21
1 Jamanaa ha hʋrɛ ɲɔ kɔlɔ̃ Thãgba Kɔ̃tɩnɩ ɲɔ̃kɔɔ,Kana a n ƴaalnɩ le a n kɛrʋ dɩ jalna.
2 Tibil n kpɩɛrɛ ɩnɩɩ cʋʋ pasɔ fɛw sarɛ,
Sɩ Thãgba Kɔ̃tɩn n jʋrɛ haarsɔ dɩ jɩ mɔ̃ gɩ hanɩ.
3 Fɩl sarʋ na datelẽ cʋʋrɛ,
Gɛr n dar Thãgba Kɔ̃tɩnna a jɔ bonɩ jir.
4 Yʋ bʋ̃ cʋʋrɛ na dɩbara khəi haar,
Gɛr n nɛrɔ tɩɩ puusɔ sopuu.
5 Thɔ̃ do tibilikɛ hananɩ bɩ̃ kpɩɛrɛ a na 'lɛr thɩ̃ɛ jɔɔ,
Sɩ ʋrɛɛkɛ n cʋɛnɩ wur wur a n 'leere.
6 Lẽle thɩ̃ɛɛkɛ tibil n 'lɛnɩ sõsora,
Mɔlɔ thɩ̃ɛ gɩɩkɛ na n pʋɔrɛna', kɛ ɛnanɩ khir.
7 Tɩɩ puusɔɔ bɩkhɩ cʋʋ n bũburone wɩ,
Gɩdonɩ wɩ n bor dasar cʋʋrɛ.
8 Puu cʋʋdaarɩ hʋ dor hʋ gõgolõ,
Sɩ tɩɩ bʋɔɔ cʋʋ pasɔ telene.
9 Korõkorõ balƴɔ phɩɩn nãsʋrɔ baar,
Kɩl ƴaal khɛrɩkɛ fa gbɛbɩnanɩ cɔ bɩɛl.
10 Puu cʋʋrɛ n dar tɩɩ puurə ka,
Ɔɔ kuun bɩnɔnakɛ a n jɩɩ bʋɔra ga.
11 A wɩ naar ɓoɓorodaar, gɩ n cʋʋrɛ fɩl 'leedaar dɩ 'lɛ kpɛsɛrɛ,
A wɩ ha tɩɩ kpɛsɛ fɩlɛ, a n 'lɛr jɩɩr dɩ dɛɛnɔ.
12 Thãgbaakɛ saranɩ n jʋʋrɛ tɩɩ puusɔ cɔka dɩ hɩɩn,
Sɩ dɩ tɔ wɩ dɩ to thɩlkɩɩra.
13 Tibilikɛ n khaanɛnɩ nũu bɔkʋdaarɩ hulẽbirə,
Ɔr dakha na hulene dɩkhõo sɩ wa deeraa ga.
14 Sãsamɩ thĩɛɛkɛ wɩ n hanɩ tibil wolonena, gɩ n ƴer ɔɔ nĩkhi,
Dɩ khaardaakɛ wɩ n kernɩ lokaara a 'laa, gɩ n cɩrrɛ nĩkhiikɛ khɩɩrnɔnɩ.
15 Dasar cʋʋrɛ dor daw tɩɩ teleena,
Sɩ wɩrɛ n cʋɛnɩ puure kʋɛrɛ gɩ n ɩna war.
16 Tibilikɛ faanɩ fɩl bɔ hʋɛ,
Khĩdidara a na n cɔna dɩkhõo.
17 Tibilikɛ naanɩ daw, bʋɔra a n too,
Dɩ ʋrɛɛkɛ naanɩ ɩna n khɔ thɩ̃ bɔy a na ɲɔna dɩvɛ̃, a n la'.
18 Tɩɩ puu n debire tɩɩ sarʋʋ so,
Dɩ lĩlir n debɩ tɩɩ telẽesɔɔ so.
19 Bə̃ kpara toore baar
Kɩl ƴaal khɛr na nĩkhi kʋʋr khɛrɩkɛ fa n cɔnanɩ.
20 Lẽle thɩ̃ ɓɔna na nũfe thɩ̃ɛsɔ n hale tɩɩ kpɛsɛɛ cɔ,
Sɩ də̃bəl n kʋɛrɛ ɔɔda dɩ faa.
21 Tibilikɛ n ƴaalɛnɩ fɩl sarʋ, a dona bɩ̃ bulodaar,
A na hananɛ yiri a na pʋɔr ; wa cʋʋraarɛ dasarʋ, dɩ a na 'lɛr dakha cʋʋr.
22 Tɩɩ kpɛsɛ punone lõ kuun khanaa dʋɔ a tee dɩɩ,
A kʋɛ fãga paarɩkɛ dɩdara jəəronɩ yʋʋ.
23 Tibilikɛ n fɔnɩ ɔɔ nɔ na ɔɔ delẽbi,
A n golone nɩwɛra.
24 I kadaarɩkɛ dɔnɩ dɩbara khəidaar,
ɔr wɩ n we ɓoɓorodaar,
I ka thɩɛna a n cʋʋ bɔɔ fɛw, dɩɩ kar.
25 Thɩ̃ ƴaal thue n kʋrɛ khãkhal kper
Gɩdonɩ a n bor thɔ̃ dʋʋr.
26 A n pɩɛrɛ hara dɩ lona wire,
Sɩ tɩɩ sarʋ wer n 'laarɛ, a n tɔtɔɔrɔa'.
27 Tɩɩ puusɔɔ bonɩrakɛ n kɔɔ kʋrɛ ƴɔ̃ƴʋɔnɛ,
Dɩ a wɩ bir jinə kpɩɛr puu mɔ̃ ga thʋ̃ na ha!
28 Sõso sojɩdaar na bũburone,
Sɩ tibilikɛ n pɛnɩ nũu dɩɩ dã, a na 'lɛr hʋɛ bɔɔ fɛw a na n mɩɩ.
29 Tɩɩ puu n lire ƴɩɛ,
Sɩ tɩɩ sarʋ n fʋrɛ dɩɩ ma ɔɔ cʋʋ pasɔɔra.
30 Tibili kpɛsɛ na ɔɔ fɩl jɩ fɛw,
Na ɔɔ fɩl dɩɩrsɔ na do thɩ̃ɛ Thãgba Kɔ̃tɩnɩ ƴɛra ga.
31 Tɩbɩla n gbɛbɩrɛ gãgʋʋ wer koke wirera,
Sɩ Thãgba Kɔ̃tɩn n 'laanɛ kəəre.