Yu cʋʋrɛ na n da Thãgba Kɔ̃tɩnna ga
11
1 Thãgba Kɔ̃tɩn n ƴʋɔnɛ thɩ̃ dʋbɩ mɩɛdaakɛ wɩ n yunəni,Sɩ thɩ̃ dʋbɩ mɩɛdaakɛ telenenɩ n daaraa haar.
2 I kaar n pɛr beesire tibillə,
Sɩ dɩbara wure n 'laanɛ kpɛsɛrɛ.
3 Tɩɩ telẽesɔɔ fɩl telẽ n thɔɔnɛ wɩ,
Sɩ tɩɩ fɩɩldaraa fɩl gõgolõ n kɛrɛ a bũburõ wɩ.
4 Lẽle thɩ̃ jɔ hananɛ na n taa bʋɔ Thãgbaa nĩkhi wirə ga,
Sɩ fɩl sar hananɛ n taarɛ tibil khirə.
5 Tɩɩ telẽe fɩl sar n thɔgʋʋrɛ a pɛ hʋ bʋɔra,
Sɩ tɩɩ puu n taarɛ ji ɔɔ thɛthɛɛ puurərə.
6 Tɩɩ telẽesɔɔ fɩl sar n taa wɛr,
Sɩ tɩɩ fɩɩldara n jire pheruraakɛ dɔnɩ awɩ thɩ̃ jɔ ƴaal.
7 A tɩɩ puu khi pɩ, ɔɔ nũ pɛ kʋɛrɛ,
Tujɩɩrɩkɛ a kɔɔ dɛɛnɩ ɔɔ lẽle thɩna, gɩ bure.
8 Tɩɩ sarʋ n forre thɩlkɩɩra dɩ the,
Sɩ tɩɩ puu n pɔ dɩ jiro.
9 Tɩɩ puu n ƴaalɛ a bũburone ɔɔ 'walãkha tibil na ɔɔ nɔ thɩmɩ,
Sɩ tɩɩ sara n 'lɛr taarɛ dɩɩ the awɩ jɩ hanana.
10 A tɩɩ sara 'li dɩbara, dɩdara fɛw n kãkarɛ,
A tɩɩ puunǝ na bũburõ, dɩdara na n be da hulẽbe.
11 Tɩɩ telẽesɔ n 'laarɛ bɔnanɛ dɩɩra dɩ 'li fãga,
Sɩ tɩɩ puunǝǝ nɔ thɩmɩ n wɩɛlɛ dɩɩ.
12 Ʋrɛɛkɛ n beesinenɩ ɔɔ 'walãkha tibil, aa jɩ fɩla',
Sɩ tibilikɛ hananɩ jɩɩr, a n 'wɩɩrɛ nʋɔ.
13 Tibilikɛ naanɩ tibil i kʋɛrɛ, ɔr n caanɛ thɩ̃ kernasɔ,
Sɩ ʋrɛɛkɛ hananɩ kpɩɛr bʋɔ, a n thirore thɩmɩɩ.
14 A thɔthɔɔda bʋɔ na ha dɩɩra ga, gɛr n ɩnana kʋɛrɛ dɩdarara,
A fɩl 'laadara jɔr dɩɩra, gɩ n 'laarɛ taarɛ dɩdarara.
15 Tibilikɛ tuonɩ ɩnɩ n do tɩɩ kpɩɩ hel todaar, a n yɩrɛ nɩwɛ,
Sɩ ʋrɛɛkɛ na tuonɩ ɩnɩ n do hel todaara', a n toore na ha ɩɩ.
16 Khɛrɩkɛ hananɩ fɩl bʋɔ, a n 'lɛr khɩɩrɛ,
Dɩ fãga khodara n 'lɛr lẽle thɩ̃ɛ.
17 Tibilikɛ dɔnɩ bɔ cʋʋdaar, ɔɔbarara a n cʋʋ bɔɔ da n pɛ,
Sɩ tibilikɛ dɔnɩ hɔ̃hɔl, ɔɔbarara a n hʋɔlɔ.
18 Tɩɩ puu n dor thɔma, sɩ ga n tagʋʋ bʋɔa',
Sɩ ʋrɛɛkɛ n cʋɛnɩ dasarʋ, a n 'lɛr lɩmɩ telẽe oti.
19 Mɛ̃ gɩ, fɩl sarʋʋ dã pa, yire gɩ,
Sɩ ʋrɛɛkɛ n jalananɩ puu cʋʋrɛ, ɔɔ khi a wee da n kpaan.
20 Thãgba Kɔ̃tɩn n laarɛ wɩrɛ hananɩ ha puu,
Sɩ wɩrɛ hananɩ fɩl telẽe, wɛr a n na.
21 A gɩ dʋmɔ̃ dʋmɔ̃, sɩ tɩɩ puu na 'lɛ sor,
Sɩ tɩɩ sara wer, fɛw na 'lɛr taarɛ.
22 Khɛrɩkɛ bʋɔnɔnɩ sa 'lee fɩl bʋɔ,
A hor sɩthookɛ wɩ tonɩ dɛ ɲɔ̃bi tʋʋ mɩ̃kaara.
23 Gɩrɛ tɩɩ sara n ƴaalnɩ, dabʋɔ gɩ,
Sɩ gɩrɛ na dananɩ tɩɩ puusɔɔ, Thãgbaa nĩkhi gɩ.
24 Wɩrɛɛkɛ n tɩnɛnɩ awɩ thɩ̃, wɩ jɩɛ le a na dɛɛnɔ,
Dɩ wɩrɛɛkɛ n tumonenɩ jɔɔ ka, wɩ n jɩɛ do bɔdara a na dɛɛnɔ.
25 Tibilikɛ n 'laanɛnɩ na ha bulole, oti a na 'lɛ thɩ̃ɛ jɔɔ,
Dɩ ʋrɛɛkɛ n hananɩ ɲɔlkhadara ɲʋɔn, wɩ n khiire ɔɔ ɲɔlkha dakha.
26 Tibilikɛ n tɔnanɩ dikor a n dolõa', dɩdara n sʋɔnɛ,
Sɩ ʋrɛɛkɛ n dolone gɩnɩ, dɩdara n bɔnaanɛ.
27 Tibilikɛ n 'lʋɔnɩ bɔɔ da n kpaan, a n 'lɛr khɩɩrɛ,
Sɩ ʋrɛɛkɛ n ƴaalɛnɩ puure, puurera n 'lie.
28 Tibilikɛ dɛɛnɛnɩ kpɩɛrɛ ɔɔ lẽle thɩna, a n jire,
Sɩ tɩɩ sara n thɔɔrɛ mɔ̃ faa n thɔɔnɩ.
29 Tibilikɛ n pɩɛrnɩ ɲaɲaanɛ ɔɔ cɔ,
ɲɛ̃ɛ khɩɩ a na tɛ na jɩɩlna,
Dɩ də̃bəl na dʋɔn tɩɩ kpɛsɛɛ dee.
30 Tɩɩ sarʋʋ cʋʋ pasɔ hor thɩrʋʋkɛ n 'laanɛnɩ yiri,
Tɩɩ kpɛsɛ n marɛ dɩ fi tɩbɩlaa hasɔ.
31 Ado tɩɩ sarʋ na 'lɛ nɩwɛ kɛ thɩɩra,
Dɩ mɔ̃ ga ha tɩɩ puurə na ʋrɛraakɛ dɔnɩ sopuudaar?