Ɩjɩrayɛl bɩsana caan awɩ sopuusɔ
9
1 Ɔ sɩporaalera, ɔɔ wire kpelẽ yenã wirǝ, Ɩjɩrayɛl bɩsana gbɛbɩrɛ kha wɩ li nʋɔ, a to bɔrɔ kẽkena a mɔɔna thɩna. 2 Dɩ wɩrɛ dʋɔnɩ Ɩjɩrayɛl bɩsana leere kpɩɩ ca kpɩɩsɔra a jɩɩl wɩ cã awɩ sopuusɔ, wɩ cana awɩ thɩsɔɔ dɩpasɔ. 3 Dɩ wɩ jɩɩlɛ ƴũu ka wɩ hanɩ, dɩ wɩ sor Thãgba Kɔ̃tɩn awɩ Thãgbaa jɔfʋ sɛbɛ a cʋʋna lɩɛr yẽther; agɩpɩ wɩ gbaar lɩɛr yẽther kpɩɩ a caana awɩ sopuusɔ, a gburõkhu Thãgba Kɔ̃tɩn, awɩ Thãgbaa ƴɛra a bɩɛl dɩpa faarɛ. 4 Dɩ Yesua na Banɩ na Kadɩmɩɛl na Sebanɩa na Buni na Serebia na Banɩ na Kenanɩ ɩɩrɛ jɩɩl Levɩɩ məlsɔɔ jɩɩl paakɛ wɩ gbɛbɩnɩ a ƴɛɛ Thãgba Kɔ̃tɩn awɩ Thãgba. 5 Dɩ Yesua na Kadɩmɩɛl na Banɩ na Hasabinea na Serebɩa na Hodɩa na Sebanɩa na Petahɩa, kɛ dɔnɩ Levɩɩ məlsɔ so ayɩ: Nɩ ɩrɛ a kpãganɛ Thãgba Kɔ̃tɩn anɩ Thãgba bɔɔ fɛw, bɔɔ fɛw waa khorr!Kɔ̃tɩn dɔ tɩbɩla fɛw na n kpãga afɩ i ɓɔ̃,
ireekɛ wabɩnɛnɩ a kãasɩ kpãgar caara fɛw na fʋɔr caara fɛw!
6 Fɛr Thãgba Kɔ̃tɩn, fɛr bɩɛl dɩbara 'lẽ'lẽ'lẽ hãale.
Fɛr cʋɛ ƴũusɔ, na thãgbara ƴũusɔ na awɩ ƴepǝlǝ̃bisɔ fɛw.
Fɛr cʋɛ thɩɩ na thɩ̃ɛ fɛʋʋkɛ a hananɩ; na laɲɔna na thɩ̃ɛ fɛʋʋkɛ wɩ hananɩ.
Fɛr n 'laanɛ yire thɩ̃ɛ fɛʋra; dɩ fɛra ƴũu kokena fɛw n gburõkhu.
7 Fɛr Thãgba, kɛ dʋɔnɩ Thãgba Kɔ̃tɩn,
fɛr phiire Abɩram a cʋgʋʋ dɩ the Uur, Kaldedaraa dʋɔ,
dɩ fɩ haa ire Abɩraham.
8 Fɩ yɩrɛ ɔɔ ha dɩɩ sar far,
dɩ fɩ ʋlfɛnaanɛ nɔ bɩɛl ʋlfɛrɛ ayɩ
ɔɔ mǝlsɔ fa ha Kanãadaraa dɩ,
na Hɛtɩɩ mǝlsɔɔ dɩ,
na Amɔɔr məlsɔɔ dɩ,
na Perejɩdaraa dɩ,
na Jebusidara dɩ,
na Girgasɩ̃ɛsɔ dɩ.
Fɩ sarɛ, gɛr gɩ dɩ fɩ fʋ afɩ nɔ thɩmɩɩ oti.
9 Fɩ yɩrɛ asɩ thɩ kɔ̃tɩ̃sɔɔ bɔgaar Ejipiti dɩɩra;
dɩ fɩ nɩɛrɛ awɩ hulẽbi laɲɔ̃ sɛ nʋɔra.
10 Dɩ fɩ ber Faarɔ̃ na ɔɔ thɔ̃dara fɛw,
na ɔɔ dɩdara fɛw na jɩ̃ɩsɔ na nɔ kpaa thɩ̃ɛsɔ;
gɩdonɩ fɩ jɩrɛ gbõgolõ caarɩkɛ wɩ kɔɔ hʋɔlna warnɩ,
dɩ fɩ ther ire dɩɩ wabɩ ka, a dana nĩkɛ.
