17
1 Jʋ̃ʋkur fɩɩʋ dɩɩr na ha ɩɩ,gɩ baar dikor ɓʋ̃ɔɔkɛ wɩ gbɛbɩnɩ cʋɔraakɛ henəni thʋ̃kha.
2 Thɔ̃daar kuunɩkɛ hananɩ bɩ̃ kuure
punone tee kɔ̃tɩɩnɛ bikuunaakɛ n cʋɛnɩ yicur thɔma,
A punonenakɛ gbɛbɩna cɔ bɩsana a tɩnɛ cɔ ka thɩ̃ɛ na wɛr.
3 Dɔɔ wɩ n mɩɛna dɛ bulo na dɛ a jɩ dabʋɔ,
Sɩ ʋrɛɛkɛ n mɩɛnɛnɩ tibil haar dɩ jɩ gɩ dʋɔn Thãgba Kɔ̃tɩn.
4 Puu cʋʋdaar n gbaan nũu thɩmɩɩ puunənə,
Dɩ sõsodaar n pɩɛr nũu gõgolõ thɩmɩara.
5 Tibilikɛ n ɓoɓoronenɩ bɔdaara, ɔɔ tidaar a n nɩɩr,
Dɩ ʋrɛɛkɛ n kãkanɛnɩ ʋkhaa thɩlkera, thɩlkɩɩr na ɓɔrʋa'.
6 Nũfe kpɩɛr bi mələ do tɩɩ kpɛɛnana,
Dɩ thɛ do i dʋbɩrɛ awɩ bɩsãsɔɔra.
7 Mɔ̃ thɩmɩɩ bʋɔ na teenanɩ də̃bələ',
Mɛna gɩ, sõsor na mana tɩɩ cʋnana'.
8 Khaarda 'laarɛ dor nɔbɔ 'lɛ hʋɛ wɩrɛraakɛ n 'laanɛ gɩnɩ,
Paar wo paarɩkɛ wɩ n kanɩ, wɩ n yɩrɛ lõ paar.
9 Tibilikɛ n faanɩ dɩ paar, 'likha a n ƴaal,
Sɩ ʋrɛɛkɛ n khɩɛlɛ gɩnɩ ɔɔ thɩmɩsɔɔra a n leere kuuna.
10 Tibilikɛ jɛnɩ fɩlɛ, babɩɛl phaanɛ n sʋʋrɛ thɩ̃ɛ,
A ka jɔ be nʋɔ tamaakɛ (100) wɩ n benɩ də̃bəl.
11 Tɩɩ puu n hana lãʋ bɔɔ fɛw,
Dɩ wa tire thɔ̃thɔnɩkɛ khiinonɩ na pɩɛraa.
12 Ado fɩ caana Ursi nɩɩkɛ ɔɔ bisɔ buurni,
Gɩ ka baar də̃bəlikɛ fa caananɩ ɔɔ də̃bəəl cʋʋ pa.
13 Tibilikɛ n gbaanɩ puure dɩ lɩmɩ bɔ cʋʋrɛ,
Puure na pɩ ɔɔ cɔ yuurəka'.
14 Sʋʋ ɩɩr pa hor ɲɔ khurikɛ n ɓɛlanɩ,
Ɔbɔɔkɛ thʋ̃ kha na fʋnɩ pa' kɔɔ mãa hʋnɔnɛ.
15 Ʋrɛ n teanɩ dɩ pɛ tɩɩ puurə
Na ʋrɛ n pɛnɩ tɩɩ sarʋra sor,
Wɛr yeɲɔɔle, Thãgba Kɔ̃tɩn na n ƴaal wa'.
16 Aɲee bɔ ca də̃bǝli mũsũukɛ a hananɩ na tagʋʋ ?
A thena kpɛsɛrɛ ya ? Sɩ aa hananɩ fɩla' ?
17 Kuun bɩnɔ n nɩnanɛ naw ɔɔ kuunna bɔɔ fɛw,
Dɩ nɩwɛra a n hʋrɛ õkuun bɩnɔ.
18 Tibilikɛ na jɩɛnɩ fɩla' ɔr n tũo dɩ 'laa ɔɔbara
Ɩnɩ n do ɩnɩɩ alãkha tibili hel todaar.
19 Tibilikɛ naanɩ kɩla, puure a na,
Dɩ tibilikɛ n khǝsənɩ ɔɔbara, ɔɔ thɛthɛɛ kʋɛ a n ƴaal.
20 Tibilikɛ hananɩ kpɩɛr puu haara a n 'lɛ bɔɔa',
Dɩ ʋrɛ n mɩanɩ thɩmɩɩr puunə, a n lʋʋn thɩlkɩɩra.
21 Tibilikɛ kɔnanɩ də̃bǝl ha hele a kɔ̃,
Dɩ yʋ 'leedaarɩ thɩ na n kãka ga.
22 Haarɩkɛ henənɩ daw gɩ n dor thɩ bʋɔ tomɩra,
Sɩ kpɩɛr ɲaɲaanɛ n kpɛrɛrɛ tibil.
23 Tɩɩ puu n wolone dɩ tee pɔy thɩ̃ɛ
Sɩ dɩ kɩɩl gõgolõ kɩɩlʋ.
24 Kpɛsɛrɛ hale a wɔrɔna tibilikɛ jɩɛnɩ fɩlɛ dɔdɔdɔ,
Sɩ Də̃bəl n ƴaal dɩ pɩna thɩ khu paar fɛw.
25 Bikuun dǝbǝǝlu n dor gbobire ɔɔ thɩra,
Dɩ dona kharrɛ khɛrraakɛ kɔnaanɩ.
26 Ga bɔr dɩ fa pɛr hellu tɩɩ sarʋra ga,
Dɩ ga teena dɩ fa bɩɩr tɩɩ cʋnanɛsɔ awɩ dasar cʋʋra ga.
27 Tibilikɛ n jʋʋrɛnɩ ɔɔ thɩmɩsɔ sɩ da n mɩɩ kpɛsɛdaar gɩ,
Dɩ tibilikɛ n fʋɔnɩ ɔɔbara fɩl jɩdaar a do.
28 A də̃bǝl ɩɩ nʋɔ, wɩ punone gbaar tɩɩ kpɛsɛ,
Ado a fʋ ɔɔ delẽbi, a jɩrɛ fɩlɛ.