19
1 Bɔdaarɩkɛ n ɩrɛnɩ na telene,A baar də̃bəlikɛ n mɩanɩ gõgolõ thɩmɩa.
2 Jɩ 'leere dor thɩ̃ puu tibillə,
Dɩ ʋrɛɛkɛ n phananɛnɩ a n cʋʋrɛ dɩ paar.
3 Tibili də̃bəəl n thɔgɔɔ a pɛ hʋ puurə,
Sɩ dɩ kɛr dɩ gbana Thãgba Kɔ̃tɩn nĩkhii.
4 Lẽle n jɔrɛ kuuna ka,
Sɩ bɔdaarɩ kuun bɩɛl 'lẽlẽekɛ a hananɩ n bire hɛlaa.
5 Sõso sojɩdaar na 'lɛr sor,
Dɩ ʋrɛɛkɛ n mɩanɩ sõso thɩmɩa na yɩ fuu paara'.
6 Tibil jɔjʋɔ n ƴaalɛ tɩɩ cʋnanɛɛ bɔna,
Dɩ ʋrɛɛkɛ n 'laanɛnɩ khaardaa, ɔr tɩbɩla fɛw n kuuna.
7 Bɔdaarɩ õkũusɔ fɛw na n ƴaalʋa',
Dɩ mɔ̃ ga ka na ha na ɔɔ kũusɔ? Wɩ n bɩlanɛ sɩ a fagʋʋ!
A n ƴaalɛ a mɩɩna wɩ, sɩ dɩɩ do wa hale bã.
8 Tibilikɛ dɩrɛnɩ a jɩ fɩlɛ, a nar ɔɔbara,
Dɩ ʋrɛɛkɛ hananɩ kpɛsɛrɛ, a 'lire nɔbɔɔ.
9 Sõso sojɩdaar na 'lɛr sor,
Dɩ ʋrɛɛkɛ n mɩanɩ sõso thɩmɩa na bũburone.
10 Mɔ̃ ɲɔ̃korbɔɔ na teenanɩ də̃bələ',
Mɛna gɩ, dee na teena a na n kʋmãdɩnɛ nũfesɔa'.
11 Tibilikɛ hananɩ bɩ̃ kuure,
A n gba nĩkhii kɔrɔa',
Dɩpa faarɛ n dʋʋraarɛ i dʋbɩrɛ.
12 Jamanaa nĩkhi n kʋrɛ maar a ho sidũ'ũ oore,
Sɩ ɔɔ ha bulo hor mɩɛnɩkɛ n jenɩ hʋɔna.
13 Bikuun də̃bǝǝlu n dor thɩlkɩɩr ɔɔ thɩra,
Dɩ khɛr kɩl yaaldaar ho ɲɔ celuukɛ n 'lunonɩ bɔɔ fɛw a n kurǝ'.
14 Tibil punone a gba ɔɔ thɩsɔɔ khĩdi thɩ̃sɔ kɛ dɔnɩ cʋɔr na lẽle thɩ̃ɛsɔ dɩɩ do ɔɔda
Sɩ khɛrɩkɛ hananɩ fɩl bʋɔ, Thãgba Kɔ̃tɩn n 'laanɛ.
15 Khaalɛ n 'laarɛ daan,
Dɩ dokhodaar na n yɩ dikora'.
16 Ʋrɛɛkɛ n hɩnɛnɩ jɔfʋ ɔɔ thɛthɛɛ yi a n bɛr,
Sɩ ʋrɛɛkɛ na n dɔnɩ bʋrɛ ɔɔ ɩɩr pasɔɔra ga a na khire.
17 Tibilikɛ n jɩɛnɩ bɔdaar bʋɔra dɩ haa thɩ̃ɛ,
Thãgba Kɔ̃tɩn a n pemɩ thɩ̃ɛ,
Dɩ a na lɩmɩnɛ ntɛɛle ɔɔ bɔ cʋʋra.
18 Naarɛ afɩ bɩsã bɔɔraakɛ teananɩ,
Sɩ fa n naarʋ kʋkʋ naarʋa'.
19 Nĩkhi khedaar teenanɛ a 'lɛ ɔɔ lɩmɩ,
Gɩdonɩ a fɩ sɩɩraa, a na bire na cʋʋ wo.
20 Na pɛ fɩl dɩɩrɛ nũu a na tea dɩɩrɛ,
Ga dor nɔɔ fɩ do tɩɩ kpɛsɛ pɩpɩɩr paar.
21 Tibili n hananɛ kpɩɛrɛ jɔɔ ɔɔ hara,
Sɩ Thãgba Kɔ̃tɩnɩ tuur dɩbara n cʋɛ.
22 Gɩrɛɛkɛ dɔnɩ tɩɩ dʋʋr, gɛr dʋɔn ha bulole,
Dɩ bɔdaar baar sõsodaar.
23 Ma hananɛ Thãgba Kɔ̃tɩnna n 'laarɛ yiri,
Dɩ wɩrɛ n maanɩ Thãgba Kɔ̃tɩn thɩ̃ɛ na n ɓɔr wa',
Thɩlkɩɩr na n dã wa'.
24 Khãkhal n 'lɔɔrɛ ɲɔ̃ɔ dikora,
Sɩ a n birnə ɲɔ̃ɔ dɩ to nʋɔra ga.
25 A wɩ be ɓoɓorodaar, gɩ n cʋʋrɛ də̃bəl dɩ jɩ fɩlɛ,
Sɩ a fɩ phãa fɩl jɩn, a n 'lɛr jɩɩr dɩ dɛɛnɔ.
26 Bɩsaanɩkɛ n cʋɛnɩ ɔɔ thɩ puure, kɛ n weanɩ ɔɔ nɩ,
Yicur bɩsaan gɩ, a n pɛr yicuru.
27 Ɩ̃ bikuun, thɩmɩɩrɩkɛ na cʋɛ fɩnɩ dɩ fa hʋnɔna dɩɩrɛɛkɛ n 'laanɛnɩ jɩɩr,
Bɔ gɩ, fa n pɛ gɩ nũə'.
28 Sojɩda puu n beesire fɩl sarʋ,
Dɩ puure n dar tɩɩ puu nɔra ka.
29 So heene gbɛbɩrɛ too da n pɩɛr ɓoɓorodara,
Dɩ ciləmũu gbɛbɩ too da n pɩɛr də̃bələə gɔr.