11 Fɩ kɔɔ ɓɛllɛ laɲʋɔn awɩ ƴɛbʋrɔ
dɩ wɩ 'lɛ pa khɩɩ laɲɔ̃ thɩ̃thɩɩn a kana.
Sɩ wɩrɛ n kɔɔ wea wɩnɩ,
fɩ gbʋma wɛr laɲɔ̃ gbɩlãbiro boka khaa ɲɔ kɔ̃tɩɩna.
12 Dɩwɩllɔ, fɩ kɔɔ thɔɔrɛ afɩ too na ndɔlɔ̃paarɩkɛ hɔnɩ kparɛ;
dɩtɩnɔ, dɩ fɩ thɔɔ wɩ na ndɔlɔ̃paarɩkɛ dɔnɩ dɔɔ
dɩ ga n carã wɩ hʋɛraakɛ wɩ n jalnanɩ.
13 Fɩ kɔɔ gbune Sɩnayɩ gɔ̃gʋɔnna.
Fɩ mɩɩna wɛr le thãgbara ƴũu.
Fɩ ha wɛr dɩɩr telẽe;
a ha wɩ sobɔr jɔfʋ;
a ha wɩ dɩɩrɛ na fɩlɛɛkɛ ɓɔnanɩ.
14 Fɩ cʋʋ wɛr dɩ wɩ jɩ afɩ hɩɩr wi phu.
Fɩ har afɩ thɔ̃daar Mʋɩjɩ dɩɩrɛ,
na fɩlɛ na jɔfʋ dɩ ha wɩ.
15 Ɔbɔɔkɛ kɔmɛr kɔɔ fʋlɛ wɩnɩ,
fɩ kɔɔ ha wɛr dɩkɔɔkɛ thɛnɩ thãgbara ƴũu
fɩ cʋʋrɛ ɲʋɔn dɩɩ the bokaara dɩ fɩ ha wɩ,
ɔbɔɔkɛ yɔlkhaa fʋlɛ wɩnɩ.
Fɩ so warɛ wɩ lona a gba dɩɩkɛra
fɩ kɔɔ ʋlfɛnɩ fa ha wɛr a hɩna.
16 Sɩ wɛr, asɩ thɩ kɔ̃tɩ̃sɔ kɔɔ ƴaalɛ ire,
wɩ ɩɩrnanɛ lãʋ, wa nɩ nũu afɩ jɔfʋsɔra ga.
17 Wɩ bʋʋrɛ nũ nɩɩr.
Bɔɔkɛ fɩ kɔɔ cʋʋ wɩnɩ, wa jɩna gɩ bã,
sa ɩɩrna cɩ̃cɩmanɛ.
Dɩ awɩ cɩ̃cɩmanana,
wɩ phiire kɔ̃tɩ̃ awɩbara,
ɩnɩ n kɛr ɩnɩ n bir ɩnɩɩ dee thɔna.
Sɩ fɛrɛ, fɛr dʋɔn sopuu faa Thãgba.
Bɔ fʋdaar fɩ do, fɩ n jɩrɛ bʋɔra;
fa n gba nĩkhii kɔrɔa',
fɩ hinǝne ha bulole dɩɩ ka, dɩ fa bo wɩ a faa ga.
18 Wɩ hɩlnɩnakɛ ther a phebɩ na buu dɩ wa n so aa,
ʋrɛ dʋɔn ɩnɩɩ thãgbaakɛ tenɩ nɩ Ejipiti dɩɩra a thena;
mɔnakɛ wɩ cʋʋ farnɩ puu kɔ̃tɩ̃ɩ thale dɩɩ thʋ̃ ka,
19 sɩ fɛrɛ, afɩ bɔjɩ kɔ̃tɩ̃ dʋɔn nɔɔ,
fa bo wɩ a faa le bǝ̃ kparaara ga.
Dɩ ndɔlɔ̃paarɩkɛ hɔnɩ kparɛ halerakɛ
'lo dɩwɩllɔ da n thɔɔ wɩ awɩ hʋra;
dɩ dɩtɩnɔ ndɔlɔ̃paarɩkɛ dɔnɩ dɔɔ hale
da n carã wɩ hʋɛraakɛ wɩ n jalnanɩ.
