Ɩjɩrayɛl bɩsana tire kpɩɛrɛ wa n hɩɩn Thãgbaa jɔfʋ
10
1 Ga bɔɔ gaar caarlera fɛw dɔ kɩrʋ sɩ tini kpɩɛrɛ na haar kpẽgelẽe, a khere kpɩɛrɛɛlera sɩ pɛ sɛbɛra. Dɩ sɛbɛɛlera kherenenɩ, asɩ kɔ̃tɩ̃sɔ na asɩ Levɩɩ məlsɔ na asɩ bonɩ jidarasɔɔ ɲɛ̃bi jẽsɔ hale a dʋrɔ.2 Wɩrɛ dɔrɔnɩ awɩ ɲɛ̃bi jẽ sɛbɛraalera kherenenɩ awɩ isɔ ha gɩrɛ: Hakalɩaa bikuun Nehemɩ, kɛ dʋɔnɩ gobanɛr na Sɩdekɩa, 3 na Seraya na Ajarɩa na Ɩrmeya, 4 na Pasehuur na Amarɩa na Malkɩa; 5 na Hatusi na Sebanɩa na Malukɩ, 6 na Harɩm na Meremɔtɩ na Obadɩa, 7 na Danɩɛl na Gɩnetɔ̃ na Baruki, 8 na Mesulam na Abɩa na Mɩamɛ̃, 9 na Majɩa na Bɩlgaɩ na Semaya. Wɛr fɛw, bonɩ jidara wɛ.
10 Levɩɩ məlsɔ ha wɩrɛ: Yesuaakɛ dʋɔnɩ Ajanɩaa bikuun, na Bɩnʋɩɩkɛ thɛnɩ Henadadɩɩ thɩ kɔna na Kadɩmɩɛl, 11 na awɩ omɩsɔɔkɛ dʋɔnɩ: Sabanɩa na Hodɩa na Kelɩta na Pelaya na Hanan, 12 na Mɩka na Rehɔbɩ na Hasabɩa, 13 na Jakuur na Serebɩa na Sebanɩa, 14 na Hodɩa na Banɩ na Beninu. 15 Ɩjɩrayɛl bɩsanaa kɔ̃tɩ̃sɔ ha wɩrɛ: Parɔsɩ na Pahatɩ-Moabɩ na Elam na Jatu na Banɩ, 16 na Buni na Ajɩgadɩ na Bebaɩ, 17 na Adonɩa na Bɩgɩvaɩ na Adɛn, 18 na Atɛɛr na Hɩjɩkɩa na Ajuur, 19 na Hodɩa na Hasum na Besaɩ, 20 na Harɩfɩ na Anatɔtɩ na Nebaɩ, 21 na Magɩpɩasɩ na Mesulam na Hejɩɩr, 22 na Mesejabɛl na Sadɔkɩ na Yadʋa, 23 na Pelatɩa na Hanan na Ananɩa, 24 na Oje na Hananɩa na Hasubi, 25 na Halohɛsɩ na Pɩla na Sobɛkɩ, 26 na Rehum na Hasabɩna na Maseya, 27 na Ahia na Hanan na Anan, 28 na Malukɩ na Harɩm na Baana.
29 Tibil wɩrɛ sɛnɩ hale dakha a ɓã war: bonɩ jidara wɛ na Levɩɩ məlsɔ na lõ bɛrdara na nɩ khɩna na Thãgba fʋɔr cɔ thɔ̃ dona na wɩrɛ fɛʋʋkɛ leanɩ kpɩɩ ca kpɩɩsɔra wɩ puno wa n hɩɩn Thãgbaa jɔfʋ na awɩ khɛrsɔ na awɩ bikũusɔ na awɩ bikhɛrsɔ; wɩrɛ fɛʋʋkɛ hananɩ fɩlɛ a na puno a na jɩ kɩrʋ, 30 wɩ ɓãa awɩ omɩsɔɔrakɛ dʋɔnɩ tɩɩ kɔ̃tɩna, kɛ hanɩ awɩ thɩ̃thɩɩn. Dɩ wɩ ʋlfɛrɛ a sona nʋɔ ayɩ ɩna n ɩɩrɛ Thãgbaa jɔfʋraakɛ a hanɩ ɔɔ thɔ̃daar Mʋɩjɩ dɩ 'laa; aa, ɩna n hɩɩn gɛr, ɩna n cʋʋna Thãgba Kɔ̃tɩn, asɩ Kɔ̃tɩ̃ɩ jɔfʋsɔ fɛw na ɔɔ sosɔ. 31 Dɩ sɩ ʋlfɛrɛ ayɩ sa ha ca kpɩɩsɔkɛ tɔɔnɩkɛ dɩɩra asɩ bikhɛrsɔ wɩ hea', sa gba dakha awɩ bikhɛrsɔ na ha asɩ bikũusɔ wɩ hea'. 32 Sa the wɩ thɩ̃ bɩɛllakɛ hɩɩr wire dɩ fɛtɩ wire ga. Ado wa tibilsɔɔlera hanɩkɛ dɩɩra ɩna ƴayabɩ thɩ̃ɛ, agɩbo dɩkhaa thɩ̃ khona gɩ, dɩ wɩ ɩna a na dolõ hɩɩr wire sa tha'. Yɛna makoɲɔ yɩɛra, sa faarɛ thɩɩ a na n hɩɩr; sa faarɛ hella fɛw a na 'laa.
