Salomɔ̃ɔ sokpa kpɩɩsɔ
10
1 Salomɔ̃ sɔ sokpaasɔɔkɛ ayɩ wɔɔ:Bɩsaanɩkɛ kpɛsɛnɛnɩ, ɔɔ thɩɩ da gɩ n do,
Sɩ bɩsaanɩkɛ də̃bǝəlnenɩ, ɔɔ nɩɩ ha hel gɩ n do.
2 Lẽle thɩ̃ɛɛkɛ tibil 'lɛnɩ na fɩl gõgolõ na n hana khora',
Sɩ fɩl sarʋ n taarɛ tibil khirə.
3 Thãgba Kɔ̃tɩn na n faa tɩɩ sarʋ dɩ gaar kɔmɛra ga,
Sɩ a n tʋɔn tɩɩ puusɔ awɩ thɩ̃sɔɔkɛ wɩ n ƴaalnɩ.
4 Ʋrɛɛkɛ n tɔtɔɔnɛnɩ ɲɛ̃ɛ a n jire bʋɔra,
Sɩ ʋrɛ n pɩɛrnɩ ɲɛ̃ɛ a n ler.
5 Tibilikɛ n ƴaalɛnɩ dikor obulolo bʋdʋdaar gɩ,
Sɩ ʋrɛɛkɛ n daarɛnɩ jʋ kha bɔɔ, a n kʋrɛ yicuru.
6 Tɩɩ sarʋ heene bɔnanɛ ɔɔ yʋɔ,
Sɩ tɩɩ puusɔɔ nɔra wer, bɩkhɩrɛ he le.
7 Ado wa jɩna tɩɩ sarʋ gɩ n 'laarɛ daw,
Sɩ tɩɩ puu wer, wɩ n diinəəne na ɔɔ i fɛw.
8 Ʋrɛɛkɛ hananɩ kpɛsɛrɛ, a n ture jɔfʋsɔ,
Sɩ ʋrɛ n mɩanɩ baba, ɔɔ thɛthɛɛ dɩbara a n kʋɛ.
9 Tibilikɛ n ɩrɛnɩ na fɩl sarʋ, a n ɩɩrɛ na tu jɩɩr,
Sɩ ʋrɛ n ɩrɛnɩ na fɩl gõgolõ, wa yɩɩrɛ mɔ̃ a hanɩ.
10 Ʋrɛɛkɛ n mʋmʋʋnɛnɩ sobɔr ɩkhasɔɔra, puure a n cʋʋ wɩ,
Sɩ ʋrɛ n mɩa wɩnɩ sobɔr, ha ɩɩ a n ɩna war.
11 Tɩɩ sarʋʋ nɔ thɩmɩɩ hor ɲɔ bu kaarɩkɛ n 'laanɛnɩ yiri,
Sɩ tɩɩ puunǝǝ nɔra, bɩkhɩɩrɛ hire le.
12 Laarɛ n ɩnanɛ sʋʋ,
Sɩ naw n thire dɩ paarsɔɔra fɛw.
13 Tibilikɛ jɛnɩ fɩlɛ, kpɛsɛrɛ n yɩrrɛ ɔɔ nɔra,
Sɩ ʋrɛ na jɛnɩ fɩla', ɔr n 'lɛ gbol bɩɩ gɔrra.
14 Tɩɩ kpɛsɛsɔ n phɔmɩnɛ jɩɩr a thɩɩn,
Sɩ də̃bǝli nɔ na n pʋɔr sa ɩnanaa bũburonə'.
15 Lẽlee thɩ̃ jɔ hana hʋʋraarɛ dɩɩkɛ hananɩ bɛbɛr gʋʋ dɩɩ kpalalaa,
Sɩ bɔdaraa bɔra n bũburone wɩ.
16 Gɩrɛ tɩɩ sarʋ n 'lɛnɩ ɔɔ thɔmana, yiri gɩ n haa,
Sɩ khorɩkɛ tɩɩ puu wer n 'lɛnɩ, puure a n cʋʋna.
