14
1 Khɛr kpɛsɛdaar n jɩɛ fʋ ɔɔ cɔka,Sɩ khɛr də̃bəl n wɩɛlɛ ɔɔ cɔ na ɔɔ thɛthɛɛ ɲɛ̃.
2 Tibilikɛ n cʋɛnɩ datelẽe
Thãgba Kɔ̃tɩn a n ma,
Sɩ ʋrɛɛkɛ n ɩrɛnɩ gõgolõ hʋɛra,
Thãgba Kɔ̃tɩn a n beesi.
3 I ƴaal thɩmɩa n pɛr də̃bəllə sor,
Sɩ Tɩɩ kpɛsɛsɔ n 'lɛr bɛrɛ dɩɩ do awɩ thɩmɩɩ dɔ nɔɔ.
4 Ado na kokol na hala'
Thʋnɛ n toore dakhɩɩ,
Kokol naa fãgara gɩ n the
Dɩ tibil n 'lɛ thɩ̃ɛ jɔɔ.
5 Sobɔ sojɩdaar na n kur sõsora',
Ʋrɛ n sõsonenɩ, sõso sojɩdaar gɩ.
6 Ɓoɓorodaar n ƴaalɛ kpɛsɛrɛ dɩ thʋnɔ,
Sɩ tibilikɛ jɩɛnɩ fɩlɛ, jɩɩr na khɩɩraa 'lɛra ga.
7 Hʋnɔnɛ fĩi na də̃bəl,
Gɩdonɩ aa hana jɩɩr ɔɔ delẽbirə dɩ fa 'la'.
8 Bʋdʋ tibili kpɛsɛ n cʋgʋʋrɛ dɩ dʋ bʋrɛ hʋɛraakɛ a n gbanɩ,
Sɩ də̃bələə də̃bəəl n fɩɩl wɛr.
9 Də̃bələ na n therna dɩpa gbɛbɩ thɩmɩɩra',
Sɩ tɩɩ telẽesɔ wer n hananɛ yaal bʋɔ.
10 Kharɛɛkɛ hanɩ tibili hara
Ɔr bɩɛl n jɩɛn gɩ,
Dɩ aa hana daw dakha haara tɩɩ kpɩɩ na puno na buloə'.
11 Tɩɩ puunəə cɔka na wɩɛlɛ
Sɩ tɩɩ telẽesɔɔ cɔ na n 'liri fãga bɔɔ fɛw.
12 Tibil ʋkha n gbaar hʋɛ dɩ kpɩɛr hʋ bʋɔ gɩ,
Sɩ pɩpɩɩ paar dɩɩ do khi hʋɛ gɩ.
13 Tibil punone a na mã sɩ gɩ do gaarɛ hale ɔɔ hara,
Dɩ daw dakha punone debi a do gbobire pɩpɩɩ paar.
14 Tɩɩ khabaa n 'lɛr khorɩkɛ thɛnɩ ɔɔ dakhaba thɔna,
Dɩ tɩɩ bʋɔ 'lɛ khor dɩɩ the ɔɔ bɔ cʋʋra.
15 Fɩl 'leedaar n ture gɩrɛ fɛʋʋkɛ wɩ n sʋʋraanɩ,
Sɩ tɩɩ kpɛsɛ n dʋrɛ bʋrɛ ɔɔ nɛ ti pasɔɔra.
16 Tɩɩ kpɛsɛ n mar puu cʋʋrɛ da n golono,
Sɩ də̃bəl hananɛ ha pɛrɛ ɔɔbarara jɔɔ dɩɩ cʋgʋʋ dɩ lono.
17 Tibilikɛ n gbaanɩ nĩkhii kɔrɔ, də̃bəəle a n cʋʋ,
Dɩ ʋrɛɛkɛ hananɩ kpɩɛr puu n pɛr laarɛ ɔɔbara.
