Khɛr bɔdɛl dor pheru daɓolala
7
1 Ɩ̃ bikuun, na fɔrɔ ɩ̃ thɩmɩɩsɔ,Jɩɛ fʋrɔ ɩ̃ nɔka thɩmɩɩsɔ bɔɔbɔɔ.
2 Jɩɛ fʋrɔ ɩ̃ nɔka thɩmɩɩsɔ bɔɔbɔɔ, gɩ do nɔɔ fɩ hana yiri,
Jɩɛ fʋrɔ ɩ̃ dɩɩrsɔ bɔɔbɔɔ gɩ ho afɩ yi bisɔ.
3 Tɔ gɩ afɩ ɲɛ̃bisɔɔra,
Kherene gɩ afɩ hara.
4 Na hɩnɛ kpɛsɛrɛ a ho afɩ õkhɛr,
Na hɩnɛ jɩɩr a ho khɛrɩkɛ dɔnɩ afɩ kuun.
5 Dɩ wa taa fɛr khɛr fɩ̃fɩlla,
Na khɛr kpakpallaakɛ n fɩɩlɛnɩ na nɔ da thɩmɩa.
6 Wi bɩɛl mɩ kɔɔ hale ɩ̃ cɔ,
Dɩ ma n hɩɩna fɛnɛtɩrɩ kana,
7 A yɩ daɓolaakɛ na jɛnɩ fɩla',
Dɩ awɩ thɩ̃thɩɩn mɩ yɩrɛ le kũubir bɩɛlɩkɛ 'leanɩ fɩlɛ.
8 Dɩ mɔ̃ a n kananɩ hʋɛ, a dã khɛr bɔdɛl bɩɛlɩ pa khʋra,
A gbaar khɛrɩlee cɔ hʋ da n jal.
9 Dʋɔrɔ kɔɔ gɩ, wi lõ bɔɔ,
Dɩɩ n kɔɔ tɩnɛ, dɩ paar na n birə.
10 Dɩ hɩnɛ khɛrɩle caanʋnɛ,
A to kẽkena thetoo khaa, dɩ fɩɩlɛ hire le haara.
11 Khɛr khɔkhɔdaar gɩ ka, a khɩɩr yire ga do kpãkpalã ga,
Ɔɔ sɩka na n sʋr cʋɔrɔa'.
12 Gbe a har hʋ kɔ̃tɩɩna, gbe a hale ƴatɔɔ,
Hʋ caan paarsɔra fɛw, a hale a jɩɩl da n pɩɛr.
13 Dɩ a fʋrɛ daɓolbirile, a pallʋʋ,
Sa sʋʋraa na yi kheu aa:
14 Mɩ kɔɔ sor ma jire 'likha bonɩɛ,
Dɩ nĩikɛ mɩ hɛlɛ ɩ̃ nɔ sora pɩ.
15 Gɛr dɔ kɩrʋ mɩ kɔɔ thenɩ ɩ̃ caan fɩ,
Mɩ n kɔɔ ƴaal fɛr, dɩɩ do mɩ yɩ fɛr.
16 Mɩ gbɛbɩrɛ ɩ̃ phɩ̃ pa pɩ,
Mɩ belle kẽkẽ nɩɩsɔ a thiro, lɛ̃ kẽkẽ wiirikɛ thɛnɩ Ejipiti wɩ lena gɩ a ɓol gɩ bɔɔbɔɔbɔɔ.
17 Hɩnɛ, mɩ be ger parfɛ̃sɔɔkɛ n hʋnanɩ daw, kɛ wɩ n wenɩ mɩɩr na alʋɛsɩ na sɩnamɔm.
18 Ɩna sɩ kãka kha sɩ wɩlna dɩɩ,
Dɔ sɩ nɩ daʋʋkɛ dʋɔnɩ naw daw.
19 Gɩdonɩ ɩ̃ ko na hakɛ cʋɔrɔa',
A jaal kpaar paar ƴɔɔ fĩi.
20 A gbaar lokaar na mũsumo bərəəm a fʋrɔ,
A ga do sɩpo lee bɔɔ ga, a na ɩ̃ cʋɔrɔa'.
21 Khɛrɩle fɩɩlʋlɛ na ɔɔ fɩ̃fɩɩl thɩmɩɩsɔ dɩ tu,
A hallʋʋlɛ na ɔɔ nɔ da thɩmɩɩsɔ.
22 Dɩ a mar dapaara da n kpaaraa a ho naakɛ wɩ n jalnanɩ kʋ paar,
Na dəbəəlikɛ wɩ lini dɩ wa n jalna bɩɩr paar.
23 Phaphapha dɩ wɩ thaa na sõo kũkuno,
Mɔ̃ 'lomin n canɩ ɔɔbara dɩ lõ pherura,
Sɩ a n jɩ khirə a n jala'.
24 Gɛr gɩ nɛnɛ̃ ɩ̃ bikũusɔ, nɩ pɛ mɩ nũu bɔɔbɔɔ,
Nɩ jɩɛ gba nũu ɩ̃ nɔ thɩmɩsɔɔra.
25 Na n dorakɛ haar n fi nɩ nɩ kpa khɛr caaraala',
Na n bu a gba ɔɔ hʋsɔa'.
26 Gɩdonɩ a pɛr tibil jɔjʋɔra khoi, a tʋɔr wɩ kpɛɛ,
Wɩrɛrakɛ dɔnɩ kuun khena, sɩ a kʋʋr wɛr fɛw.
27 Ɔɔ cɔ khĩdidaraa dɩ hʋ ha,
Ɔr dɔ hʋɛɛkɛ wɩ n lonanɩ khirii duu.