Ɩjɩrayɛl bɩsana tire kpɩɛrɛ mɔ̃ wa n 'laanɩ thɩ̃ɛ Thãgbara
33 Dɩ sɩ pɛr jɔfʋʋkɛ na fɛrɛnɛ sɩnɩ sa n 'laa sikile mũsũ bi bɩɛlɩ tɩnɛ pa bɩɛl, tɩnɛ paar yẽthera yɩɛra, gɩ do asɩ Thãgbaa cɔ thɔ̃ doda. 34 Ga mũsũulee wa n cʋʋna buruukɛ wɩ n thɩɩnɩ na thɩ̃ bi bonɩɛɛkɛ n jenɩ wire fɛw na bonɩ thiinǝǝkɛ wɩ n jinɩ wire fɛw, na hɩɩr wi bonɩɛsɔɔkɛ wɩ n jinɩ bɔɔ fɛw, na sɩpor pha bonɩɛsɔ, na kpa jɛ kɔ̃tɩnasɔ, na thɩ̃ khaasɔ, na so hɛl bonɩɛɛkɛ wɩ n jinɩ Ɩjɩrayɛl bɩsanaa sopuusɔra. Ga thɔ̃sɔɔle mũsumoole na n cʋʋ, ga n cʋʋna dakha asɩ Thãgbaa cɔ thɔ̃sɔ fɛw. 35 Dɩ sɛr bonɩ jidara na Levɩɩ məlsɔ na tɩɩ khɩna, sɩ lɩrɛ lɩɩ mɔ̃ sa n tini dɛɛ, kɛ teananɩ sa n pɔna yɩɛr fɛw asɩ Thãgbaa cɔ gɩ do khaardaa, mɔ̃ asɩ cɔkasɔ hanɩ, bɔɔraakɛ wɩ pɛrnɩ, wɩ puno wa n gbɔɔ Thãgba Kɔ̃tɩn asɩ Thãgbaa bonɩ ji para mɔna gɩ kherenɩ jɔfʋra. 36 Sɩ tire kpɩɛrɛ ayɩ yɩɛr fɛw sa n pɔnanɛ caca thɩ̃ɛɛkɛ dʋɔnɩ asɩ kokol thɩ̃, na thɩra fɛʋʋ caca bi fɛw Thãgba Kɔ̃tɩnɩ cɔ. 37 Sa pɔnanɛ asɩ caca bikũusɔ asɩ Thãgbaa cɔ, na asɩ nʋmaa caca bisɔ a na ha bonɩ jidaraakɛ n dʋɔnɩ thɔma le asɩ Thãgbaa cɔ, sɩ 'laana asɩ nʋ̃ kɔ̃tɩnaa caca bisɔ na asɩ nʋ̃ yɩraa caca bisɔ mɔ̃kɛra gɩ kherenɩ jɔfʋra. 38 Sa pɔnanɛ asɩ buru mɩ̃ɩkɛ thɛnɩ caca mɩ̃ bʋɔraakɛ dʋɔnɩ cacadaa, na khaardaakɛ wɩ n tini, na thɩra fɛʋʋ bi na dɩvɛ̃ ta phaa na niin. Sa pɔna gɛr duusɔraakɛ hanɩ asɩ Thãgbaa cɔ a na ha bonɩ jidara, sɩ 'laana asɩ bɩɛl yʋɔrɩkɛ thɛnɩ kokol thɩɛna sɩ ha Levɩɩ məlsɔ. Levɩɩ məlsɔ thɛthɛ na jaal dɩɩsɔraakɛ fɛw hanɩ kãakɛ sɩ n kʋʋlnɩ wɩ ti bɩɛl yʋɔra. 39 Ɔbɔɔkɛ Levɩɩ məlsɔ na n tini bɩɛl yʋɔrɩkɛ wa tini bɩɛl yʋɔrsɔra, wɩ gba wɩ jalna duusɔraakɛ hanɩ asɩ Thãgbaa cɔ, Aarɔ̃ɔ mǝl bɩɛlɩkɛ dʋɔnɩ bonɩ jidaar na hale nakha Levɩɩ məlsɔ. 40 Ɩjɩrayɛl bɩsana na Levɩɩ məlsɔ na jalnanɛ bilesɔɔkɛ wɩ tini, na dɩvɛ̃ ta phaa, na niin duusɔraalera. Le pa phu thɩ̃besɔ ha nakha bonɩ jidaraakɛ n dʋɔnɩ thɔma na lõ bɛrdara na nɩ khɩna. Thale gɩ do nɔɔ sa faa asɩ Thãgbaa fʋɔr cɔa'.