13
1 Bɩsaanɩkɛ kpɛsɛnɛnɩ, a n pɛr ɔɔ thɩɩ dɩɩr nũu,Sɩ tɩɩ beesɩ bɩsaan na n tuon phaana'.
2 Tibili nɔ thɩmɩɩ n dɔ nɔɔ dɩ 'lɛ bɔɔ,
Sɩ tɩɩ fɩɩldaraada dʋɔn fãga khor.
3 Tibilikɛ n dɔnɩ bʋrɛ ɔɔ nɔra, a n bɛrɛ ɔɔ yi,
Sɩ ʋrɛɛkɛɛ nɔ na n gbɛbana', ɔɔbara a n kʋɛ.
4 Khãkhal n hananɛ thɩ̃ ƴaalɛ sɩ a n 'lɛ ga,
Sɩ Wɩrɛ n pɩɛrnɩ ɲɛ̃ɛ thɔmana
Wɩ n 'lɛr gɩrɛ fɛʋʋkɛ wɩ n ƴaalnɩ.
5 Tɩɩ sarʋ na n ƴaal sõso thɩmɩa ga,
Tɩɩ puu n kpaarna i kʋɛ thɩmɩa na yicur thɩmɩa.
6 Fɩl sar cʋʋrɛ n kɛɛrɛ ʋrɛraakɛ n ɩrɛnɩ dateleena,
Sɩ bɩ̃ kpal cʋʋrɛ n kʋɛa puu cʋʋdaar.
7 Tibil ɩkha hale dɩ wa n cʋʋ lẽle khaa
Sɩrakɛ wa hana thɩ̃ɛa'
Sɩ tibil ɩkha hale dɩ wa n cʋʋ bɔdaar khaa,
Sɩ wɛr ka hana thɩ̃ɛ jɔɔ.
8 Lẽle thɩ̃ɛ dɔ gɩrɛ n taanɩ lẽledaar,
Sɩ bɔdaar wer, na n caana phə̃phələnə'.
9 Tɩɩ sarʋ hor dahɩrɛ caranɛɛkɛ n 'laanɛnɩ daw,
Sɩ tɩɩ puusɔ hor dɔ carãakɛ n khiirenɩ.
10 I kaar n ɩɩrnanɛ thʋ̃ kha,
Sɩ kpɛsɛdaar n turi dɩɩrɛ.
11 Lẽle thɩ̃ɛɛkɛ tibil n 'lɛnɩ babɩɛl vuu,
Ga n toa',
Sɩ ʋrɛ n ƴaalɛ gɩnɩ gbegbegbe,
Gɩ n tɔr dɩ ga n pɛr.
12 Nũ pɛrɛ thɩɛnaakɛ na n dananɩ kɔrɔa',
Gɩ n kʋɛrɛ haar,
Sɩ a tibili thɩ̃ɩkɛ a n ƴaalnɩ dã oti,
Gɩ n hor thɩrʋʋkɛ n 'laanɛnɩ yire.
13 Tibilikɛ na n gbaanɩ tibili thɩmɩa',
A na 'lɛr so khɩɩ,
Sɩ ʋrɛɛkɛ n cʋɔnɩ jɔfʋ
A na 'lɛr kakor.
14 Tɩɩ kpɛsɛɛ dɩɩr hor ɲʋɔnɩkɛ n 'laanɛnɩ yire,
Gɩ n cʋʋrɛ tibil dɩ golõ khir pherara.
15 Fɩl bɔ hananɛ n cʋʋrɛ tibil dɩ da tɩbɩlala,
Sɩ gõgolõdaraa cʋʋ pa na hana khu pa bʋa'.
16 Bʋdʋ tibil n cʋʋrɛ thɩ̃ɛ na fɩlɛ,
Sɩ də̃bəl n nɛna ɔɔ də̃bəəl jɩɛra.
17 Thɔ̃thɔn puu n 'liri thɩlkɩɩr,
Sɩ sobɔ thɔ̃thɔn hor thɩɩkɛ n kpɛɛnɛnɩ khoo.
18 Tibilikɛ na n tuonɩ dɩɩra'
Na jire bʋɔra na beesirera,
Sɩ ʋrɛɛkɛ n tuonɩ phaanɛ
A n 'lɛr cʋʋr.
19 A tibil 'lɛ gɩrɛ a n ƴaalnɩ gɩ n daaraarɛ ka,
Də̃bələ na n tu wɩ kɛr sɩ wɩ faa puurə'.
20 Ʋrɛɛkɛ n tɔɔnɩ kha na tɩɩ kpɛsɛ,
A n debire dɩ do tɩɩ kpɛsɛ,
Sɩ ʋrɛɛkɛ n tɔɔnɩ kha na də̃bəl,
A n 'liri nɩwɛ.
21 Thɩlkɩɩr n weere sopuudara da n kpaan,
Sɩ tɩɩ sara na 'lɛr nɔbɔɔ gɩ do kakor.
22 Tɩɩ bʋɔɔ khĩdi thɩ̃sɔ,
Ɔɔ məlsɔ na hɩna,
Sɩ sopuudaar lẽle thɩ̃sɔ wer,
Tɩɩ sarʋ na hɩna.
23 Bɔdaar n 'lɛr thɩ̃ɛ jɔɔ ɔɔ lɔɔkɛ a n kʋʋlnɩ,
Dɩ ɩkha na n kpɛrɛ dɩɩ do awɩ gõgolõ fɩl dɔ nɔɔ.
24 Ʋrɛɛkɛ n yɛnɩ ciləmũu na n tha ɩnɩ birə ga,
Ɔɔ bi a n laar,
Sɩ ʋrɛ naanɩ ɔɔ bi, a n naarʋrɛ bɩsã bu bɔɔ.
25 Tɩɩ sarʋ n khor dikor dɩ hi,
Sɩ tɩɩ puu bɩ̃ na n lɩɛr kɔmɛra.