12
1 Tibilikɛ n tuonɩ naarɛ, a n ƴaalɛ jɩɩr,Sɩ ʋrɛɛkɛ na n naanɩ phaana', a də̃bəəle.
2 Thãgba Kɔ̃tɩn n bɔnanɛ ʋrɛɛkɛ dɔnɩ tɩɩ bʋɔ,
Sɩ tibilikɛ hananɩ kpɩɛr puu, Thãgba Kɔ̃tɩn n pɩɛraarɛ sor.
3 Tibil na n 'li fãga bɩ̃ puu cʋʋrɛra ga,
Sɩ tɩɩ sarʋ gɔr nɛɛ dɩɩ ma, aa ha tutugo paara'.
4 Khɛrɩkɛ bʋɔnɔnɩ, a n hor nũfe kpɩɛ ɔɔ koo yʋɔ,
Sɩ khɛrɩkɛ n cʋɛnɩ gɩrɛ n kɔnɩ yicuru, khubi khoo a n ho ɔɔ koo khubisɔɔra.
5 Gɩrɛ tɩɩ sara n kpɩɛrnɩ dʋɔn datelẽ haar,
Sɩ tɩɩ puunəə ƴaal fɛw, dʋɔn fɩɩlɛ.
6 Tɩɩ puusɔɔ thɩmɩ n kʋrɛ mɔ̃ pheru n kʋnɩ,
Sɩ tɩɩ telẽesɔɔ nɔ thɩmɩ n taa wɛr.
7 A tɩɩ puu khi, a bũburone,
Sɩ tɩɩ sarʋʋ cɔka hale khorr vʋ̃ʋ.
8 Tibili fɩl bɔ hana n dɔ nɔɔ dɩ 'lɛ khɩɩrɛ,
Sɩ ʋrɛ hananɩ ha puu, a n 'lɛr beesire.
9 Tibilikɛ wa n thernana' sɩɩdo a hananɛ thɔ̃daar bɩɛl,
A baar ʋrɛɛkɛ n dʋbanɩ ɔɔbara, sɩɩdorakɛ a n yɩ dikora'.
10 Tɩɩ sarʋ n hɩɩnɛ ɔɔ nʋ̃sɔ bɔɔbɔɔ;
Sɩ tɩɩ puusɔɔ bɩ̃ kpal ka,
11 Tibilikɛ n kʋlɛnɩ ɔɔ thɩ a n 'lɛr dɩkɔ jɔɔ,
Sɩ ʋrɛ n tɔɔnɩ khaarkhaar cʋʋrɛra, aa hana fɩla'.
12 Tɩɩ puu n pɩɛrɛ hara puu cʋʋdaraa thɩna,
Sɩ tɩɩ saraa thɩ̃ 'lɛ n ther awɩ thɛthɛɛ thɔna.
13 Tɩɩ puu thɩmɩɩ puu dor pheruukɛ n fʋɔnɛɛnɩ,
Sɩ tɩɩ sarʋ n marɛ dɩ the ga bɔgaara.
14 Tibili nɔ thɩmɩɩ n haarɛ khor dɩɩ dãa oti,
Ntɛ n 'lɛr ɔɔ lɩmɩ mɔna ɔɔ cʋʋ pa hanɩ.
15 Də̃bǝl n kpɩɛrɛ ɩnɩ cʋʋ pasɔ telene,
Sɩ ʋrɛ n tuoni dɩɩrɛ, ɔr dʋɔn tɩɩ kpɛsɛ.
16 Də̃bəl n nɛna ɔɔ nĩkhi dapaara jɩɛra,
Sɩ ʋrɛ n dɔnɩ bʋrɛ, a n fʋrɛ haar nɩɩrɛra.
17 Ʋrɛɛkɛ n mɩanɩ sobɔr, a n cʋʋrɛ fɩl sarʋ dɩɩ yɩr,
Sɩ sõso sojɩdaar n fɩɩlɛ.
18 Ʋrɛɛkɛ n mɩanɩ baba, ɔɔ thɩmɩ n gɔr bajɩna khaa,
Sɩ tɩɩ kpɛsɛsɔɔ delẽbi thɩmɩɩ hor thɩɩ dɩɩ kpɛɛ khoo.
19 Sobɔ thɩmɩɩ n pʋɔrɛ khorr,
Sɩ sõso thɩmɩɩ n phor dapaara mɔ̃ wɩ n canɩ yinə.
20 Fɩɩlɛ hale puu cʋʋ kpɩɛrdaarɩ hara,
Sɩ wɩrɛɛkɛ n 'laanɛnɩ fɩlɛɛkɛ n 'laanɛnɩ ha ɩɩ, wɩ n 'lɛr daw.
21 Puu bɩɛllakɛ na dã tɩɩ sarʋa',
Sɩ tɩɩ puusɔ na hire gaarɛ phi.
22 Sõsodaar na n da Thãgba Kɔ̃tɩnna ga, Sɩ wɩrɛ dɔnɩ sobɔdara, wɛr n daaraa.
23 Bʋdʋ tibil na n nɩna ɔɔ jɩ jɩɛra ga,
Də̃bəl n bɛ ɔɔ də̃bəəl da n wɩɛl.
24 Wɩrɛɛkɛ n pɩɛrnɩ ɲɛ̃ɛ thɔmana, wɛr na hɩna kɔ̃tɩɩnɛ,
Sɩ wɩrɛ n bɔnɩ ɲɛɛna, wɛr na dʋɔn dea.
25 Dɛr haara n khiire tibil ɲɛ̃ɛ,
Sɩ thɩmɩɩ bʋɔ n bire cʋgʋʋ dɩ 'lɛ daw.
26 Tɩɩ sarʋ n nɩrɛ ɔɔ 'walãkha tibilə hʋ bʋɔ,
Sɩ tɩɩ puusɔɔ fɩl n cʋʋ wɛr dɩ wɩ buur.
27 Cɔ̃cɔl khãkhal na n yɩ nʋmɩ dɩ kʋ dɩ 'wa ga,
Tibili lẽle thɩ̃ kɔ̃tɩ̃ dʋɔn thɔ̃ dʋʋr.
28 Fɩl sar hʋɛra yiri ha,
Hʋɛ gɩɩkɛ khir na harɔna'.