20 Fɩ ha wɛr afɩ Thuukɛ bʋɔnɔnɩ,
a puno a ha wɩ bɩ̃ kuure, fa tɔ̃ wɩ maanb ayɩ,
ga lõ wɩ nʋɔra bã ga,
mɛ̃ fɩ ha wɩ ɲʋɔn oti awɩ yɔlkhara.
21 Yɛna kpalaɲɔ fɩ haan wɩ a cʋʋna le bǝ̃ kparara.
Thɩ̃ bɩɛllakɛ na kɔɔ ɓɔr wa',
kẽkena na kɔɔ tɩ̃ wɩ a ɓǝǝrǝ',
nɛɛ na kɔɔ mʋɔr wa'.
22 Fɩ gbaar jamana dɩɩsɔ na caarsɔ a to awɩ ɲɔ̃kɔɔ,
a gbana dɩɩsɔɔkɛ khonǝ wɩnɩ a tɩnɛ wɩ.
Wɩ teere Sɩhɔ̃ɔ dɩ na Hɛsɩbɔ̃ jamanaa dɩ,
a teena Ɔgɩɩkɛ dʋɔnɩ Basã jamanaa dɩ a hɩ̃.
23 Fɩ ha wɛr mǝlle jɔɔ
a ho mɔ̃ ƴepǝlǝ̃be hanɩ thãgbara ƴũu;
fɩ cʋʋ wɛr dɩ wɩ lõ dɩɩraakɛra fɩ kɔɔ sonɩ
awɩ thɩsɔra wɛr na hɩna.
24 Awɩ mǝlsɔ lʋʋn a gba dɩɩra.
Fɩ jor Kanãadaraakɛ dʋɔnɩ dɩdara awɩ ƴɛbʋrɔ,
a gba wɩ a to awɩ ɲɔ̃kɔɔ,
wɛr na awɩ jamanasɔ na dʋɔdara fɛw,
wɩ cʋɛna wɩ mɔ̃ wɩ n ƴaalnɩ.
25 Wɩ teere dɩɩsɔɔkɛ gʋʋsɔ kpalalɔnɩ
na thɩɩsɔɔkɛ bʋɔnɔnɩ;
wɩ teere cɔnaakɛ henǝni thɩ̃ bɔ caar fɛw a hɩ̃,
na ɲɔ tɛ korʋsɔɔkɛ kɔɔ kpɩɛnɩ, na dɩvɛ̃ thɩra,
na olɩvɩ thɩra, na thɩr senanɛ tǝ̃tǝ̃tǝ̃.
Dɩ wɩ khor dɩkɔ a hi a khʋɔn.
Afɩ ha bulo kɔ̃tɩ̃ dɔ nɔɔ dɩ wɩ toona daw.
26 Sɩ wɩ ɩɩrnanɛ yʋ bʋ̃ʋ a lã far.
Wɩ fire khiru a pɛ afɩ jɔfʋra.
Wɩ kʋʋrɛ afɩ mɩmɩɩsɔɔkɛ n kɔɔ bɩɛlɛ wɩnɩ na fɛrɛrɛ,
wɩ kɛra birǝ far. Wɩ cʋʋ farɛ sopuu dɩɩ kpal ka.
27 Gɛr gɩ dɩ fɩ gba wɩ a to awɩ lãlaardaraa ɲɔ̃kɔɔ
dɩ wɩ hʋɔl war.
Sɩ mɔ̃ wɩ hanɩ bɔgaarɔ wɩ bire a hulẽ wena fɩ.
Dɩ fɩ toore le ƴũu sa nɩ awɩ hulẽbi.
Dɩ afɩ bɔ fʋ kɔ̃tɩna fɩ ha wɛr taadara,
dɩ wɩ taa wɩ awɩ lãlaardaraa ɲɔ̃kɔɔ.
28 Dɩ mɔ̃ wɩ 'lɛnɩ hɩɩrɛ na pɩ,
wɩ bire ɩɩrna puu cʋʋrɛ wo afɩ ƴɛbʋrɔ.
Dɩ fɩ bire gba wɩ a to awɩ lãlaardaraa ɲɔ̃kɔɔ
dɩ wa n pɔtɔrɔ wɩ.
Sɩ wɩ bire hulẽ a wena fɩ wo.
Dɩ fɛrɛ, fɩ toore le ƴũu sa nɩɛ awɩ hulẽbi.
