16
1 Tibil n tire thɩ̃ cʋʋ kpɩɛrɛ haara,Sɩ Thãgba Kɔ̃tɩn n 'laanɛ hʋɛ.
2 Tibil n kpɩɛrɛ ɩnɩ cʋʋ pasɔ fɛw bɔrɛ,
Sɩ Thãgba Kɔ̃tɩn jɩɛn tibili kpɩɛrsɔ.
3 Gba gɩrɛ fɩ n cʋʋnɩ a faa Thãgba Kɔ̃tɩnna,
Dɩ afɩ bɩ̃ lo kpɩɛr thɔ̃sɔ na jaal bɔɔ.
4 Thãgba Kɔ̃tɩn cʋʋrɛ thĩɛ fɛw dɩɩ hana kɩrʋ,
Tɩɩ puurəkɛ a cʋgʋʋrɛ da n pɩɛrna bɔgaar wire.
5 Tibil wo tibilikɛ hananɩ i ƴaal haar,
A n da Thãgba Kɔ̃tɩnna ga,
A gɩ dʋmɔ̃ dʋmɔ̃ a na 'lɛr so heene phubi.
6 Ha bulole na sobɔ cʋʋrɛ n dɔ nɔɔ dɩ tibil 'lɛ so hɛllɛ,
Dɩ ma hananɛ Thãgba Kɔ̃tɩnna n cʋɛ tibil dɩ golõ puu cʋʋrɛra.
7 A tibili cʋʋ pasɔ da Thãgba Kɔ̃tɩnna,
A n cʋʋrɛ ɔɔ lãlaardararakɛ dɩ wa n 'likha na ɔr.
8 Thɩ̃ gbe hananɛ na fɩl sarʋ,
Gɩ baar thɩ̃ jɔ hananɛ tə̃tə̃tə̃ na gõgolõ fɩlɛ.
9 Tibil n tire kpɩɛrɛ gɩrɛraakɛ a na cʋʋnɩ,
Sɩ Thãgba Kɔ̃tɩn n thɔgaa.
10 Jamana n mɩɩrɛ Thãgbaa irə,
A teena a dɩ sogʋʋr paara'.
11 Thɩ̃ dʋbɩ mɩɛda telẽe Thãgba Kɔ̃tɩn n ƴaal,
Ɔr pɩɛr mɔ̃ thɩ̃ dʋbɩ mɩɛdaasɔ fɛw teenanɩ gɩ hana.
12 Puu cʋʋrɛ na n da jamanasɔɔra ga,
Gɩdonɩ fɩl sar cʋʋrɛ n cʋɛ jamana dɩ pʋɔr jamana dʋʋra.
13 Wɩrɛ n mɩanɩ dasarʋ, wɛr jamanasɔ n na,
Dɩ ʋrɛ dɔnɩ sobɔ sodaar, ɔr wɩ n na.
14 Jamanaa nĩkhi punone cʋgʋʋ dɩ kʋ tibil,
Sɩ tɩɩ kpɛsɛ punone a wuruu.
15 A jamana ha daʋra, gɩ n 'laarɛ yire,
Ɔɔ bɔ cʋʋ hor thãgba kha ɲʋɔnɩkɛ n ɩɛnɩ.
Sokpaa tɩbɩlaa too kha thɩmɩɩra
16 Kpɛsɛ hananɛ baar dɛ hananɛ balamɔ̃ balamɔ̃,
Dɩ fɩl jɩɩr ba dɛ bulo hananɛ fĩi.
17 Tɩɩ telẽesɔ n golone puurera awɩ ɩɩr para,
Dɩ ʋrɛɛkɛ n dɔnɩ bʋrɛ ɔɔ ɩɩr para, ɔɔ yi a n bɛr.
18 I ƴaalɛ n kʋlɛ ƴɩɛ dɩ kʋɛrɛ na n kpaan,
Dɩ dɩbara khəire n kʋʋl ƴɩɛ dɩ jir na n kpaan.
19 Dɩbara wure na bɔkʋdara baar,
Mɔ̃ fa n tɩnɛnɩ kha lẽle thɩ̃ɛ na i ƴaaldara.
20 Tibilikɛ n jʋrɛnɩ thɩmɩɩr dɩɩ dã, a n 'lɛr nɔbɔɔ,
Dɩ ʋrɛɛkɛ faanɩ ɔɔbara Thãgba Kɔ̃tɩnna, a n hananɛ daw.
21 Tibilikɛ hananɩ kpɛsɛrɛ, ɔr wɩ n we fɩl jɩn,
Dɩ hɛlɛlɛ thɩmɩɩr n cʋʋrɛ tɩbɩla dɩ wɩ jɩ kɩrʋ.
22 Fɩl bɔ hananɛ dor ɲɔ bu kaarɩkɛ n 'laanɛnɩ yire, wɩrɛraakɛ hana gɩnɩ,
Sɩ də̃bələə də̃bəəl n heene wɩ sor.
23 Kpɛsɛdaarɩ nɔ n mɩɩrɛ na bʋdʋr,
Dɩ ɔɔ thɩmɩsɔ n cʋʋrɛ tɩbɩla dɩ wɩ jɩ kɩrʋ.
24 Thɩmɩɩ bɔy hʋrɛ thʋʋr
Gɩ n daarɛ nʋɔra, gɩ n dor thɩɩ dakha tomɩra.
25 Tibil ɩkha n gbaar hʋɛ, dɩ wɩ kpɩɛr hʋ bʋɔ gɩ,
Sɩ ɔɔ pɩpɩɩ pa dɩɩ do khi hʋɛ gɩ.
26 Kɔmɛr n fɛrɛnɛ thɔ̃don da n pɛ ɲɛ̃ɛ thɔmana,
Gɩdonɩ ɔɔ thɛthɛɛ nɔ n tʋɔ da n pɛr.
27 Tɩɩ khabaa n gbɛbɩrɛ puure,
Ɔɔ nɔ thɩmɩɩsɔ n hɩrɛ mɔ̃ dɔɔ hɩnɩ.
28 Nãbɛɛ tibil n pɛr thʋ̃kha,
Dɩ lĩlir n kuure kuuna.
29 Fãga kho tibil n fɩɩlɛ ɔɔ alãkha tibil,
Dɩ cʋgʋʋ dɩ gba hʋ puu.
30 Tibilikɛ n khaanɛnɩ yinə sɩ dɩ gbɛbɩ puu cʋʋrɛ haara,
kɛ n dɔnanɩ nɔfaa, a 'liri cʋʋrɛ puure pɩ.
31 Yʋsũu bulo dor i dʋbɩ nũfe kpɩɛ,
Wɩrɛ n cʋɛnɩ fɩl sarʋ, wɛr n 'lɛ gɩ.
32 Tibilikɛ dɔnɩ nĩkhi jodaar
A baar ʋrɛ yɛnɩ kuun khaa ha nɩ,
Dɩ ʋrɛɛkɛ dɔnɩ dɩbara fʋdaar
A baar ʋrɛ hananɩ punone dɩ teena dɩɩ.
33 Wɩ punone a lɩ lɩɩ,
Sɩ Thãgba Kɔ̃tɩnɩ pa tuur fɛw n the.