17 Tibilikɛ n tuoni dɩɩrɛ, yi hʋɛ a gba,
Sɩ ʋrɛɛkɛ na n tuonɩ phaana', bu pa hʋɛ a gba.
18 Tibilikɛ n hananɩ laarɛ tibilə sɩ dɩ kero, bɩnɛ yeɲɔdaar gɩ,
Dɩ ʋrɛ n kʋɛnɩ tɩbɩla ie, də̃bəl gɩ.
19 Tibilikɛ n mɩanɩ jɔɔ, a n pʋɔr sa da'.
Sɩ ʋrɛɛkɛ n fʋɔnɩ ɔɔ delẽbi, ɔr hana fɩl bʋɔ.
20 Tɩɩ sarʋʋ nɔ thɩmɩɩ bɔrɛ a ho dɛ bulo kile haar,
Sɩ tɩɩ puunəə kpɩɛr wer na hana thɩ̃ bʋɔa'.
21 Tɩɩ sarʋʋ nɔ thɩmɩɩ n thɔɔrɛ tɩɩ jɔjʋɔ a pɛ hʋ bʋɔra,
Sɩ də̃bǝlǝə kpɩɛr 'lee n dɔ nɔɔ dɩ wɩ khiir.
22 Thãgba Kɔ̃tɩnɩ bɔna n 'laanɛ ler tibilə,
A n bir dɩ dɛbɩrɔ nɩwa'.
23 Mɔ̃ puu cʋʋrɛ honɩ ɓol thɩ̃ɛ də̃bǝllǝ,
Ɔmɛ̃ kpɛsɛ thɩ̃ cʋʋrɛ ha dakha tibilǝǝkɛ dɔnɩ fɩl jɩn.
24 Puureekɛra tɩɩ puu n dɛnanɩ, gɛr n 'lie,
Dɩ gɩrɛɛkɛ tɩɩ sara n ƴaalnɩ, gɛrra Thãgba n ha wɩ.
25 A nɩwɛ ɩɩr jɛ kʋkʋʋl khaa, gɩ n gbaar tɩɩ puu aa n hale bã,
Sɩ tɩɩ sarʋ wer n jɩɩlɛ dɩ ma kɩbɩ bɔɔ fɛw.
26 Gɩrɛɛkɛ thɩ̃ ƴʋ̃ɔ n cʋʋnɩ ɲɩmana, na gɩrɛɛkɛ isiir n cʋʋnɩ yinənə,
Gɛr khãkhal n cʋʋ wɩrɛraakɛ thɔnaanɩ.
27 Thãgba Kɔ̃tɩnɩ ma n 'laarɛ yi gbãa,
Sɩ tɩɩ puusɔɔ yɛ nɔ na n gbaana'.
28 Thɩ̃ɛɛkɛ tɩɩ sara n pɩɛrnɩ daw gɩ,
Sɩ tɩɩ puusɔ wer, wa pɛr nũu na thʋnɔ.
29 Fɩlɛɛkɛ Thãgba Kɔ̃tɩn n donanɩ thɔma hor tɩɩ telẽesɔɔra bɛbɛr gʋʋ,
Sɩ wɩrɛɛkɛ n cʋɛnɩ puure, kʋɛrɛ gɩ n ɩna war.
30 Tɩɩ sarʋ na ha tutugo paar yuurəka'
Sɩ tɩɩ puusɔ wer, na pʋɔr thɩɩra ga.
31 Tɩɩ sarʋʋ nɔ hinəne kpɛsɛrɛ,
Sɩ delẽbireekɛ n gõgolonenɩ wa kuruure.
32 Tɩɩ sarʋʋ delẽbi jɩrɛ ha bulo thɩmɩɩ dɩɩ mɩɩ,
Sɩ tɩɩ puusɔɔ nɔ jɩ puure dɩɩ mɩɩ.