Gɩrɛ kpɛsɛrɛ hulenɩ a so
8
1 Ga do kpɛsɛrɛ n bɛ hulẽbirə' ?Ga do jɩɩrɩ wi n thaa' ?
2 Gɔ̃gɔ̃ gbã yʋɔsɔɔkɛ hanɩ hʋ nʋɔra, a jɩɩl
Kãkɛ hʋɛsɔ caanɩ.
3 A hale dɩ lõfonɔ lõ paarsɔ a jɩɩl,
A hale lõfonɔ yirosɔ da n hulẽ aa:
4 Hei! Nɛr tɩbɩlaalera nɛr mɩ n mɩɩna,
Nɛrɛ fɛw, nɛr mɩ n so.
5 Nɛr fɩl 'leedara, nɩ hanana bʋdʋr;
Nɛr də̃bələ, nɩ dɩrɛ fɩlɛ.
6 Nɩ pɛ nũu, gɩdonɩ mɩ hananɛ thɩ̃ kɔ̃tɩna a na so,
Dɩɩrɛɛkɛ na thɛnɩ ɩ̃ nɔra gɩ telene ka.
7 Sobɔr haar ɩ̃ nɔ n mɩɩ,
Ɩ̃ delẽbi n ƴʋɔnɛ puu mɩɩrɛ.
8 Ɩ̃ nɔ thɩmɩɩsɔ fɛw sarɛ,
Sõsor na harɔ, dɩ gõgolone ga.
9 Gɩ sarɛ fɛw tibiləəkɛ hananɩ kpɛsɛrɛ,
Gɩ telene wɩrɛraakɛ hananɩ jɩɩr.
10 Nɩ to dɩɩrɛɛkɛ mɩ n ha nɩnɩ
Gɩ jɔ mɔ̃ nɩ n ƴaalnɩ war,
Nɩ to a ƴaalɛ jɩɩr a jɔ mɔ̃ nɩ n ƴaalnɩ dɛ kilele.
11 Gɩdonɩ kpɛsɛrɛ baar lẽbi the nɔ khɩɩsɔ,
Thɩ̃ ɓɔ̃ kpɩɩ na hale a mãkhanaa ga.
12 Mɛr kpɛsɛrɛ, bʋdʋr sɩ n cɔna kha,
Dɩ mɩ 'lɛr jɩɩrɩkɛ bɩ̃ kuure n 'laanɩ.
13 Maar Thãgba Kɔ̃tɩnna,
Gɛr dʋɔn puu ƴʋɔnɛ.
Dɩ mɛrɛ mɩ n laarɛ tɩɩ kpɛr,
Na i ƴaalɛ na puu cʋʋrɛ,
Na gõgolõ thɩmɩa.
14 Fɩl dɩɩrɛ na fɩlɛ, mɛr n hana gɩ
Mɛr n dʋɔn kpɛsɛrɛ, mɛr hɩna fãga.
15 Mɛr n dɔ nɔɔ dɩ jamanasɔ n puno a thɔɔ dɩɩ,
Dɩ kɔ̃tɩna n gʋʋr thɩmɩa dɩɩ sar.
16 Mɛr n dɔ nɔɔ dɩ punodara,
Na tɩɩ kɔ̃tɩna, na sogʋʋrdara fɛw thɩɩra n puno a kʋmãdɩ.
17 Mɛr kpɛsɛrɛ, mɩ n nar wɩrɛ naan mɩnɩ,
Dɩ wɩrɛɛkɛ n ƴaalɛ mɩnɩ, wɩ n yɩ mɛr.
18 Ɩ̃ pa lẽle thɩ̃ɛ na i dʋbɩrɛ n the,
Ɩ̃ pa thɩ̃ bɔɩsɔɔkɛ n pʋɔrɛnɩ na fɩl sarʋ ha.
19 Khorɩkɛ mɩ n 'laanɩ baar dɛ; gɩ baarakɛ dɛ kile haar,
Dɩ kakorɩkɛ mɩ n 'laanɩ baar dɛ bulookɛ wɩ phiirnɩ.
20 Fɩl sar hʋɛ mɩ n jalna,
Na lẽle thɩ̃ɛ gɩ hi awɩ cɔ.
