18
1 Tibilikɛ n leanɩ dɩ too kpɩɩ, dɩbara nadaar gɩ,Ɔr n cɩ̃cɩmanɛ fɩlɛ fɛʋraakɛ wɩ n haanɩ.
2 Fɩl jɩɩr na n da də̃bələ ga,
Gɩrɛ n daaraanɩ dʋɔn a na n nɛna ɔɔ kpɩɛrsɔ jɩɛra.
3 Ka tɩɩ puu hanɩ, tɩɩ beesire hale,
Dɩ nɩɩrɛ n ɩnanɛ yicuru.
4 Tibili thɩmɩɩsɔ hor ɲʋɔnɩkɛ hulonenɩ,
Dɩ kpɛsɛrɛɛ the pa hor mɩɩr ɲʋɔnɩkɛ n buonɩ.
5 Ga bɔr dɩ fa tee na pɛ tɩɩ puurǝ kɩɩl paar,
Sɩ na bo tɩɩ sarʋʋda, kɛ hananɩ hʋɛa'.
6 Də̃bəli nɔ n lɔɔnɛ kɩlala,
Ɔɔ thɩmɩsɔ n pɛrɛ be kha.
7 Də̃bəli nɔ n ɛnanaa bũburone,
Ɔɔ thɛthɛɛ thɩmɩsɔ n birə a dʋʋraa pheru.
8 Lĩliri thɩmɩɩsɔ hor dikorɩkɛ daanɔnɩ ka,
Gɩ n gbune bɩnɔ a dã 'lo.
9 Ʋrɛɛkɛ n pɩɛrnɩ dokhʋʋr ɔɔ thɔmana,
Na ʋrɛɛkɛ n kʋɛanɩ thɔma, bɩɛlla wɩ do.
10 Thãgba Kɔ̃tɩn hor bɛbɛr cɔ bʋɔ,
Ɔrra tɩɩ sarʋ n ca dɩ jal dɩ 'lɛ taarɛ.
11 Lẽlee thɩ̃ jɔ hana hʋʋraarɛ dɩɩkɛ dɩ bɛr gʋʋ diironi,
A n kpɩɛrɛ go gbãa gɩɩkɛ diə narnɩ.
12 I ƴaalɛ n kʋlɛ ƴɩɛ dɩ kʋɛrɛ na n kpaan,
Dɩbara wure n kʋlɛ ƴɩɛ ɓo dɩ i dʋbɩrɛ na n kpaan.
13 Tibilikɛ na n jɩɛnɩ pɛ thɩmɩɩ nũu sɩ dɩ birsǝ',
A n nɩnanɛ ɔɔ də̃bǝǝl do, dɩ pɛ yicuru ɔɔbara.
14 'Larɩkɛ n hanɩ tibili hara n haarɛ fãga khoora,
Sɩ ʋrɛɛkɛ na hananɩ 'lara', amɛ na punone na bullu?
15 Tibilikɛ jɛnɩ fɩlɛ a n 'lɛr jɩɩr,
Dɩ tɩɩ kpɛsɛ n ƴaalɛ a na n nɩɛ thɩmɩaakɛ n 'laanɛnɩ jɩɩr.
16 Tibili khaarda 'laasɔ n khɛrʋʋrɛ hʋɛ,
Gɩ n cʋgʋʋrɛ dɩ dã tɩɩ kɔ̃tɩna.
17 Tibilikɛ dɔnɩ cacadaar kɩɩl paar a mɩɩ ɔɔda,
Gɩ n hor ɔr hana hʋɛ,
Sɩ ɔbɔɔkɛ ɔɔ sodaar mɩɩnɩ ɔɔda, liir sobɔr n yɩr.
18 Lɩɩ n cʋʋrɛ thɩ̃ banaa dɩɩ khu,
A n vaarɛ punodaraakɛ n thʋnanɩ kha.
19 Õkuunikɛ wɩ dɩrɔnɩ khɩɩrɛ wɔrɔnɛna a jɔ
mɔ̃ fa teenɩ dɩɩkɛ dɩ bɛr gʋʋ diironi,
Thʋ̃ kha n khaanɛ tibili ha dɩɩ ma
mɔ̃ wɩ n kpalanɩ dɩ lõfonʋɔ na lõ kpaladaa.
20 Tibili nɔ thɩmɩɩ n hanaa dikorɩkɛ a na khonɩ na hi,
Ɔɔ delẽbi thɩmɩɩ n hanaa ɔɔ hãada.
21 Delẽbirera khir na yiri fɛw n the,
Tibilikɛ naanɩ thɩmɩa a na 'lɛr ga lɩmɩ.
22 Tibilikɛ 'lɛnɩ khɛr, nɔbɔɔ a 'lɛ,
Bɔnanɛ gɩ dɩ 'lɛ Thãgba Kɔ̃tɩnna.
23 Bɔdaar n mɩɩrɛ na ƴɛɛrɛ,
Sɩ dɩ lẽle n birse na nɔ khaa.
24 Tibilikɛ hananɩ kuuna jɔɔ, gɩ punone pɩɛraa thɩlkɩɩr,
Sɩ kuun bʋɔ n firerakɛ dɩ ba õkuun.