɩ̃ hɩrɛ,
Da n mɩɩ bɔjɩ thɩmɩa,
Ɔr n dʋɔn jamanaa kuun.
12 Thãgba Kɔ̃tɩn n teere dɩ pɛ jɩɩra,
Sɩ a n bũburone də̃bəlɩ thɩmɩɩsɔ.
13 Khãkhal n yɩ sidũ'ũu hale hʋɛra,
Aa a na kʋ nɛr hʋɛra.
14 Khɛr bɔdɛlɩ thɩmɩsɔ hor kõkor hulõ,
Ʋrɛɛkɛ Thãgba Kɔ̃tɩn gbananɩ nĩkhii, ɔr n jero.
15 Də̃bǝǝle har bɩsaanɩ hara,
Sɩ nanaar cilǝmũu n te gɩ dɩɩ hʋnɔnaa.
16 Tibilikɛ n ʋʋnɛnɩ bɔdaara ler a n pɩɛraa,
Ʋrɛɛkɛ n hananɩ lẽledaar thɩ̃ɛ,
A n pɛr bʋɔ ɔɔbara.
Fɩl dɩɩrɛsɔɔkɛ tɩɩ kpɛsɛsɔ 'laanɩ
17 Gba nũu a nɩɛnɛ tɩɩ kpɛsɛsɔɔ thɩmɩ,
Gbuoro yʋʋ a 'lɛ jɩɩrɩkɛ dɔnɩ ɩ̃da.
18 Ga da farɛ ado fɩ fʋ gɩ le afɩ bɩnɔ,
Na dakha ado gɩ n too fer nʋɔra bɔɔ fɛw.
19 Mɔ̃ fa dɛɛnɩ tu jɩɩr Thãgba Kɔ̃tɩnna dɔ nɔɔ,
Dɩ ma n dɩɩr fɛrɛ thɛthɛ jɩɩr nĩ dakha.
20 Fɩl dɩɩrɛ kpelẽ yʋɔrsɔ ha gɩrɛ mɩ kherenɩ a ha fɩ,
Fɩl dɩɩr thɩmɩɩsɔ gɩ na bɩ̃ kpɩɛr thɩmɩɩsɔ.
21 Gɩ cʋʋ fɩ, fɩ jɩ gɩrɛ teananɩ ha pɛrɛ na gɩrɛ dɔnɩ sobɔr thɩmɩɩr;
Gɩ do nɔɔ a tibil thɔ̃ fɩ thɩɛna, fɩ puno fɩ 'li tuurikɛ dʋɔnɩ tu bʋɔ sobɔr fɩ 'laa fɩ haa.
22 Fa n phʋʋn bɔdaar ɔɔ bɔdaar dora ga,
Fa n hʋɔl bɔkʋdaaraakɛ na jɛnɩ mɩɩra'
Kɩɩl paar dɩ lõfonʋɔra ga.
23 Gɩdonɩ Thãgba Kɔ̃tɩn n teere awɩ sora,
A n kʋʋrɛ wɩrɛ taga warnɩ thɩ̃ɛ fɛw na fãga bɩɩ.
24 Fa n kuuna tibilikɛ dɔnɩ nĩkhidaara',
Fa n toona tibilikɛ naanɩ cɩ̃cɩmana'.
25 A mɛ̃ ga fa phɛllɛ ɔɔ cʋʋ pasɔ,
Dɩ ga debire na do far pheru afɩ thɛthɛɛ yirə.
26 Fa n to pɔ̃ɔ fʋɔrɔ tibili hel thɩmɩra ga,
Fa n 'laa afɩbara a do tɩɩ kpɩɩ hel todaar yuurəka'.
27 Aɲeraakɛ fa cʋʋ wɩ gba
afɩ thɛthɛɛ phɩ̃ paakɛ fɩ n phɩnɔnɩ
Ado fa hana thɩ̃ɛ na lɩma'?
28 Bokaarɩkɛ afɩ thɩ kɔ̃tɩ̃sɔ kɔɔ thɩɩnɩ a pɛna pɛl,
Fa n tʋɔ khokhɩa ga.
29 A fɩ yɩ bʋdʋ tibilikɛ n dɔnɩ ɔɔ thɔ̃ bɔɔbɔɔ,
Jamanaa thɔ̃daar a na do,
A na do tɩɩ pɔɩsɔɔ thɔ̃daara'.