18 Fɩl 'leedaraa thɩ̃ɩkɛ wa 'lɛnɩ dʋɔn də̃bəəle,
Sɩ bʋdʋdara n 'lɛr jɩɩr dɩɩ do war nũfe kpɩɛr.
19 Tɩɩ puusɔ na gʋɛrɛ ƴɩɛ tɩɩ bɔɩsɔɔ ƴɛbʋrɔ,
Dɩ tɩɩ puunə na n jɩlɛ tɩɩ saraa lõfonɔra.
20 Wɩ n laarɛ bɔdaar,
Ɔɔ totoosɔ fɛʋrakɛ n laarʋrɛ,
Sɩ lẽlee kũusɔ n jɔrɛ ka.
21 Tibilikɛ n beesinenɩ ɔɔ 'walãkha, sopuu a n cʋʋ,
Sɩ gɩ da ʋrɛraakɛ n hananɩ bɔ jɩɩr gãgarara.
22 Wɩrɛɛkɛ hananɩ puu cʋʋ kpɩɛrɛ, bu pa hʋɛ wɩ gba,
Sɩ wɩrɛ hananɩ bɔ cʋʋ kpɩɛrɛ,
Wɩ n hana warɛ ha bulole na sobɔ cʋʋrɛ.
23 Thɔma fɛw hananɛ khor,
Sɩ thɔ̃ dʋʋr na nɔ haar dɩbara, gɩ n pɛr thɩ̃ 'leere.
24 Lẽle thɩ̃ɛ dʋɔn tɩɩ kpɛsɛsɔɔ nũfe kpɛ,
Də̃bələ na hana thɩ̃ɛ a ga do də̃bəəlela gaa ga.
25 Sobɔ so jɩdaar n taarɛ tɩbɩla,
Sɩ ʋrɛ n mɩanɩ sõsor thɩmɩa, a n fɩɩlɛ tɩbɩla.
26 Tibilikɛ n maanɩ Thãgba Kɔ̃tɩn,
A hananɛ tujɩ dɛ̃ɛ pa bʋɔ,
Ɔɔ bɩsãsɔ n 'lɛr phi paar Thãgba Kɔ̃tɩnna.
27 A hana maar Thãgba Kɔ̃tɩnna, n 'laarɛ yiri,
Gɩ n taarɛ tibil khi pherasɔɔra.
28 A tɩbɩla jɔr dɩɩra jamanaa i dʋbɩ gɩ,
Sɩ a tɩbɩla wur na gbũ ɔɔ jamana do n kʋɛa.
29 Tibilikɛ na n gbaanɩ nĩkhii kɔrɔa', a jɩrɛ fɩlɛ dɩɩ kɔ̃tɩ̃,
Sɩ ʋrɛ na n pʋɔrɛnɩ sa gba nĩkhiiə', a n nɩnanɛ ɔɔ də̃bəəl jɩɛra.
30 Ha ie hananɛ n 'laarɛ tomɩ kheu tomɩra,
Sɩ gbugi hor khookɛ n hanɩ khubərə.
31 Tibilikɛ n ʋʋnɛnɩ bɔkʋdaara, ʋrɛ tieni a n beesɩ,
Sɩ ʋrɛɛkɛ n jɩɛnɩ bɔdaar bʋɔra, ɔɔ tidaar a n dʋbɩ.
32 Tɩɩ puu cʋʋ pa puurə n tʋɔ kpɛɛ,
Sɩ tɩɩ sarʋ wer n 'lɛr phi paar foo dɩ dana khi bɔɔ.
33 Kpɛsɛrɛ hale fɩl jɩdaaraa hara,
Də̃bələə thɛthɛrakɛ jɩrɛ gelela.
34 Fɩl sar cʋʋrɛ n khəire caar,
Sɩ sopuu cʋʋrɛ n pɛ yicuru dɩdarara.
35 Jamana n khɩɩrɛ thɔ̃daarɩkɛ hananɩ bʋdʋr,
Sɩ a n gbaar nĩkhii na ʋrɛ n cʋɛnɩ yicur thɔma.