Dɩ fɩ taa wɛr balamɔ̃, balamɔ̃ dɩɩ the afɩ bɔ fʋ kɔ̃tɩna.
29 Fɩ kɔɔ bɩɛl wɛr na fɛrɛrɛ wɩ kɛra birǝ afɩ jɔfʋra,
sɩ wɩ yaalɛ ire, wa hɩɩn afɩ jɔfʋsɔa'.
Wɩ nʋʋrɛ nũu afɩ jɔfʋsɔraakɛ n
'laanɛnɩ yire tibillǝǝkɛ n hɩnɛ gɩnɩ.
Wɩ bor kpei, a lã, wa pɛ fɩ nũǝ'.
30 Fɩ kɔɔ fʋ warɛ haar a cʋʋna yɛna jɔɔ.
Afɩ mɩmɩɩsɔ fɛrɛ wɛr dɩɩ the afɩ Thurǝ,
sɩrakɛ wa pɛ nũǝ'.
Gɛr gɩ dɩ fɩ gba wɩ a to ca kpɩɩsɔɔ ɲɔ̃kɔɔ dɩ kpɩɩsɔra.
31 Afɩ bɔjɩ kɔ̃tɩ̃ dɔ nɔɔ, dɩ fa bũburõ wɩ fɛw a tǝ',
fa bo wɩ dakha woa',
gɩdonɩ fɛr dʋɔn Thãgbaakɛ n jɩɛnɩ bʋɔra,
a dona bɔ fʋdaar.
32 Nɛnɛ̃, asɩ Thãgbaakɛ dʋɔnɩ Thãgba wabʋʋ,
kɛ hɩnanɩ punone, kɛ n kɔnɩ maar,
fɛrɛɛkɛ n fɔrɔnɩ nɔ bɩɛl ʋlfɛrɛ na ha bulole,
fa n gba nɩwɛɛkɛ dana sɩnɩ
dɩɩ fʋna Asiri jamanasɔɔ bɔɔ a dana nĩkɛ,
sɛrɛ na asɩ jamanasɔ na asɩ minisisɔ
na asɩ bonɩ jidara na afɩ mɩmɩɩsɔɔkɛ
hanɩ asɩ thɩ̃thɩɩn na asɩ thɩsɔ,
na afɩ too fɛw, fa n gba gɩ gɩ do thɩ̃ buuǝ'.
33 Gɩrɛ fɛʋraakɛ dana sɩnɩ
sɩ fɩ telene,
gɩdonɩ fɩ nɩnanɛ dɩ sobɔdaar fɩ do,
sɛrɛ, sɛr cʋɛ puure.
34 Asɩ jamanasɔ na asɩ minisisɔ
na asɩ bonɩ jidara na asɩ thɩsɔ na cʋʋ afɩ jɔfʋa',
wa pɛ nũu afɩ nɔ thɩmɩɩra,
dɩ kpãkpaanɛɛkɛ fɩ n kɔɔ ha wɩnɩ ga.
35 Bɔɔraale wɩ kɔɔ hanɩ awɩ dʋɔ,
thɩ̃ bɔ jɔjɔ caar fɛʋʋkɛ fɩ kɔɔ ha wɩnɩɩ thɩ̃thɩɩn,
dɩ bɔ pɩɛraale fɩ kɔɔ ha wɩnɩ, sɩ wa kɔɔ fʋɔr fa',
wa kɛr wo sa faa awɩ cʋʋ pa puukɛ wɩ hanana'.
36 Dɩ nĩkɛ, sɛrkɛ dʋɔn dea!
Sɛr ha wɩrɛ dʋɔnɩ dea dɩɩraakɛra
fɩ kɔɔ hanɩ asɩ thɩsɔ wa n khɔ ɔɔ diko na ɔɔ thɩ̃ bɔsɔ!
37 Dɩɩkɛɛ dɩko tǝ̃tǝ̃tǝ̃ǝkɛ n thɩɛraanɩ,
jamanasɔɔkɛ fɩ pɛ sarnɩ dɩɩ do asɩ sopuusɔ dɔ nɔɔ,
wɛr hɩna fɛw.
Wɩ n cʋʋnanɛ asɩ thɛthɛ na asɩ nʋ̃sɔ mɔ̃ wɩ pɛnɩ haar.
Sɩ har bɔgaar kɔ̃tɩɩna na sobɔr!