22 Thãgba Kɔ̃tɩn kɔɔ maan ti mar dɩ̃ɩ do cacadaar ɔɔ thɩ̃ tinəsɔɔra,
Mɩ kɔɔ kʋʋlɛ ƴɩɛ ɔɔ mama thɩ̃ tinəsɔ fɛʋraakɛ maanɔnɩ ga do kpãkpalã ga.
23 Mɩ kɔɔ mãa hale khorr kɛkɛkɛ,
Mɩ kɔɔ mãa hale tɔ̃tʋ̃ɔ paar ɔbɔɔkɛ thɩɩ na kɔɔ hanɩle pa'.
24 Mɩ kɔɔ mãa hale ɔbɔɔkɛ laɲɔ̃ kɔ̃tɩna na kɔɔ hanɩ le pa',
Bɔɔkɛ ɲɔ bu kana na kɔɔ hanɩle pɩ na ɲʋɔna', mɩ kɔɔ hale.
25 Ɔbɔɔkɛ gɔ̃gɔna na kɔɔ hanɩ dɩɩra pɩ,
Dɩ gɔ̃gɔ̃ biisɔɔ ga, mɩ kɔɔ hale.
26 Mɩ kɔɔ mãa hale dabɔɔkɛrakɛ aa kɔɔ cʋʋnɩ thɩɩ, dɩ gɩrɛ harɔnɩ gɩ pa',
Dɩ aa kɔɔ cʋʋ dakha caca thɩlãkobiriikɛ a cʋʋnanɩ thɩɩ pa'.
27 Ɔbɔɔkɛ a n cʋʋnɩ thãgbara ƴũusɔ, mɩ kɔɔ hale.
Ɔbɔɔkɛ a n pɛnɩ pɛl a lee ƴũu na thɩɩ, mɩ kɔɔ hale.
28 Mɩ kɔɔ mãa hale ɔbɔɔkɛ a pɛnɩ ndɔlɔ̃pana le ƴũu,
Ɔbɔɔkɛ ɲɔ bu kana cɩrnɩ ɲʋɔn na fãga, mɩ kɔɔ mãa hale.
29 Ɔbɔɔkɛ a n pɛnɩ laɲʋɔnɩ pɛl,
Gɩ do nɔɔ ɲʋɔn na n seera', mɩ kɔɔ mãa hale.
Ɔbɔɔkɛ a n kpɛɛnɩ thɩɩ go ko, mɩ kɔɔ mãa hale.
30 Mɩ kɔɔ mãa halerakɛ ɔɔ kɩrɔ a do thɔ̃ jɩdaar kpɩɛ.
Dɩ wire wo wire, mɩ n kɔɔ cʋʋrɛ gɩrɛ n daaraanɩ,
Dɩ ma n kãkana bɔɔ fɛw ɔɔ ƴɛra.
31 Mɩ n kɔɔ kãkarɛ ɔɔ thɩraakɛ a tini,
Dɩ mɩ n 'lɛr daw tɩbɩlaa thɩ̃thɩɩn.
32 Mɛ̃ gɩ ɩ̃ bikũusɔ, nɩ pɛ mɩ nũu,
Gɩ da wɩrɛraakɛ n cʋɛnɩ gɩrɛ mɩ n sonɩ.
33 Na n pɛ ɩ̃ dɩɩrsɔ nũu; a 'lɛ kpɛsɛrɛ,
Na n mə̃mələ̃ ga.
34 Gɩ da tibiləəkɛ n pɛ mɩnɩ nũu,
Kɛ n hanɩ ɩ̃ lõfonɔra wire wo wire da n jʋʋr,
Kɛ n jɩlɛnɩ ɩ̃ lõfonɔ yiro da n bɛr.
35 Gɩdonɩ ʋrɛɛkɛ 'lɛ mɩnɩ, yire a 'lɛ,
A 'lɛna bɔnanɛ Thãgba Kɔ̃tɩnna.
36 Sɩ ʋrɛ n cʋɛ marnɩ puure, ɔɔbara a n hʋɔlɔ,
Wɩrɛ fɛʋʋkɛ n laarɛ mɩnɩ khir wɩ na.