Kpɛsɛrɛ hor tibil fɩl jɩnɩɩkɛ n mɛnɩ ɔɔ cɔ
9
1 Kpɛsɛrɛ thele thɩrkara makoɲɔ,Dɩ a mɩrɛ ɔɔ cɔ.
2 A kʋʋrɛ nʋma, a gbɛbɩ dɩvɛ̃,
A gbɛbɩrɛrakɛ dikor pɩ a thɩɩn.
3 Dɩ a thʋ̃ɔ ɔɔ thɔ̃daar khɛrsɔ, wɩ hulene a wɛ tɩbɩla,
Dɩ wɩ n hulene gĩgĩ yʋɔsɔɔkɛ hanɩ le dɩɩra aa:
4 Ʋrɛɛkɛ dɔnɩ fɩl 'leedaar a kɛra ɩnana kɛkɛ!
Dɩ a n sor ʋrɛraakɛ na jɩɛnɩ fɩla' dɩ yɩ:
5 Nɩ ɩna kɛ a khɔ ɩ̃ dɩko,
Nɩ ɲɔ dɩvɛ̃ɛkɛ mɩ gbɛbɩnɩ.
6 Nɩ faa fɩl 'leere, na hananɛ yire,
Nɩ gba fɩl jɩ hʋɛ.
7 Ʋrɛɛkɛ n naarɛnɩ ɓoɓorodaar a na 'lɛr beesire,
Dɩ ʋrɛɛkɛ n naarɛnɩ tɩɩ puu, a na 'lɛr nɩɩrɛ.
8 Gɛr gɩ fa n naar ɓoɓorodaara', a na laar fɛr,
Ka naarɛ tɩɩ kpɛsɛ, a na na fɛr.
9 Dɩrɛ tɩɩ kpɛsɛ, a na jɩɛ kpɛsɛ na dɛɛnɔ.
Dɩɩrɛ tɩɩ sarʋ, a na 'lɛr jɩɩr na jɩɩ dɛbɩrɔ.
10 Maar Thãgba Kɔ̃tɩnna dʋɔn kpɛsɛ hananɛɛ tɔ̃tʋ̃ɔ pa,
Mɔ̃ fa jɩnɩ Thãgbaakɛ phonɩ gɛr dʋɔn jɩ hananɛ.
11 Mɛr kpɛsɛrɛ na dɔ nɔɔ fɩ hana yiri fɩ pʋɔr,
Afɩ yɛ nɔ dakha n tɔ gɩ dɛɛnɔ.
12 A fɩ hana kpɛsɛrɛ, afɩ thɛthɛɛ dabɔ gɩ,
A fɩ do ɓoɓorodaar, afɩ yʋɔ gɩ ha dɩbara.
13 Khɛr də̃bəl, khɛr nɔ kɩɛrdaar gɩ,
Kɛ na jɛnɩ fɩla', aa jɩ thɩ̃ɛa'.
14 A n toore ɔɔ cɔ lõfonɔra,
Too paarakɛ hanɩ gĩgĩ yʋɔ le dɩɩra,
15 Sɩ da n we hʋ kasɔɔkɛ n kananɩ awɩ hʋ dẽdẽdẽ dɩ yɩ aa:
16 "Ʋrɛ dɔnɩ də̃bəl a kɛra ɩna kɛkɛ!"
Dɩ so dakha wɩrɛraakɛ na jɩɛnɩ fɩla' dɩ yɩ:
17 "Ɲɔ yunəne na n daar kpãkpalã ga,
Dɩkorɩkɛ fɩ wolonɩ a kho n daarɛ ka!"
18 Sɩ tɩbɩlaale na jɩ dɩ ɔɔ pa dʋɔn khĩdidaraa pa ga,
Wa jɩ dɩɩ do wɩrɛ a n wenɩ, khĩdidaraa dʋɔ a n jalna wa'.